ខេត្តស្វាយរៀង៖ កាលពីថ្ងៃទី២១ ខែកុម្ភៈ ឆ្នាំ២០២០ ក្រុមការងារចម្រុះចុះមកធ្វើការវាស់វែងទំហំដីផ្សារក្រោលគោ ស្ថិតនៅភូមិព្រៃញ៉យ ឃុំក្រោលគោ ស្រុកស្វាយជ្រុំ ខេត្តស្វាយរៀង ដោយមានការអញ្ជើញចូលរួម៖ លោក ចិន សាធាន នាយករដ្ឋបាលសាលាខេត្តស្វាយរៀង,លោក គឹម ពិសិដ្ឋ ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដី ខេត្តស្វាយរៀង,លោក ហែម សារិទ្ធ អភិបាលស្រុកស្វាយជ្រុំ ,លោក អុីង បូរ៉ា នាយកទីចាត់ការអន្តរវិស័យសាលាខេត្ត,លោក មាស សេដ្ឋា នា យកទីចាត់ការហិរញ្ញវត្ថុសាលាខេត្ត, មន្ត្រីជំនាញ, មេធាវី,លោកមេឃុំ, សមាជិកនៃក្រុមប្រឹក្សា និងលោក សា លាង ព្រមទាំងប្រជាពលរដ្ឋជាច្រើនកុះករផងដែរ។
គួរកត់សំគាល់ថា នេះជាលើកទី២ហើយដែលក្រុមការងារបានចុះមកវាស់វែងនៅទីតាំងដីផ្សារក្រោលគោ ក្រោយពីមានបណ្តឹងរបស់លោក ភោគ វណ្ណថន មេឃុំក្រោលគោ ដែលទើបឡើងកាន់តំណែងក្នុងអាណត្តិនីតិកាលទី៦នេះ។ ប៉ុន្តែប្រជាពលរដ្ឋនៅតែអះអាងថា ទោះបីជាមានការវាស់វែងប៉ុន្មានលើកទៀតក៏ដីផ្សារនៅតែជាដីផ្សារ ចំណែកដីកម្មសិទ្ធិរបស់ប្រជាពលរដ្ឋក៏នៅតែជាដីរបស់ពួកគាត់ដដែលៗទេ ព្រោះដីពួកគាត់(ប្រជាពលរដ្ឋ) មិនពាក់ព័ន្ធជាមួយនឹងដីផ្សារនោះឡើយ បើតាមការលើកឡើងរបស់ប្រជាពលរដ្ឋបានឲ្យដឹងថា ពួកគាត់ម្នាក់ៗសុទ្ធតែជាអ្នករស់នៅកាន់កាប់និងអាស្រ័យផលលើដីរបស់ខ្លួនអស់រយ:ពេលជាច្រើនឆ្នាំមកហើយ រហូតមកទល់នឹងពេលនេះ អ្នកខ្លះរស់នៅជាង៣៣ឆ្នាំ ខ្លះទៀតក៏ជាង២៥ឆ្នាំឡើង ហើយក៏មានប័ណ្ណកម្មសិទ្ធិស្របច្បាប់(ប្លង់ស្លាបមាន់) គឺនៅតែមានសុពលភាពជាដរាប។
យោងតាម ស.ជ.ណ លេខ ៤០៨ របស់ក្រសួងមហាផ្ទៃ ចុះថ្ងៃទី០៧ ខែកុម្ភៈ ឆ្នាំ២០២០ ជម្រាបជូនឯកឧត្តមអភិបាលនៃគណៈអភិបាលខេត្តស្វាយរៀងស្តីអំពីករណីបណ្តឹងរបស់ឈ្មោះ សា លាង ភេទប្រុស អាយុ៥៧ឆ្នាំ និងប្រពន្ធឈ្មោះ ហេង គឹមហឿន អាយុ៥២ឆ្នាំ មានទីលំនៅភូមិ២ សង្កាត់កំពង់លាវ ក្រុងព្រៃវែង ខេត្តព្រៃវែង ប្តឹងលោក ភោគ វណ្ណថន មេឃុំក្រោលគោ ស្រុកស្វាយជ្រំ ខេត្តស្វាយរៀង លើករណីមិនចុះហត្ថលេខាតាមពាក្យស្នើសុំបំពេញបន្ថែមដែលឈ្មោះ សា លាង និងប្រពន្ធឈ្មោះ ហេង គឹមហឿន បានកាន់កាប់និងអាស្រ័យផលរយៈពេលជាង២០ឆ្នាំមកហើយ។
