688 
ខេត្តព្រះសីហនុ៖ ប្រមុខរាជរដ្ឋាភិបាលសម្តេចតេជោ ហ៊ុន សែន នាយករដ្ឋមន្ត្រីបានប្រកាសដាក់បទបញ្ជាដ៏តឹងរ៉ឹងស្នើឲ្យលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ឲ្យរួសរាន់យ៉ាងឆាប់បំផុត គឺត្រូវតែដោះស្រាយបញ្ចប់បញ្ហាទំនាស់ដីធ្លីជាបន្ទាន់នៅទូទាំងខេត្តព្រះសីហនុ ដែលកំពុងជាប់គាំងនៅស្ទើរតែ គ្រប់ទីកន្លែងទាំងអស់ ហើយមិនព្រមដោះស្រាយឲ្យបានទាន់ពេលវេលានោះទេ ។ ជាក់ស្តែងដីការបញ្ជូនរបស់នាយកខុទ្ទកាល័យសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ដែលបានគោរពជូនទៅលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយ កម្ម និងសំណង់ រហូតមកដល់ពេលនេះបានអូសបន្លាយពេលជាងមួយឆ្នាំហើយគឺនៅតែមិនទាន់ដោះស្រាយបញ្ចប់ទៀត ខណៈដែលសម្តេចតេជោ ហ៊ុន សែន នាយករដ្ឋមន្ត្រីបានជ្រាបច្បាស់អំពីរឿងនេះហើយ ទើបធ្វើការព្រមានដកតំណែងចៅហ្វាយខេត្ត និងបានប្រកាសដាក់បទបញ្ជាឲ្យលោក ជា សុផារ៉ា ត្រូវតែដោះស្រាយបញ្ចប់ករណីទំនាស់ដីធ្លីនេះជាបន្ទាន់ ។
តំណាងប្រជាពលរដ្ឋបានអះអាងថា ពួកគាត់បានរស់នៅកាន់កាប់តាំងពីឆ្នាំ១៩៩០មកម្ល៉េះ ហើយស្រាប់តែដល់ឆ្នាំ២០០៧ អាជ្ញាធរខេត្តព្រះសីហនុ ដឹកនាំដោយលោក សាយ ហាក់ អតីតអភិបាលខេត្តព្រះសីហនុបាននាំកម្លាំងចម្រុះមកដេញ ប្រជាពលរដ្ឋឲ្យចាកចេញដោយបង្ខំឲ្យរុះរើសំណង់លំនៅដ្ឋាន និងដុតបំផ្លាញផ្ទះសម្បែងឈូសឆាយកម្ទេចចោលនូវដំណាំរបស់ប្រជាពលរដ្ឋដែលជាម្ចាស់ដីពិតប្រាកដទៅវិញ ទើបប្រជាពលរដ្ឋសម្រេចចិត្តដាក់ពាក្យបណ្តឹងទៅអាជ្ញាធរមានសមត្ថកិច្ចខេត្ត ព្រះសីហនុ តែពុំមានចំណាត់ការអ្វីបន្តិចសោះ ហើយក៏បានអូសបន្លាយពេលពីមួយខែទៅមួយខែ ពីមួយឆ្នាំទៅមួយឆ្នាំទុកឲ្យប្រជាពលរដ្ឋរងទុក្ខវេទនាទឹកភ្នែករ៉ាំរ៉ៃរហូតមកដល់សព្វថ្ងៃនេះ ។
សូមបញ្ជាក់ថា លោក ហូ សិទ្ធី នាយកខុទ្ទកា ល័យសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានចេញដីកាបញ្ជូនលេខ ១០៦០ ខ.ន/០១៧ ចុះថ្ងៃទី ០៥ ខែកក្កដា ឆ្នាំ២០១៧ ដោយគោរព ជូនលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ជាសមត្ថកិច្ចជូនលោករដ្ឋមន្ត្រី មេត្តាពិនិត្យលើលិខិតចុះថ្ងៃទី៣០ ខែមិថុនា ឆ្នាំ២០១៧ របស់ឈ្មោះ គង់ សាវុធ, សឿង សាង, យៀង រ៉េន និងឈ្មោះមឿន កង ជាតំណាងប្រជាពលរដ្ឋចំនួន ៤៩គ្រួសារ នៅភូមិ០៦ (អតីតស្ពានឆេះ)សង្កាត់លេខ ៤ ក្រុងព្រះសីហនុ ខេត្តព្រះសីហ នុដោយបានស្នើសុំឲ្យជួយដោះស្រាយដីលំនៅដ្ឋានទំហំ ៥៤.