0

ព្រៃឈើនៅតែបន្តមហន្តរាយ ដោយសារ​ក្រុមហ៊ុនធី​ង៉ា​ង អភិវឌ្ឍន៍​ ខណៈមន្ត្រី​និង​អាជ្ញា​ធរមានសត្ថកិច្ចខេត្ត​ព្រះវិហារ មិនអនុវត្តតាម​បទបញ្ជានាយករដ្ឋ​ម​ន្ត្រី​?

ខេត្ត​ព្រះវិហារ ៖ ​ក្រោយពីមានភាពស្ងប់ស្ងាត់បាន​មួយរយៈ​ក្រោមកណ្តាប់ដៃដែក​របស់ប្រមុខរាជ​រដ្ឋា​ភិបាល សម្តេចតេជោ ហ៊ុន សែន នាយករដ្ឋ​មន្ត្រី ដែលបានដាក់បទបញ្ជា ឲ្យនាយឧត្តមសេនីយ៍ សៅ សុខា ចុះបើកយុទ្ធនាការបង្ក្រាបបទល្មើសព្រៃ​ឈើ​នៅទូទាំងខេត្តក្នុងព្រះរាជាណាចក្រកម្ពុជា​រួច​មក​។​ ស្រាប់តែ​រហូតមកដល់ពេល​នេះ​ក្រុមហ៊ុន​ធីង៉ា​ង​ អភិវឌ្ឍន៍​ កំពុងធ្វើសកម្មភាព​កាប់បំផ្លាញព្រៃ​ឈើយ៉ាងកក្រើកឡើងវិញ​ទៀតហើយ​ ក្រោមលេ​សវិនិយោគ​​ដោយ​ប្រើ​រថយន្ត​យី​ឌុប​និងរថយន្ត ​បា​កុង​ ដឹក​ជញ្ជូន​អនុផល​ព្រៃឈើ​”ឈើមូល”​យ៉ាង​គគ្រឹកគគ្រេង​ចេញពីព្រៃ​ឡង់ ​ព្រៃអង្គតែនដែលស្ថិ​ត​​ក្នុងចំណុច​អូរឡង់​តំបន់​៤​និងតំបន់៥​ ​​ភូមិស្រែវាល​ ឃុំរៀបរយ​ ស្រុករវៀង​ ខេត្តព្រះវិហារ​ ហើយ​ដែលក្រុមហ៊ុននេះ​អះអាងថា មាន​ច្បាប់​​ពី​ក្រសួង​កសិកម្ម​ រុក្ខាប្រមា​ញ់​និងនេសាទ ដើម្បី​ធ្វើការ​ដាំ​ដុះ​លើ​ផ្ទៃដី​​សម្បទាន​ដីសេដ្ឋកិច្ច​ ទើប​ធ្វើការឈូស​ឆា​យ​ដីក្នុង​អនុ​តំបន់៤ និ​ង​អនុ​តំបន់​៥ ស្ថិតនៅ​ក្នុងខេ​ត្ត​​ព្រះវិហារ​ តាមរយៈលិខិត​១សន្លឹក​ ​ដែល​ពុំ​បាន​កំ​ណត់​ទំហំដី​និង​​ចំណុច​ទីតាំង​ព្រំប្រទល់​ច្បាស់​លា​ស់​នោះ​ទេ។