ក្នុងខ្លឹមសារពាក្យបណ្តឹងចុះថ្ងៃទី០៧ ខែតុលា ឆ្នាំ២០១៩ របស់ឈ្មោះ សា លាង និងប្រពន្ធឈ្មោះ ហេង គឹមហឿន ដោយបានដាក់ជូនទៅក្រសួងមហាផ្ទៃដើម្បីពិនិត្យឲ្យបានត្រឹមត្រូវពិតប្រាកដនឹងសម្រេចដោះស្រាយតាមរបាយការណ៍លទ្ធផលក្រុមការងារចុះវាស់វែងទីតាំងដីរបស់លោក សា លាង ស្នើសុំចុះបញ្ជីដីធ្លីបំពេញបន្ថែម ដើម្បីចេញប័ណ្ណកម្មសិទ្ធិស្ថិតនៅភូមិព្រៃញ៉យ ឃុំក្រោលគោ ស្រុកស្វាយជ្រំ នៅថ្ងៃទី៤ ខែមីនា ឆ្នាំ២០១៩ បានបញ្ជាក់ថាទីតាំងដីរបស់លោក សា លាង គឺមានចំនួន០២ប្លង់ជាប់គ្នា ដែលប្លង់ទី១:ប័ណ្ណសំគាល់សិទ្ធិកាន់កាប់ប្រើប្រាស់ដីធ្លីលេខ:Bg0354 ចុះថ្ងៃទី០១ ខែមេសា ឆ្នាំ១៩៩៣ ទំហំ០១អា ៩៥សង់ទីអា ដោយមានព្រំប្រទល់:ខាងជើងទល់នឹងដីផ្សារ,ខាងត្បូងទល់នឹងផ្លូវជាតិលេខ១,ខាងកើតទល់នឹងដីផ្សារ,ខាងលិចទល់នឹងដីផ្សារ និងប្លង់ទី២:ប័ណ្ណសំគាល់សិទ្ធិកាន់កាប់អចលនវត្ថុលេខ:សវ000746 ចុះថ្ងៃទី២៨ ខែតុលា ឆ្នាំ១៩៩៧ ទំហំ៨១សង់ទីអា ដែលមានព្រំប្រទល់:ខាងជើងទល់នឹងផ្លូវច្រក,ខាងត្បូងទល់នឹងផ្លូវជាតិលេខ១,ខាងកើតទល់នឹងសា លាង,ខាងលិចទល់នឹងផ្លូវច្រក។
ក្នុងនោះផងដែរប្រជាពលរដ្ឋជាច្រើននាក់ ក៏បានទទួលស្កាល់ នឹងដឹងឮគ្រប់គ្នាថា ទីតាំដីរបស់លោក សា លាង គឺពិតជាដីរបស់គាត់ប្រាកដមែនតាំងពីមុនគាត់បើកការ៉ាស់សាំងក្នុងអំឡុងទស្សវត្សន៍ជាង៨០មកម៉្លេះ ហើយទីតាំងផ្សារក្រោលគោចាស់នៅខាងក្រោយដីលោក សា លាង ដែលទើបកកើតក្រោយនេះទេ មានតូបលក់តិចតួចតែប៉ុណ្ណោះ ហើយផ្ទះប្រជាពលរដ្ឋក៏កើតមុនផ្សារផងដែរ ដោយបានរស់នៅកាន់កាប់និងអាស្រ័យផលជារៀងរហូតមកមានការទទួលស្កាល់ពីអាជ្ញាធរមូលដ្ឋាននឹងប្លង់កម្មសិទ្ធិស្របច្បាប់ត្រឹមត្រូវ ពុំដែលមានបញ្ហាអ្វីជាមួយលោកមេឃុំមុនៗដែលជាអាណាព្យាបាលនោះឡើយ។
