ខេត្តប៉ៃលិន៖ ទោះបីជាប្រមុខរាជរដ្ឋាភិបាលសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសដាក់ចេញនូវយន្តការបោសសំអាតលុបបំបាត់ចោលមន្ត្រីគ្រាប់ល្ពៅស្ងោរដែលអសកម្មការងារអង្គុយបក់ផ្សែងចាំតែទទួលសំណូកដោយត្រូវកំចាត់អំពើពុករលួយក្រោមកណ្តាប់ដៃដែករបស់សម្តេចយ៉ាងណាក៏ដោយក៏មន្ត្រីគ្រាប់ល្ពៅស្ងោរដែលកំពុងងុបងុលនឹងទឹកប្រាក់ខំប្រឹងប្រព្រឹត្តអំពើពុករលួយយកទៅធ្វើមានបានផ្ទាល់ខ្លួននិងបក្ខពួកនោះគឺមិនញញើតកោតខ្លាចអ្វីទាំងអស់ ជាក់ស្តែងគឺលោក សំ សុវណ្ណារិទ្ធ ប្រធានសាខាគយនិងរដ្ឋាករខេត្តប៉ៃលិន និងលោក ទី ប៊ុនឡង់ ប្រធានការិយាល័យគយនិងរដ្ឋាករច្រកទ្វារអន្តរជាតិព្រំ ត្រូវបានគេបើកទម្លាយឲ្យដឹងថាទាំងមេគយខេត្តនិងមេគយច្រកបានពិភាក្សាគ្នាដើម្បីស្វែងរកផលប្រយោជន៍យកទៅចែកគ្នាធ្វើមានធ្វើបានផ្ទាល់ខ្លួនតាមទម្លាប់ពុករលួយបំបាត់ប្រាក់ពន្ធចំណូលរដ្ឋយ៉ាងគគ្លើនបំផុត ហាក់ដូចជាមើលស្រាលបទបញ្ជានិងអនុសាសន៍ដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាជ្រុលហួសហេតុពេកហើយអស់លោកអើយ..!។
ទន្ទឹមនឹងនេះក៏មានសេចក្ដីអំពាវនាវពីសំណាក់មជ្ឈដ្ឋានមហាជនជម្រុញឲ្យលោក ឱម យុិន ទៀង ប្រធានអង្គភាពប្រឆាំងអំពើពុករលួយ បើកការស៊ើបអង្កេតទៅលើរឿងអាស្រូវពុករលួយរបស់លោក សំ សុវណ្ណារិទ្ធ មេគយខេត្តប៉ៃ លិន និងលោក ទី ប៊ុនឡង់ មេគយច្រកទ្វារអន្តរជាតិព្រំឲ្យបានស៊ីជម្រៅនិងចាត់វិធានការទប់ស្កាត់់ប្រកបដោយប្រសិទ្ធភាពខ្ពស់។ ដូច្នេះលោកអូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុល្មមដល់ពេលចាត់ការតាមច្បាប់ហើយមិនគួរបណ្តែតបណ្តោយឲ្យលោក សំ សុវណ្ណារិទ្ធ ប្រធានសាខាគយនិង រដ្ឋាករខេត្តប៉ៃលិន និងលោក ទី ប៊ុនឡង់ ប្រធានការិយាល័យគយនិងរដ្ឋាករច្រកទ្វារអន្តរជាតិព្រំ ដែលបានឃុបឃឹតគ្នាប្រព្រឹត្តអំពើពុករលួយជិះសេះលែងដៃយ៉ាងគឃ្លើនបែបនេះទេ។
តាមសេចក្តីរាយការណ៍បានឲ្យដឹងថា សកម្មភាពរថយន្តធំៗចតតម្រាបគ្នារង់ចាំដឹកជញ្ជូនទំនិញគ្រប់ប្រភេទនៅពីខាងចំហៀងក្រោយសណ្ឋាគារនិងភោជនីយដ្ឋានកាស៊ីណូ ហ្គ្រែន ជេ អឹម ជាប់នឹងរបងស្នាក់ការគយនិងរដ្ឋាករច្រកទ្វារអន្តរជាតិព្រំស្ថិតក្នុងស្រុកសាលាក្រៅ ខេត្តប៉ៃលិនកាលពីពេលថ្មីៗនេះ គេបានសង្កេតឃើញថាមានរថយន្តជាច្រើនគ្រឿងកំពុងផ្ទេរទំនិញវេចខ្ចប់គេចពន្ធនិងកេសផ្លែឈើដូចជាស្វាយដែលបានរើជញ្ជូនចេញពីរថយន្តធំៗដឹកតាមរទេះ រ៉ឺម៉ក រថយន្តសាំយ៉ុងនិងនីសាន់ដឹកឆ្លងដែនចូលទៅប្រទេសថៃ មិនតែប៉ុណ្ណោះមានរថយន្តមួយចំនួនទៀតរង់ចាំដឹកទំនិញគេចពន្ធដែលលួចឆ្លងចូលមកតាមអូរព្រំដែននៅទល់មុខស្នាក់ការកងរាជអាវុធហត្ថការពារសន្តិសុខ ៥៧០៣ រួចដឹកយកទៅផ្ទេរនៅដីឡូត៍មួយកន្លែងទៀត ដែលជាចំណតរថយន្តផ្សារព្រំ ហើយភាគច្រើនជាប្រភេទទំនិញគេចពន្ធទំនិញបង់ពន្ធមិនគ្រប់ ទំនិញបង្កប់និងទំនិញខុសច្បាប់ ជាពិសេ សផ្លែឈើ សាច់និងត្រី ដែលខូចគុណភាព ដើម្បីដឹកបន្តទៅតាមខេត្តនានានិងដឹកបន្តយកមកចែកចាយដល់រាជធានីភ្នំពេញ។
តាមប្រភពបានឲ្យដឹងថាលោក សំ សុវណ្ណារិទ្ធ ប្រធានសាខាគយនិងរដ្ឋាករខេត្តប៉ៃលិន គឺអាចជាអ្នកបើកភ្លើងខៀវឲ្យលោក ទី ប៊ុនឡង់ ប្រធានការិយាល័យគយនិងរដ្ឋាករច្រកទ្វារអន្តរជាតិព្រំទើបហ៊ានបើកដៃឲ្យឈ្មួញធំៗ នាំទំនិញចូលតាមច្រកនេះ គឺបង់ពន្ធចូលរដ្ឋត្រឹមតែ៣០ទៅ៤០ភាគរយប៉ុណ្ណោះ ហើយក្រៅពីនេះគឺក្រុមឈ្មួញបានឃុបឃិតគ្នាបែងចែកផលប្រយោជន៍ លុយលើតុ លុយក្រោមតុជាមួយលោក សំ សុវណ្ណារិទ្ធ និងលោក ទី ប៊ុនឡង់ តែម្តង បើមិនយ៉ាងដូច្នេះទេ ច្បាស់ជាលោកទី ប៊ុនឡង់ និងបក្ខពួកមិនហ៊ានចេញមុខដើរជម្រិ តយកលុយហើយថែមទាំងគាបសង្កត់យ៉ាងខ្លាំងទៅលើអាជីវករតូចតាចនិងប្រជាពលរដ្ឋដែលរកស៊ីនាំចូលទំនិញជាប្រភេទចំណីអាហារបន្លែ ផ្លែឈើបន្តិចបន្តួចពីទឹកដីថៃចូលទឹកដីខ្មែរដើម្បីបានប្រាក់កម្រៃចិញ្ចឹមជីវិតក៏លោកទី ប៊ុនឡង់មិនលើកលែងនោះឡើយ។
ប្រភពពីមន្ត្រីបម្រើការងារនៅច្រកទ្វារអន្តរជាតិព្រំ ខេត្តប៉ៃលិន បានឲ្យដឹងថា ក្នុងរយៈពេលដែលលោកសំ សុវណ្ណារិទ្ធ មកកាន់តំណែងជាប្រធានសាខាគយនិងរដ្ឋាករខេត្តប៉ៃលិនរហូតមកដល់ពេលនេះ គឺគ្មានអ្វីប្លែកថ្មីក្រៅពីរបៀបដឹកនាំតាមគន្លងចាស់រួមដៃគ្នាជាមួយលោក ទី ប៊ុនឡង់ ប្រធានការិយាល័យគយច្រកទ្វារអន្តរជាតិព្រំ និងបក្ខពួកកំពុងប្រព្រឹត្តអំពើពុករលួយតាមច្រើនរូបភាពដោយគ្មានញញើតអ្វីទាំងអស់ដោយបានឃុបឃិតឲ្យឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់កាន់តែច្រើនឡើងៗ ដើម្បីជាថ្នូរនឹងផលប្រយោជន៍ ហើយមិនខ្វល់ពីការរិះគន់អ្វីទាំងអស់ព្រោះអាងមានខ្នងបង្អែកដ៏រឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជា ហើយជាងនេះទៀតការដែលលោក ទី ប៊ុនឡង់ ប្រធានការិយាល័យគយច្រកព្រំ ហ៊ានប្រើអំណាចប្រព្រឹត្តអំពើពុករលួយយ៉ាងគឃ្លើន គឺព្រោះតែមានការសម្របសម្រួលជ្រោមជ្រែងពីសំណាក់លោក សំ សុវណ្ណារិទ្ធ ប្រធានសាខាគយខេត្តប៉ៃលិន នេះផងដែរ។
