ខេត្តរតនគិរី៖ បែកធ្លាយករណីសមត្ថកិច្ចខេត្តរតនគិរីដឹកនាំកម្លាំងចុះទៅបង្ក្រាបនិងចាប់យកឈើរបស់មេឈ្មួញឈ្មោះ នី កាចាញ កាលពីម្សិលមិញនេះហើយ គឺត្រូវបានគេទម្លាយឲ្យដឹងថាមេឈ្មួញឈើដ៏ល្បីល្បាញប្រចាំភូមិភាគឦសាន្តក្នុងខេត្តរតនគិរី ឈ្មោះ ហូវ ជីវ៉ៃ ដែលស្គាល់ថាជាមេម៉ាហ្វៀរនៃឧក្រិដ្ឋកម្មព្រៃឈើមានភាពជោគជ័យលើមុខរបរជម្នួញឈើប្រណីតនាំចេញទៅក្រៅប្រទេសដ៏មានឥទ្ធិពលម្នាក់ដែលតែងតែអាចប្រើប្រាស់កម្លាំងសមត្ថកិច្ចឲ្យចុះទៅចាប់និងបង្ក្រាបបទល្មើសព្រៃឈើដើម្បីឲ្យខាងសមត្ថកិច្ចមានមុខមាត់យកស្នាដៃខ្លះៗផងនោះ ទើបធ្វើឲ្យមានការភ្ញាក់ផ្អើលដោយកម្លាំសមត្ថកិច្ចចម្រុះមួយក្រុមបានចុះទៅបង្ក្រាបនិងបានចាប់យកឈើរបស់មេឈ្មួញ ឈ្មោះ នី កាចាញ តាមរយៈខ្មោចស្រុកឲ្យដៃទើបខ្មោចក្រៅវាហ៊ានធ្វើ គឺពិតជាមិនធម្មតាទេមេម៉ាហ្វៀរ ហូវ ជីវ៉ៃ ឈ្មួញឈើជើងខ្លាំងប្រើប្រាស់កម្លាំងសមត្ថកិច្ចឲ្យចាប់យកឈើរបស់ នី កាចាញ គួរឲ្យភ័យខ្លាចចាប់របស់គេទុករបស់ខ្លួនឯងឲ្យបាននៅដំណើរការយ៉ាងរលូនជាមួយសមត្ថកិច្ច។
តាមសេចក្តីរាយការណ៍បានឲ្យដឹងថា មេឈ្មួញ ហូវ ជីវ៉ៃ ដែលគេស្គាល់ជា មេឈ្មួញទុច្ចរិតរកស៊ីកាក់កបក្នុងរបរជម្នួញឈើប្រណីតយ៉ាងដុះស្លែមកហើយ រហូតមកទល់នឹងពេលនេះ ឈ្មួញឈ្មោះហូវ ជីវ៉ៃ គឺជាមេឧក្រិដ្ឋជនព្រៃឈេីប្រចាំភូមិភាគឦសាន្តនៅតែដំណើរការបានយ៉ាងរលូនដដែល ហើយម៉្យាងវិញទៀតសកម្មភាពដឹកជញ្ជូនឈើច្រំដែលៗបែបនេះបានធ្វើឲ្យសាធារណជនគិតថា គឺជាការឃុបឃឹតគ្នាជាប្រព័ន្ធតាំងពីថ្នាក់លើរហូតមកដល់ថ្នាក់ក្រោមក្នុងការទទួលប្រយោជន៍ពីបទល្មើសព្រៃឈើ របស់លោក ហូវ ជីវ៉ៃ ដោយបានសហការជាមួយជនជាតិវៀតណាមនិងបក្ខពួកដែលមានការត្រូវរ៉ូវគ្នាទាំងអស់នោះ តាមរយៈការបើកដៃឲ្យមេឈ្មួញឈើ ហូវ ជីវ៉ៃ និងមេឈ្មួញដទៃទៀត ដឹកជញ្ជូនឈើយ៉ាងគគ្រឹកគគ្រេងយកទៅលក់នៅវៀតណាមបានយ៉ាងរលូនបំផុត។