ប្រភព​បញ្ជាក់ថា ព្រៃឡង់​ដែលស្ថិតនៅក្នុង​ស្រុក​រវៀង​ បើ​ទោះបី​​រាជរដ្ឋាភិបាលកម្ពុជា​ ​ដែល​មាន​ស​ម្ដេច​តេជោ​ ហ៊ុន ​សែន​ នាយក​រដ្ឋមន្ត្រី ​​បាន​ដាក់​ប​ញ្ចូល​ជា​ព្រៃ​អង្គតែននោះ​ ​ក៏​បាន​នឹង​កំពុង​តែ​ទទួល​រង​ការ​កាប់​បំផ្លាញ​យ៉ាងអាណាធិបតេយ្យក្រោមស្នា​ដៃក្រុមហ៊ុន ធីង៉ាង​ យកទៅកែឆ្នៃ ដោយគ្មានការទ​ប់ស្កាត់​ពីមន្ត្រី អាជ្ញាធរ សមត្ថកិច្ច ឬស្ថាប័ន​ដែល​ពាក់ព័​​ន្ធណាមួយ​ឡើយ​​។​ ហេតុដូច្នេះ​ក្រុមហ៊ុនមួ​យនេះ បានដាក់ម៉ាស៊ីនកែច្នៃឈើដោយពឹងទៅលើដីសម្បទាន តែធាតុពិតប្រមូលកាប់ឈើពីតំបន់ព្រៃឡង់មកធ្វើអាជីវកម្មយ៉ាងរលូន ដែល​ទំនង​ជាអាង​លើមន្ទីរកសិកម្មរុក្ខាប្រម៉ាញ់និងនេសាទខេត្តជាអ្នកនៅពីក្រោយខ្នង។

ប្រភពបន្តឲ្យដឹងថា ​មេការក្រុមហ៊ុន ធីង៉ាង​ អភិវឌ្ឍ​ន៍នេះ​ ​ឈ្មោះ ស៊ុង បានរក្សាភាពស្ងៀមស្ងាត់មិនបា​នបង្ហើបពីសកម្មភាពដាំដុះ​ជាដំណាំអ្វី​ទាំងនោះឡើ​យ ហើយម៉្យាងវិញទៀត ព្រៃឡង់ ព្រៃព្រះរកា និង​ព្រៃអង់តែននេះ ក៏​មិនត្រូវបានអាជ្ញាធរពាក់ព័ន្ធជួ​យទប់ស្កាត់ទេ គឺ​កំពុងតែរងការកាប់បំផ្លាញជារៀង​រាល់ថ្ងៃ និងដឹកជញ្ជូនឈើ​ហ៊ុប​តាមរថយន្តបាកុង​ រថយន្តយីឌុប ទាំងយប់ទាំង​ថ្ងៃ​ ចូលទៅក្នុងរោងសិ​ប្បកម្មកែច្នៃ ដោយដាក់ម៉ាស៊ីនរ៉ៃ អារ ច្រៀក យ៉ា​ង​កងរំពង​ ហើយក៏​មិនរំខាន​ដល់មន្ត្រី​ អាជ្ញាធរមាន​សមត្ថកិច្ច​នោះឡើយ ជាពិសេស លោក​ ប្រាក់​ សុ​វណ្ណ អភិបាលខេត្តព្រះវិហារ ក៏គ្មានវិធានការទប់​ស្កាត់បង្ក្រាបបានដែរ បើវិធានការ​ទប់ស្កាត់របស់គា​ត់​បានត្រឹមលំៗតែប៉ុណ្ណោះ។ ​ផ្ទុយទៅវិញ​ក្រុមហ៊ុន​ធីង៉ា​ង អភិវឌ្ឍន៍ ​និង​វិនិយោគ​​​មួយនេះ ​កំពុង​ជិះ​​សេះលែងដៃ​ប្រើ​ប្រាស់​រថ​យន្ដ​បា​កុង​​ ដែល​រដ្ឋ​ត្រូវ​បាន​ហាម​​ឃាត់ក្នុងការ​ដឹក​ជញ្ជូន​​​អនុផល​ព្រៃឈើ “​ឈើមូល”​ ប៉ុន្តែ​បែរជា​នៅក្នុង​ទឹកដីខេ​ត្តព្រះវិហារ​គេឃើញ​រថយន្តបាកុង​ដឹកជញ្ជូនឈើ​បានយ៉ាង​រលូ​ន​ដោយគ្មានខ្លាចអ្វីទាំងអ​ស់។​