២០៤ម៉ែត្រក្រឡា និងដីស្រែទំហំ ៤០១.៦០០ម៉ែត្រក្រឡា ដែលបានកាន់កាប់និងអាស្រ័យផលតាំងពីឆ្នាំ១៩៩០ រហូតមកដល់បច្ចុប្បន្នហើយបែរជាមានភាពមិនប្រក្រតីដោយសារតែមានវិញ្ញាបនប័ត្រសម្គាល់ អចលនវត្ថុឈ្មោះ ស៊ីវ គង់ទ្រីវ និងឈ្មោះ ហុង ស៊ួន នៅឆ្នាំ២០១១ នេះទៅវិញ ។
គួររំឭកថា ភាពមិនប្រក្រតីក្នុងការចេញប័ណ្ណសម្គាល់សិទ្ធិទាំង១៩ប័ណ្ណនិងវិញ្ញាបនប័ត្រសម្គាល់ម្ចាស់អចលនវត្ថុនេះ គឺនៅក្នុងដំណាក់ការគ្រប់គ្រងរបស់លោក សូ សុខ ធ្វើជាប្រធានមន្ទីររៀបចំដែនដីនគរូបនីយកម្មសំណង់ និងសុរិយោដី ខេត្តព្រះសីហនុ ដោយសារតែមានការឃុបឃិតគ្នាជាប្រព័ន្ធរវាងមន្ត្រីសុរិយោដីជាមួយអ្នកមានលុយមានអំណាច ដែលលួច ចេញប័ណ្ណដោយមិនឲ្យប្រជាពលរដ្ឋរស់នៅលើដីនេះតាំងពីឆ្នាំ១៩៩០ បានដឹងទាល់តែសោះដូចនេះដើម្បីផ្តល់ភាពយុត្តិធម៌ដល់ប្រជាពលរដ្ឋទាំង៤៩គ្រួសារ (ពួកគាត់)សង្ឃឹមជឿជាក់ទៅលើបទបញ្ជាសម្តេចតេជោ ហ៊ុន សែន ដែលបានស្នើឲ្យលោករដ្ឋមន្ត្រី ជា សុផារ៉ា ត្រូវតែដោះស្រាយបញ្ចប់បញ្ហាទំនាស់ដីធ្លីនៅខេត្តព្រះសីហនុនេះ ឲ្យបានឆាប់ៗនៅពេលខាងមុខនេះ ។
ដោយឡែកប្រភពបែកធ្លាយនៅក្នុងក្រសួង រៀបចំដែនដីនគរូបនីយកម្ម និងសំណង់កាល ពីអំឡុងឆ្នាំ២០១៧ លោកឧបនាយករដ្ឋមន្ត្រី ជា សុផារ៉ា បានមានចំណាត់ការឲ្យមន្ត្រីជំនាញចុះពិនិត្យស្រាវជ្រាវនៅទីតាំងដីមានទំនាស់រវាង ប្រជាពលរដ្ឋ និងលោកឧកញ៉ា ស៊ី គង់ទ្រីវ ប៉ុន្តែបែរជាមន្ត្រីជំនាញពុំបានចុះទៅពិនិត្យនៅចំណុចភូមិ០៦ (អតីតស្ពានឆេះ) សង្កាត់លេខ ៤ ក្រុងព្រះសីហនុ ខេត្តព្រះសីហនុ នោះទេ ដែលរហូតមកដល់ពេលនេះជាងមួយឆ្នាំហើយ ក្រោយពីដីកាបញ្ជូនពីខុទ្ទកាល័យសម្តេចតេជោ នាយករដ្ឋមន្ត្រីធ្វើឲ្យប្រជាពលរដ្ឋម្ចាស់បណ្តឹងលើកគ្នាមកតវ៉ាដល់ក្រសួងជាថ្មីទៀត នាពេលកន្លងមកនេះ ហើយត្រូវបានមន្ត្រីរដ្ឋបាលផ្នែកទទួលពាក្យបណ្តឹងឆ្លើយថា មិនទាន់មានមន្ត្រីចុះទៅទេ ព្រោះនៅជាប់ចុះទៅខេត្តផ្សេងៗទៀត ចំណែកមន្ត្រីមួយចំនួនទៀតទំនងជាបានដឹងច្បាស់ហើយថាពិតជាមានការលាក់លៀមជាមួយមេៗថ្នាក់លើ ទើបផ្តល់ឱកាសឲ្យអាជ្ញាធរខេត្តព្រះសីហនុ កំពុងមានវិធានការរៀបចំដីដោះដូរ ធ្វើជាថ្នូរវិញ ដែលប្រជាពលរដ្ឋមិនអាចទទួលយកបានទេ ព្រោះដីនៅកន្លែងដែលមានទំនាស់នោះ គឺជាដីរបស់ពួកគាត់រស់នៅយូរហើយ ។