តាមការបង្ហើបរបស់សមត្ថកិច្ចពាក់ព័ន្ធក្នុងខេត្តរតនគិរីបានបញ្ជាក់ថា ក្រុមឈ្មួញដែលបន្តសកម្មភាពដឹកជញ្ជូនឈើចេញទៅប្រទេសវៀតណាមតាមច្រកទ្វារអន្តរជាតិអូរយ៉ាដាវយ៉ាងគឃ្លើន នាពេលបច្ចុប្បន្នគឺសុទ្ធតែជាក្រុមឈ្មួញដែលមានខ្នងបង្អែកយ៉ាងរឹងមាំហើយមានការបែងចែកផលប្រយោជន៍ជាមួយគ្នាយ៉ាងរលូនទៀតផង ជាហេតុបណ្តាលឲ្យការដឹកជជញ្ជូនឈើចេញទៅវៀតណាមតាមច្រកទ្វារអន្តរជាតិអូរយ៉ាដាវ យ៉ាងរាលដាលដូចមុនដដែលៗ គឺដោយសារមានការឃុបឃិតបើកដៃពីសំណាក់លោកឧត្តមសេនីយ៍ត្រី អ៊ុី ចំរើន មេនគរបាលអន្តោប្រវេសន៍ច្រកទ្វារអន្តរជាតិអូរយ៉ាដាវ ដែលអាងមានខ្នងបង្អែកដ៏រឹងមាំនៅក្នុងក្រសួងមហាផ្ទៃថែមទៀតផង។
សូមបញ្ជាក់ថាក្រោយពីលោកឧត្តមសេនីយ៍ត្រី ថាវ យ៉េន ឡើងកាន់តំណែងជាមេបញ្ជាការកងរាជអាវុធហត្ថខេត្តរតនគិរី ជំនួសលោក គឹម រស្មី គឺមិនបានបោះបង់គន្លងចាស់ចោលនោះទេ ពោលគេបានកត់សំគាល់ឃើញថាឈ្មួញឈ្មោះ ហូវ ជីវ៉ៃ នៅតែបន្តសកម្មភាពដឹកជញ្ជូនឈើចេញទៅប្រទេសវៀតណាមតាមច្រកទ្វារអន្តរជាតិអូរយ៉ាដាវ ដោយគ្មានញញើតអ្វីទាំងអស់ដែលទំនងជាឈ្មួញឈ្មោះ ហូវ ជីវ៉ៃ សែនដុល្លារឲ្យយ៉ាងពេញចិត្តពេញថ្លើមគ្រប់ទឹកទៀតហើយ ទើបធ្វើសកម្មភាពកាប់ឈើនិងដឹកជញ្ជូនឈើចេញទៅវៀតណាមយ៉ាងគឃ្លើនបំផុត គឺដោយសារមេឈ្មួញឈើ ហូវ ជីវ៉ៃ បានជិតស្និទ្ធជាមួយនឹងលោក ថាវ យ៉េន ដែលជាមេថ្មីធ្វើជាខ្នងបង្អែកដ៏រឹងមាំនិងមិនទើសក្បាលអ្នកណាទាំងអស់។
ប្រភពបន្តឲ្យដឹងថាក្រោយពេលលោកឧត្តមសេនីយ៍ត្រី ថាវ យ៉េន ទទួលបានតំណែងជាមេបញ្ជាការកងរាជអាវុធហត្ថខេត្តរតនគិរី រួចមកគឺឈ្មួញឈើ ហូវ ជីវ៉ៃ រូបនេះនៅតែបន្តសកម្មភាភាពដឹកជញ្ជូនឈើចេញទៅវៀតណាមយ៉ាងពេញបន្ទុកដដែល ដោយគ្មានញញើតអ្វីទាល់តែសោះ ទោះបីបទល្មើសគេឃើញនឹងភ្នែកគឺមានទាំងរថយន្តសាំយ៉ុងរាប់សិបគ្រឿងសម្រុកឆ្លងដែនទាំងក្បួនជារៀងរាល់យប់នៅច្រកទ្វារអន្តរជាតិអូរយ៉ាដាវ ដែលមានលោក អុី ចំរើន ជាប្រធានប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិអូរយ៉ាដាវពុំមែនមិនដឹងមិនឮនោះឡើយ។