គួររំឭកថា កន្លងមកនាយឧត្តមសេនីយ៍ ​សៅ សុខា​ អគ្គមេបញ្ជារងនៃកងយោធពលខេរភូមិន្ទ​ មេបញ្ជា​ ការកងរាជវុធហត្ថលើផ្ទៃប្រទេសនិងជាប្រធាន​គ​ណៈកម្មការជាតិ​ដើម្បីបង្កាទប់ស្កាត់​​​និង​បង្ក្រាបបទ​ល្មើស ធនធាន​ធម្មជាតិ ​ បាន​បើក​ប្រតិបត្តិការទ្រង់​ទ្រាយធំ​ចុះ​បង្ក្រាប​ រឹបអូសយកមធ្យោបាយ​ យក​ម​ក​ដុត​បំផ្លាញ​ចោល​ជា​បន្ដបន្ទាប់​ផងដែរ​ មិនតែប៉ុ​ណ្ណោះ​ក៏បានចាប់ឃាត់ខ្លួនជនល្មើស មេឈ្មួញ និង​ឧកញ៉ា​មួយចំនួន​យកទៅដាក់គុកទៀតផង។​

មជ្ឍដ្ឋានប្រជាពលរដ្ឋទូទៅនៅតែ​ចង់​ឃើញដាវអា​ជ្ញា​សឹកដ៏មុតស្រួច​របស់នាយឧត្តមសេនីយ៍ សៅ សុ​ខា ក្នុងយុទ្ធនាការ​ទប់ស្កាត់​បង្ក្រាប​បទល្មើស​ព្រៃ​ឈើ​ឲ្យដូចភ្លៀងរលឹម​តាមអនុសាសន៍​ថ្លៃថ្លារបស់​សម្តេចអគ្គមហាសេនាបតីតេជោ ហ៊ុន សែន នាយ​ករដ្ឋមន្ត្រីនៃព្រះរាជាណាចក្រកម្ពុជា ដែលប្រជាព​លរដ្ឋគោរព ស្រឡាញ់ ខណៈដែលសម្តេច​ លោក​ខិ​តខំប្រឹងប្រែងខ្លាំងណាស់​ តែបែរជាមន្ត្រីថ្នាក់ក្រោម​មួយចំនួន​មិនយកចិត្តទុកដាក់​អនុវត្តន៍​តាមបទញ្ជា​របស់​សម្តេច ទើប​ធ្វើឲ្យ​មានបទល្មើសកើតឡើង​ដ​ដែលៗ​ ចំណែកធនធានធម្មជាតិ​ព្រៃឈើ​នៅតែបន្ត​មហន្តរាយ​ដោយការកាប់បំផ្លាញ​ពីសំណាក់​ឈ្មួញ​និងក្រុមហ៊ុន​ដែលធ្វើការវិនិយោគមិនច្បាស់លាស់​។​

ជុំវិញករណីក្រុមហ៊ុន ធីង៉ាង អភិវឌ្ឍន៍​ ដែល​កំពុងធ្វើ​សកម្មភាព​ដូចខាងលើនេះ អង្គភាពគេហទំព័រ​ MSKnews យើងបានព្យាយាម​ធ្វើការទំនាក់ទំនងរកការ​បំភ្លឺ​ពីខាងភាគីក្រុមហ៊ុន​ផងដែរ​ តែមិនបានសម្រេច​កាលពីម្សិលមិញនេះ និងពុំមានអ្នក​ដឹងលេ​ខទូរស័ព្ទ​ អង្គភាពយើង​រង់ចាំទទួល​និង​រួមកិច្ច​សហការ​ជានិច្ចរៀងរាល់ម៉ោងធ្វើការ​៕​

Filed in: ព័ត៌មានជាតិ, រាយការណ៍សំខាន់ៗ

Leave a Reply

Submit Comment

ការិយាល័យនិពន្ធ កាសែត មហាសេនាខ្មែរ | ទូរស័ព្ទ៖ Tel: 012 916 569, 088 89 165 69, 069 32 1006

អ៊ីម៉ែល៖ mohasenakhmer@gmail.com | Website: www.msknews.net

សហការផ្តល់ព័ត៌មាន៖ 097 6125757 | អ៊ីម៉ែល៖ mohasenakhmer@gmail.com