ប្រជាពលរដ្ឋបានឲ្យដឹងថា អាជ្ញាធរខេត្តព្រះសីហនុបានបញ្ជាកម្លាំងឲ្យមកដេញប្រជាពលរដ្ឋទាំង៤៩គ្រួសារជាថ្មីម្តងទៀត កាលពីថ្ងៃទី ០៧ ខែមេសា ឆ្នាំ២០១៧ ដោយបានគម្រាមកំហែងប្រជាពលរដ្ឋមិនឲ្យតវ៉ា និងបានចាប់ខ្លួនដាក់គុកថែមទៀតផងព្រោះតែពួកមន្ត្រីពុករលួយទាំងនោះសំអាងលើវិញ្ញាបនប័ត្រសម្គាល់អចលនវត្ថុដែលម្ចាស់ប័ណ្ណនោះមានឈ្មោះ ស៊ី គង់ទ្រីវ និងឈ្មោះ ហុង ស៊ួន មានដីរហូតដល់ទៅ១០៦ហិកតាជាន់លើដីប្រជាពលរដ្ឋរស់នៅតាំងពីឆ្នាំ១៩៩០ជាប់លាប់រហូតមកមិនដែលឃើញមន្ត្រីសុរិយោដីចុះមកវាស់វែងពីពេលណានោះទេ ហើយក៏មិនដែលឃើញបិទប្រកាសផ្សាយជាសាធារណៈនោះដែរ ស្រាប់តែមានប័ណ្ណសម្គាល់ សិទ្ធិ១៩ប័ណ្ណ និងមានវិញ្ញាបនប័ត្រសម្គាល់ម្ចាស់អចលនវត្ថុទៀតនៅឆ្នាំ២០១១នេះទៅវិញ ។
យោងតាមប្រសាសន៍ដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី ប្រកាសជាសាធារណៈស្នើឲ្យលោកឧបនាយករដ្ឋមន្ត្រី ជា សុផារ៉ា គឺត្រូវតែដោះស្រាយបញ្ចប់ជាបន្ទាន់លើករណីទំនាស់ដីធ្លីរវាងឧកញ៉ា ស៊ី គង់ទ្រីវ ជាមួយនឹង ប្រជាពលរដ្ឋ៤៩គ្រួសារ បើទោះបីបញ្ហាវិវាទនោះយូរឆ្នាំក៏ដោយ ក៏ក្រសួងត្រូវតែគាស់រំលើងយកមកដោះស្រាយឲ្យខាងតែបាន ព្រោះជាការថ្នាំងថ្នាក់ដ៏ធំមួយដែលអាចជាការខឹងគោទៅវាយរទេះ នេះហើយក៏ជាជម្រើសរបស់រដ្ឋមន្ត្រី ដែលប្រឈមមុខទៅនឹងការដកហូតតំណែង និងមិនអាចឲ្យមានឈ្មោះធ្វើជារដ្ឋមន្ត្រីតទៅទៀតបាននោះទេ ។
ទន្ទឹមនឹងនេះផងដែរ ដើម្បីផ្តល់ភាពយុត្តិធម៌ចំពោះរឿងរ៉ាវទំនាស់ដីធ្លីរវាងលោកឧកញ៉ា ស៊ី គង់ទ្រីវ ជាមួយប្រជាពលរដ្ឋម្ចាស់ដីទាំង៤៩គ្រួសារ ដែលបានប្តឹងស្នើសុំឲ្យមន្ត្រីជំនាញក្រោមឱវាទទាំងអស់ត្រូវបង្ហាញពីភាពស្មោះត្រង់យកចិត្តទុកដាក់ឲ្យបានគ្រប់ជ្រុងជ្រោយ សូមមេត្តាជួយផ្តល់ព័ត៌មានពិតៗ ជៀសវាងការមួលបង្កាច់លាបពណ៌ គឺលុះត្រាតែមន្ត្រីក្រោម ឱវាទខិតខំធ្វើការងារឲ្យបានល្អជូនដល់ថ្នាក់ដឹកនាំក្រសួងសាមុី