ប្រភពប្រជាពលរដ្ឋក្នុងខេត្តរតនគិរី បានឲ្យដឹងថា រហូតមកដល់ពេលនេះមេឈ្មួញ ហូវ ជីវ៉ៃ និងកំពុងបន្តសកម្មភាពដឹកជញ្ជូនឈើចេញទៅវៀតណាមតាមច្រកទ្វារអន្តរជាតិអូរយ៉ាដាវ និងតាមច្រករបៀងជាច្រើនកន្លែងក្នុងស្រុកអូរយ៉ាដាវ ក៏ដូចជាច្រកព្រំដែនក្នុងឃុំញ៉ាង ស្រុកអណ្ដូងមាសចេញទាំងថ្ងៃទាំងយប់ដោយគ្មានកម្លាំងសមត្ថកិច្ចនិងមន្ត្រីជំនាញខាងណាចុះទៅចាប់បង្ក្រាបនោះទេ ព្រោះខ្លាចបែកឆ្នាំង បាយសេដ្ឋកិច្ចរបស់មេៗ ហើយមិនតែប៉ុណ្ណោះ ថែមទាំងបានធ្វើការលាក់បាំងពីការរកស៊ីឈើរបស់មេឈ្មួញ ហូវ ជីវ៉ៃ នាពេលបច្ចុប្បន្ននេះ។
ប្រជាពលរដ្ឋបានសំណូមពរដល់ថ្នាក់ដឹកនាំក្រសួងនិងស្ថាប័នពាក់ព័ន្ធមិនគួរមើលរំលងតទៅទៀតទេ ក្នុងខណៈដែលព្រៃឈើនៅខេត្តរតនគិរី កំពុងប្រឈមនឹងសេចក្ដីវិនាសសាបសូន្យនាពេលឆាប់ៗខាងមុខនេះហើយ ដោយស្នាដៃមេឈ្មួញ ហូវ ជីវ៉ៃ កំពុងសម្រុកកាប់បំផ្លាញនិងដឹកជញ្ជូនយ៉ាងគគ្រឹកគគ្រេងយកទៅលក់នៅវៀតណាមតាមច្រកទ្វារអន្តរជាតិអូរយ៉ាដាវ និងច្រករបៀងជាច្រើនទៀត ជាពិសេសលោក ថង សាវុន អភិបាលខេត្តរតនគិរី និងប្រធានមន្ទីរកសិកម្មខេត្តរតនគិរី លោក សយ សូណា ព្រមទាំងមេរដ្ឋបាលព្រៃឈើខេត្តរតនគិរី លោក កែប កត់ និងលោក ថាវ យ៉េន មេប៉េអឹមខេត្តរតនគិរី ដែលរងនូវការរិះគន់ថា កម្លាំងសមត្ថកិច្ចខេត្តនេះចាប់យកឈើបានតែអ្នកទន់ខ្យោយប៉ុណ្ណោះ ដូចជា នី កាចាញ ជាដើម តែបើមេឈ្មួញជើងខ្លាំងដូចជាលោក ហូវ ជីវ៉ៃ គឺទុកបណ្តែតបណ្ដោយឲ្យមានការប្រព្រឹត្តបទល្មើសព្រៃឈើកើតឡើងយ៉ាងរាលដាលខ្លាំងឡើងៗ ហើយបែរជានាំគ្នាសម្ងំស្ងៀមស្ងាត់មិនចាត់វិធានការទប់ស្កាត់និងបង្ក្រាបនោះឡើយ? ឬក៏ចាំដល់ពេលសម្តេចតេជោ ហ៊ុន សែន នាយករដ្ឋមន្ត្រីស្រែកនឹងសំពងក្បាលអស់លោកក្រោមកណ្តាប់ដៃដែករួចវះកាត់ចោលតាមអភិក្រមទី៥នោះ។
អង្គភាពគេហទំព័រMSKnewsយើងមិនអាចទំនាក់ទំនងជាមួយក្រុមឈ្មួញនិងក្រុមមន្ត្រីពាក់ព័ន្ធក្នុងខេត្តរតនគិរីបានទេខណៈពេលនេះយើងនឹងរង់ចាំទទួលព័ត៌មាននៅរៀងរាល់ម៉ោងធ្វើការ៕