0

ត្រង់ណាទៅហៅថាប្រទេសមានច្បាប់គ្រួសារមានវិន័យធ្វើកាងារនិងរកស៊ីត្រូវចេះគោរពច្បាប់ ចុះកាស៊ីណូភូមិយើងអន្លុងជ្រៃ ហេតុអ្វីបើកដៃឲ្យពលរដ្ឋខ្មែរចូលលេង តើអ្នកធំណាកាងពីក្រោយខ្នង….?

ខេត្តត្បូងឃ្មុំ៖ តាមច្បាប់កាស៊ីណូគឺអនុញ្ញាតឲ្យតែជនបរទេសទេទើបអាចចូលលេងបាន ហើយដែលគ្រប់គ្រងដោយក្រសួងសេដ្ឋកិច្ចនិងហិរញ្ញវត្ថុ ដើម្បីយកពន្ធប្រមូលថវិកាចូលរដ្ឋ ប៉ុន្តែអាជ្ញាធរនិងមន្ត្រីពាក់ព័ន្ធមួយចំនួននៅមិនទាន់អនុវត្តន៍បាននៅឡើយ មិនតែប៉ុណ្ណោះបានបណ្ដែតបណ្ដោយឲ្យប្រជាពលរដ្ឋខ្មែរចូលលេងល្បែងក្នុងកាស៊ីណូបានដោយសេរី ជាក់ស្តែងគឺទីតាំងកាស៊ីណូ”ភូមិយើង” អន្លុងជ្រៃនេះតែម្តង ហាក់ដូចជាកំពុងផ្គើននឹងបទបញ្ជារបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាទៅវិញ។

សេចក្តីរាយការណ៍បានឲ្យដឹងថា កាស៊ីណូ​ភូមិយើងមួយ​នេះ បាន​បើក​យ៉ាង​ចំហរ​ឲ្យប្រជាពលរដ្ឋ​ខ្មែរ​ចូល​ទៅ​លេង​យ៉ាងសប្បាយ​ កំពុងប្រឆាំង​យ៉ាង​ខ្លាំងក្លា​ទៅនឹងអនុសាសន៍​របស់​សម្តេច​តេជោ ហ៊ុន សែន បានដាក់ចេញនូវវិធានការយ៉ាងហ្មឺងម៉ាត់គឺតម្រូវឲ្យម្ចាស់​កាស៊ីណូធ្វើការ​រារាំង​មិនឲ្យប្រជា​ពលរដ្ឋ​ខ្មែរ​ចូល​ទៅ​លេង​ល្បែងក្នុងនោះទេ ដើម្បីលើកកម្ពស់ដល់គោលនយោបាយកាត់បន្ថយភាពក្រីក្ររបស់ប្រជាពលរដ្ឋ។

ទោះយ៉ាងណាក៏ដោយ ប្រសិន​បើ​កាស៊ីណូ​ភូមិយើង​មាន​ច្បាប់ទម្លាប់​ត្រឹមត្រូវក៏ដោយ​ហើយ​ការបើកចំហរឲ្យប្រជាពលរដ្ឋ​ខ្មែរ​ចូល​ទៅលេង​នោះ​ គឺជា​សកម្មភាព​មួយដែលកំពុងប្រព្រឹត្តផ្ទុយពីច្បាប់ ព្រោះតែបានអនុញ្ញាតឲ្យជនជាតិខ្មែរចូលលេង​ទាំងខុសច្បាប់នេះ ដើម្បីបន្លំភ្នែកថ្នាក់លើ គឹមានរយៈពេលជិត ៥ខែមកហើយនៅកាស៊ីណូភូមិយើងដែលមានទីតាំងស្ថិតក្នុងភូមិអន្លង់ជ្រៃ ឃុំកក់ ស្រុកពញាក្រែក ខេត្តត្បូងឃ្មុំ។

សូមបញ្ជាក់ថា ច្បាប់​ស្តីពី​ការ​បង្រ្កាប​ល្បែង​ស៊ីសង ដែល​បាន​អនុម័ត​ដោយ​រដ្ឋ​សភានៅ​ក្នុង​អំឡុង​ឆ្នាំ១៩៩៦បានចែងថា ការ​លេង​ល្បែង​ស៊ីសងទោះ​ក្នុង​ទម្រង់​ណា​ក៏ដោយសម្រាប់​ប្រជាជនគឺជា​អំពើ​ខុស​ច្បាប់​នៅ​កម្ពុជា។កាស៊ីណូ​ទី១ត្រូវ​បាន​ផ្តល់​ឲ្យ​ណាហ្គាវើលស្ថិតនៅកោះពេជ្រក្នុង​រាជធានី​ភ្នំពេញ ដែលបានផ្តល់អាជ្ញាប័ណ្ណក្នុង​ឆ្នាំ១៩៩៤។ចាប់​តាំង​ពី​ពេល​នោះ​មកអាជ្ញាប័ណ្ណ​កាស៊ីណូ​ត្រូវ​បាន​ផ្តល់​ដោយ​រដ្ឋាភិបាលមានល័ក្ខណ្ឌមួយចំនួននឹង​ប្រតិបតិ្តករ​កាស៊ីណូបាន​អនុវត្ត​គោលនយោបាយ​គ្មាន​ប្រជាជន​ក្នុង​ស្រុក​ចូល​លេង​ល្បែងក្នុងកាស៊ីណូដោយ​ភា ពធូរ​រលុង​នោះ​ទេ។

ប្រភពឲ្យដឹងថា កាស៊ីណូយីហោភូមិយើងនេះ មានលេងល្បែងច្រើនប្រភេទ ដូចជាល្បែងភ្នាល់ជល់មាន់ បៀរ អាប៉ោង យូគី បើកលេងយ៉ាងគគ្រឹកគគ្រេង ដែលគេសង្កេតឃើញមានពលរដ្ឋខ្មែរមកពីក្នុង ភូមិ ស្រុក ខេត្ត ក្រៅខេត្ត និងរាជធានី សម្រុកចូលមកលេងដូចហែរកឋិន ចាក់ភ្នាល់គ្នាដាក់លុយធំៗយ៉ាងសប្បាយអឺងកង ដោយគ្មានការត្រួតពិនិត្យពីសមត្ថកិច្ចមូលដ្ឋាននិងមន្ត្រី អាជ្ញាធរខេត្តឡើយ។

ក្រុមអ្នកញៀនល្បែងខ្លះ បានអះអាងថា ពួកគាត់មកលេងតាមកាលវិភាគគឺចាប់លេងរាល់ថៃ្ងជាពិ សេសថៃ្ងសៅរ៍និងថ្ងៃអាទិត្យមានអ្នកយកមាន់មកជល់សុទ្ធតែខ្មែរ ដោយជិះម៉ូតូ រថយន្តមកលេងល្បែងចាក់លុយភ្នាល់រាប់រយរាប់ពាន់និងរាប់ម៉ឺនដុល្លារ ឮតែសម្លេងហ៊ោកញ្ជ្រៀវលាន់ទ្រហឹងអឺងកង ដោយសំអាងថា កន្លែងបើកល្បែងនេះមានសុវត្ថិភាព គឺម្ចាស់កាស៊ីណូភូមិយើងមានខ្សែអ្នកធំ អ្នកមានអំណាចនៅពីក្រោយខ្នងដ៏រឹងមាំទៀតផង បើអញ្ចឹងមែននោះ តើគោលនយោបាយភូមិ ឃុំ មានសុវត្ថិភាពនិងគម្លាតសង្គមការពារជំងឺឆ្លង កូវីដ១៩នៅត្រង់ណា?។