លោកឧបនាយករដ្ឋមន្ត្រី ជា សុផារ៉ា ដើម្បីងាយស្រួលដោះស្រាយបញ្ចប់ករណីទំនាស់ដីធ្លីខាងលើនេះ ឲ្យបានជោគជ័យជាស្ថាពរ ហើយជាពិសេសរឿងរ៉ាវដែលបង្កឲ្យ មានទំនាស់ដីធ្លី កើតចេញពីភាពមិនប្រក្រតីរបស់អាជ្ញាធរខេត្តព្រះសីហនុនិងមន្ត្រីជំនាញដែលនៅពេលដ៏ខ្លីនេះ លោក ជា សុផារ៉ា ឧបនា យករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ច្បាស់ជាមិនទុកមុខមាត់ឲ្យអស់លោកឃុបឃឹតគ្នាប្រព្រឹត្តអំពើពុករលួយតទៅទៀតនោះទេ គឺត្រូវតែធ្វើការវះកាត់ដំប៉ៅ មហារីករបស់មន្ត្រីពុករលួយទាំងអស់នោះហើយ ។
ដូចនេះប្រជាពលរដ្ឋ មានក្តីសង្ឃឹមជឿជាក់និងបានទទួលភាពកក់ក្តៅបំផុតចំពោះយន្តការរបស់រាជរដ្ខាភិបាលសម្តេចតេជោហ៊ុន សែន ដែលបានបញ្ជាឲ្យចៅហ្វាយខេត្តព្រះសីហនុ លោកយន្ត មីន ដែលកំពុងមានផែនការជាបន្តបន្ទាប់ ដោយសារតែដីឡើងថ្លៃក៏ត្រូវបានបណ្តេញប្រជាពលរដ្ឋចេញពីលំនៅដ្ឋានរបស់ពួកគាត់គឺដើម្បីយកដីលក់ ទៅឲ្យក្រុមហ៊ុនចិន។ ហេតុដូច្នេះហើយទើបមានផែនការថ្មីៗបន្ថែមទៀត ស្របពេលដែលអាជ្ញាធរជាមួយនឹងមន្ត្រីជំនាញ នៅក្នុងខេត្តព្រះសីហនុឃុបឃឹតគ្នាជាមួយលោកឧកញ៉ា ស៊ី គង់ទ្រីវ ធ្វើបាបប្រជាពលរដ្ឋទាំង៤៩គ្រួសារនោះគឺកាន់តែច្បាស់ណាស់ហើយថា អាជ្ញាធរខេត្តព្រះសីហនុនិងមន្ត្រីជំនាញ ពិតជា” ទន្សោងគោព្រៃធំស៊ីតាមធំតូចស៊ីតាមតូច” មែនប៉ុន្តែក៏កំពុងជាប់ឆ្អឹងទទឹងកហើយអស់លោកព្រោះករណីដែលឧកញ៉ា ស៊ី គង់ទ្រីវ រំលោភយកដីធ្លីរបស់ប្រជាពលរដ្ឋទាំង៤៩គ្រួសារនោះគឺស្ថិតនៅលើកណ្តាប់ដៃដែករបស់សម្តេចតេជោហ៊ុន សែន តែប៉ុណ្ណោះ ពីព្រោះគ្រាន់តែដីកាបញ្ជូនរបស់លោកហូ សិទ្ធីរហូតមកទល់នឹងពេលនេះហើយនៅមិនទាន់មានចំណាត់ការឲ្យមន្ត្រីចុះទៅពិនិត្យដោះស្រាយ ជូនដល់ប្រជពលរដ្ឋម្ចាស់ដីពិតប្រាកដនៅឡើយ ហើយថែមទាំងផ្អឹបសំណុំរឿងដែលអាជ្ញាធរនិងមន្ត្រីជាប់ពាក់ព័ន្ធជាមួយឧកញ៉ា ស៊ី គង់ទ្រីវ និងក្រុមហ៊ុនចិននោះ ដោយមិនចាត់ការតាមផ្លូវច្បាប់ ខណៈពេលនេះសម្តេចតេជោហ៊ុន សែន បានស្នើឲ្យលោកជា សុផារ៉ា និងលោកយន្ត មីន ត្រូវតែពិនិត្យស្រាវជ្រាវរកឃើញច្បាស់ថា ពិតជាដីរបស់ប្រជាពលរដ្ឋមែននោះគឺត្រូវតែដោះស្រាយប្រគល់ដីឲ្យប្រជាពលរដ្ឋម្ចាស់ដីដោយស្របច្បាប់ឡើងវិញ ៕