ស្រាប់តែឥឡូវនេះ មេឃុំក្រោលគោ( ថ្មី )លោក ភោគ វណ្ណថន បែរជាប្តឹងប្រជាពលរដ្ឋរឿងដីផ្សារក្រោលគោនេះទៅតុលាការដោយមិនទទួលស្គាល់ប័ណ្ណកម្មសិទ្ធិចាស់(ប្លង់ស្លាបមាន់)ធ្វើឲ្យប្រជាពលរដ្ឋមានការព្រួយបារម្ភចំពោះបណ្តឹងលោកមេឃុំនិងចំណាត់ការរបស់តុលាការ បើសិនជាតុលាការឯករាជគឺពិតជាផ្តល់ភាពយុត្តិធម៌ដល់ប្រជាពលរដ្ឋ។ដូច្នេះហើយបងប្អូនប្រជាពលរដ្ឋសង្ឃឹមជឿជាក់ថាតុលាការនឹងរកយុត្តិធម៌ឲ្យប្រពលរដ្ឋ ហើយក៏ដូចជាការស្នើសុំអង្វករយ៉ាងទទូចដល់ថ្នាក់ដឹកនាំ ប្រមុខរាជរដ្ឋាភិបាល សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី មេត្តាជួយដល់ពួកគាត់ជាប្រជាពលរដ្ឋ ដែលជាកូនចៅបានរស់នៅនឹងអាស្រ័យផលជាបន្តទៀតរហូតជីវិតចុងក្រោយ ព្រោះពួកគាត់ខ្លះមានវ័យចំណាស់អាយុជាង៨០ឆ្នាំទៅហើយ។
ជុំវិញរឿងរ៉ាវភាពមិនប្រក្រតីចំពោះការផ្តល់សេវាសាធារណៈរបស់លោក ភោគ វណ្ណថន មេឃុំក្រោលគោ ស្រុកស្វាយជ្រំ ខេត្តស្វាយរៀង កំពុងទទួលរងនូវការព្រមានយ៉ាងចាស់ដៃពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នឹងចាត់វិធានការចំពោះមេឃុំ ស្មៀនឃុំណាដែលធ្វើអំពើផ្តេសផ្តាសហ៊ានទារលុយពីប្រជាពលរដ្ឋបន្ថែមពេលពឹងពាក់ធ្វើឯកសារផ្សេងៗ គឺត្រូវស្នើដកតំណែងចោលព្រោះមិនបានបម្រើប្រជាពលរដ្ឋដោយភាពស្មោះត្រង់ដែលធ្វើសកម្មភាពមិនល្អ សម្តេច ស ខេង បញ្ជាក់ថាមេឃុំ ស្មៀនឃុំគឺជាមន្ត្រីមុខងារសាធារណៈ ដូច្នេះក្រសួងមហាផ្ទៃជាអ្នកដោះដូរបាននិងជាអ្នកតែងតាំង មិនមែនជាស្រុក ឬខេត្តជាអ្នកតែងតាំងនោះទេ។
សូមបញ្ជាក់ផងដែរថា កន្លងមកក្រុមការងារថ្នាក់ខេត្តចុះសិក្សាទីតាំងដីនេះរួចរាល់អស់ហើយ តែពុំទាន់មានវិធានការបន្តនៅឡើយ ដូច្នេះក្រសួងមហាផ្ទៃសូមស្នើឯកឧត្តមអភិបាលនៃគណៈអភិបាលខេត្តស្វាយរៀងសុំឲ្យពិនិត្យឡើងវិញនឹងជម្រុញដោះស្រាយករណីខាងលើនេះ ស្របតាមច្បាប់និងលិខិតបទដ្ឋានជាធរមាន។
ប្រជាពលរដ្ឋក៏សូមជម្រាបបន្ថែមទៀតថា ក្រោយពីក្រុមការងារចម្រុះដែលបានចុះមកវាស់វែងដីនៅផ្សារក្រោលគោជាលើកទី២កាលពីពេលថ្មីៗនេះ ក៏ពុំទាន់បានដឹងពីលទ្ធផលសម្រេចនៅឡើយទេ ប៉ុន្តែលោក ភោគ វណ្ណថន មេឃុំក្រោលគោលបាននិយាយថា រឿងនេះស្ថិតនៅលើតុលាការជាអ្នកសម្រេចក្តី។ ស្រាប់តែរំលងបានពីរបីថ្ងៃមកនេះ មានករណីលួចដុតខ្ទមនិងតូបចាស់ៗដែលនៅជាប់នឹងដីរបស់លោក សា លាង ពីខាងក្រោយក្បែរផ្សារ បណ្តាលឲ្យឆេះអស់គ្មានសល់ដោយពុំបានដឹងពីមូលហេតុអ្វីនោះឡើយ៕