ប្រជាពលរដ្ឋបានឲ្យដឹងថា ផ្លែស្វាយមួយរទេះលោកទី ប៊ុនឡង់បញ្ជ្ជាឲ្យកូនចៅខ្លួនយកលុយចាប់ពី៥០០០រៀល ទៅ១០០០០រៀល ហើយខាងថៃគេយកលុយពី៦០បាតទៅ១៥០បាតទៀតទើបពួកគាត់មានការលំបាកខ្លាំងណាស់ទំរាំតែបានលុយបន្តិចបន្ទួចនោះដូចរកស៊ីចិញ្ចឹមពួកគយនិងសមត្ថកិច្ចព្រំដែនតែប៉ុណ្ណោះ។ចំណែកឯក្រុមហ៊ុនដឹកជញ្ជូនមានរថយន្តធំៗជាច្រើនគ្រឿងដឹកទំនិញគ្រប់ប្រភេទទាំងអស់នោះក៏ត្រូវបានថៅកែម្ចាស់រថយន្តបង់លុយដាក់ខែជាប្រចាំចាប់ពីរាប់ពាន់ដុល្លារឡើងទៅក្នុងមួយខែៗតាមចំនួនរថយន្តតិច ឬច្រើនគ្រឿងអស់រហូតរាប់ម៉ឺនដុល្លារ សូម្បីតែរថយន្តដឹកកសិផលខ្មែរដូចជាដំឡូងមីរបស់ក្រុមហ៊នថៃក៏ត្រូវបានគយនិងសមត្ថកិច្ចប្រចាំការព្រំដែនកោសរូសយកលុយគ្រប់គ្នាធ្វើឲ្យតម្លៃដំឡូងត្រូវធ្លាក់ចុះថោកដោយសារការចំណាយលុយរត់ការផ្លូវអស់ច្រើនពេកទើបកសិផលរបស់កសិករខ្មែរលក់មិនបានថ្លៃគឺវាបែបនេះហើយ។
ពាក់ព័ន្ធនឹងការលើកឡើងរបស់ប្រជាពលរដ្ឋទម្លាយរឿងអាស្រូវរបស់លោក សំ សុវណ្ណារិទ្ធ ប្រធានសាខាគយនិងរដ្ខាករខេត្តប៉ៃលិន និងលោក ទី ប៊ុនឡង់ ប្រធានការិយាល័យគយនិងរដ្ឋាករច្រកទ្វារអន្តរជាតិព្រំជាមួយនឹងអាជីវករតូចតាចលើបញ្ហាយកលុយមិនប្រក្រតីនឹងការប្រព្រឹត្តអំពើពុករលួយរបស់លោកទី ប៊ុនឡង់ និងបក្ខពួក ដោយត្រូវបានមហាជនចោទប្រកាន់ទៅលើមន្ត្រីគយថា ជាពួកឈ្លើងជញ្ជក់ឈាមរាស្ត្រគ្មានត្រាប្រណីព្រោះតែការគាបសង្កត់ជម្រិតទារលុយពីប្រជាពលរដ្ឋក្រីក្រមិនរើសមុខគ្មានការយោកយល់តាមសំណូមពរដែលបានស្នើសុំឲ្យបន្ធូបន្ថយការយកលុយពីពួកគាត់ក្នុងតម្លៃសមស្របនោះឡើយ បើទោះបីជាប្រមុខរាជរដ្ឋាភិបាលកំពុងយកចិត្តទុកដាក់ចំពោះប្រជាពលរដ្ឋ ខណ:ដែលសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានខិតខំដឹកនាំបម្រើប្រជាពលរដ្ឋដោយស្មោះអស់ពីបេះដូងដើម្បីរក្សាសន្តិភាព អភិវឌ្ឍន៍ប្រទេសជាតិឲ្យកាន់តែរីកចម្រើននិងការកាត់បន្ថយភាពក្រីក្ររបស់ប្រជាពលរដ្ឋ។
អង្គភាពគេហទំព័រ អឹម អេស ខេ MSKnewsយើងមិនអាចធ្វើការទំនាក់ទំនងជាមួយលោកទី ប៊ុនឡង់ និងលោកសំ សុវណ្ណារិទ្ធ បានទេខណ:ទូរស័ព្ទហៅចូលជាច្រើនដងតែគ្មានអ្នកលើកកាលពីម្សិលមិញនេះ៕