បើយ៉ាងដូច្នេះសួរថា តើមន្ត្រីជំនាញ ឬសមត្ថកិច្ច ថ្នាក់ណាទៅទើបអាចមានវិធានការត្រួតពិនិត្យ និងបង្ក្រាបបាន?បើត្រឹមថ្នាក់ខេត្តដែលជាអាជ្ញាធរ ជា អាណាព្យាបាលផ្ទាល់របស់ពលរដ្ឋមិនហ៊ានផងនោះ?ប្រជាពលរដ្ឋចោទប្រកាន់ថា អ្នកបើកទីតាំងល្បែងស៊ីសងខាងលើមិនត្រឹមតែមានខ្សែធំទេ និងម្យ៉ាងទៀតពួកគេបានរត់ការបិទមាត់មន្ត្រីអាជ្ញាធរ មានសមត្ថកិច្ចក្នុងខេត្តត្បូងឃ្មុំអស់ហើយ ទើបបានជាមិនហ៊ានចាត់វិធានការឬបង្ក្រាបបែបនេះ។

ករណីភាពមិនប្រក្រតីនៅទីតាំងកាស៊ីណូភូមិយើងពិតមិនធម្មតាមែន មានសន្តិសុខសុវត្ថិភាពល្អណាស់ ធ្វើឲ្យសមត្ថកិច្ចនគរបាលប៉ុស្តិ៍ អធិការ ស្នងការ កងរាជអាវុធហត្ថ មិនហ៊ានមកសួរនាំអ្វីនោះឡើយ បើទោះ​បី​ជា​ប្រមុខ​រាជ​រដ្ឋាភិបាល​កម្ពុជា​បាន​ប្រកាសជាសាធារណៈ​ហាមប្រាម​មិនឲ្យប្រជា​ពលរដ្ឋ​ខ្មែរ​ចូលទៅលេង​ល្បែង​នៅ​ក្នុង​កាស៊ីណូនានា​ក៏​ដោយ​ក៏​មាន​អ្នកញៀនល្បែង​និង​ម្ចាស់​បន​ល្បែង​បាននាំ​គ្នា​បើក​ទ្វារ​ចំហរស្វាគមន៍ឲ្យចូល​ទៅ​លេងជា​រៀងរាល់ថ្ងៃ ជាហេតុ​ធ្វើឲ្យប៉ះពាល់​ដល់​សេដ្ឋកិច្ច​គ្រួសារ​នឹង​អាច​ប៉ះពាល់​ដល់សន្តិសុខ​សង្គម​ទាំងមូល​ ដោយសារ​តែ​ក្រុម​អ្នក​ចាញ់ល្បែងកើត​គំនិត​ប្រព្រឹត្ត​បទល្មើសផ្សេងៗ​ផងដែរ ដូចជាចោរលួច ឆក់ប្លន់ ឃាតកម្ម អំពើហឹង្សាជាដើម។ល។

អង្គភាពសារព័ត៌មានគេហទំព័រMSKnewsយើងសូមគាំទ្រជំហរដឹកនាំការងារបង្ក្រាបរបស់សមត្ថកិច្ច នឹងចូលរួមកិច្ចសហប្រតិបត្តិការណ៍ជានិច្ចគ្រប់ស្ថាប័នពាក់ព័ន្ធ និងមជ្ឈដ្ឋាននានាផ្តល់ព័ត៌មានដើម្បីផ្សព្វផ្សាយបន្តនៅពេលក្រោយទៀត៕

Filed in: ព័ត៌មានជាតិ, រាយការណ៍សំខាន់ៗ

Leave a Reply

Submit Comment

ការិយាល័យនិពន្ធ កាសែត មហាសេនាខ្មែរ | ទូរស័ព្ទ៖ Tel: 012 916 569, 088 89 165 69, 069 32 1006

អ៊ីម៉ែល៖ mohasenakhmer@gmail.com | Website: www.msknews.net

សហការផ្តល់ព័ត៌មាន៖ 097 6125757 | អ៊ីម៉ែល៖ mohasenakhmer@gmail.com