រាជធានីភ្នំពេញ៖ សកម្មភាពចាក់ដីលុបប្រឡាយលូ៥រំលោភយកធ្វើជាកម្មសិទ្ធរបស់លោកឧត្តមសេនីយ៍ឯក ណឹម ម៉េង ម្ចាស់បុរីសូនីសំណ ង់ផ្ទះល្វែងលក់ថ្លើមធំមហាសែនលោភលន់ណាស់ហ៊ានលួចចាក់ដីរំលោភយកប្រឡាយលូ៥ធ្វើជាកម្មសិទ្ធផ្ទាល់ខ្លួន ដោយអាងខ្នងបង្អែកដ៏រឹងមាំពីនាយឧត្តមសេនីយ៍ ហ៊ីង ប៊ុនហៀង បើទោះបីជាមានបទបញ្ជាពីលោក ឃួង ស្រេង ចៅហ្វាយក្រុងភ្នំពេញបានដាក់ចេញនូវបម្រាមហាមឃាត់មិនឲ្យក្រុមហ៊ុនរបស់លោក ណឹម ម៉េង ចាក់ដីរំលោភលើចំណីដីប្រឡាយលូ៥ កាលពីពេលថ្មីៗកន្លងមកនេះក៏ដោយក៏លោក ណឹម ម៉េង មិនញញើតកោតខ្លាចនឹងអំណាចលោក ឃួង ស្រេង នោះឡើយ ដែលមហាជនលើកឡើងថាបទបញ្ជាលោក ឃួង ស្រេង សាបដូចទឹកទន្លេ ទោះជាទៅហាមឃាត់យ៉ាងណាក៏គេមិនស្តាប់មិនគោរពធ្វើតាមនោះដែរ ពីព្រោះពួកគាត់បានស្គាល់ចិត្តស្គាល់ថ្លើមគ្នាអស់ហើយ។
សូមបញ្ជាក់ថាកាលពីថ្ងៃទី១៣ខែវិច្ឆិកាឆ្នាំ២០១៨កន្លងមកនេះ លោកឧត្តមសេនីយ៍ឯក ណឹម ម៉េង បានឲ្យរថយន្តដឹកដីយកមកចាក់លុបមាត់ប្រឡាយលូ៥រួចម្តងហើយ ដោយរំលោភយកផ្ទៃប្រឡាយអស់ប្រមាណ៥០%ស្ថិតនៅភូមិឫស្សី១ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ពេលនោះលោក ឃួង ស្រេង បានបញ្ជាឲ្យលោក ពេជ្រ កែវមុនី អភិបាលនៃគណៈអភិបាលខណ្ឌមានជ័យ បានដឹកនាំកម្លាំងចម្រុះចុះធ្វើការហាមឃាត់មិនឲ្យចាក់ដីលុបប្រឡាយលូប្រាំ ដែលកំពុងធ្វើការកាយស្តារនិងធ្វើស្ថានីយ៍បូមទឹកនៅពេលមានជំនន់ទឹកភ្លៀងដែលកំពុងតែធ្វើមិនទាន់ហើយនៅឡើយ ហើយក៏ត្រូវបានកម្លាំងសមត្ថកិច្ចខណ្ឌមានជ័យចុះទៅធ្វើការហាមឃាត់តាមបទបញ្ជាលោក ឃួង ស្រេង ទើបលោកឧត្តមសេនីយ៍ឯក ផ្កាយ៣ ណឹម ម៉េង រំលោភចាក់ដីលុបប្រឡាយមិនបានសម្រេ ចគឺដោយសារតែមានបទបញ្ជាយ៉ាងហ្មឺងម៉ាត់ពីលោក ឃួង ស្រេង
ឲ្យកម្លាំងចុះទៅពិនិត្យជាក់ស្ដែង និងបានឲ្យក្រុមហ៊ុន ណឹម ម៉េង ត្រូវបញ្ឈប់ការចាក់ដីលុបប្រឡាយរំដោះទឹកជាបន្ទាន់ស្របពេលដែលសាលារាជធានីភ្នំពេញកំពុងតែស្តារប្រព័ន្ធប្រឡាយមួយចំនួននៅក្នុងក្រុងភ្នំពេញ ។
ប្រភពបានឲ្យដឹងថាសាលារាជធានីភ្នំពេញកំពុងសាងសង់ស្ថានីយ៍រំដោះទឹកនឹងប្រឡាយលូ៥ដែលមានការកកស្ទះសម្រាមបណ្តាលឲ្យមានជំនន់ទឹកភ្លៀងលិចជារៀងរាល់លើក ហើយការស្តារប្រព័ន្ធផ្លូវទឹកដើម្បីរំដោះទឹកភ្លៀងនារដូវវស្សានេះ បែរជាលោកឧត្តមសេនីយ៍ឯក ផ្កាយ៣ ណឹម ម៉េង បានសម្រុកចាក់ដីលុបប្រឡាយរំដោះទឹកនៅចំណុចភូមិឬស្សី១ សង្កាត់ស្ទឹងមានជ័យ៣ ខណ្ឌមានជ័យ រហូតមកដល់ពេលនេះគេបានសង្កេតឃើញថា ផែនការចាក់ដីរំលោភយកធ្វើជាកម្មសិទ្ធរបស់លោក ណឹម ម៉េង បានសម្រេច១០០%ជាស្ថាពរហើយ ដែលប្រជាពលរដ្ឋកំពុងព្រួយបារម្ភពីការលិចលង់ផ្ទះសម្បែងនារដូវវស្សាកាន់តែខ្លាំងឡើងថែមទៀត ក្រោយពីក្រុមហ៊ុន ណឹម ម៉េង ម្ចាស់បុរីសូនីចាក់ដីលុបយកធ្វើជាកម្មសិទ្ធដើម្បីសង់ផ្ទះល្វែងលក់។
ប្រជាពលរដ្ឋបានឲ្យដឹងថា កន្លងមកនេះលោក ណឹម ម៉េង បានលួចចាក់ដីលុបប្រឡាយរំដោះទឹក(លូ៥)ជាបន្តបន្ទាប់ធ្វើឲ្យផ្ទៃប្រឡាយកាន់តែរួមតូច ហើយកាន់តែបំពានចាក់ដីថែមទៀត ទើបត្រូវបានគណៈបញ្ជារការឯកភាពខណ្ឌមានជ័យបានដឹកនាំកម្លាំងចុះទៅបញ្ឈប់និងឃាត់រថយន្តដឹកដីយីឌុបចំនួន៦គ្រឿងយកទៅរក្សាទុក នៅសាលាខណ្ឌមានជ័យដើម្បីដោះស្រាយគ្នាតាមផ្លូវច្បាប់ ប៉ុន្តែបានមួយដង្ហើមចង្រិតប៉ុណ្ណោះក៏ដោះលែងស្ងាត់ៗវិញ ហើយលោកផ្កាយ៣ ណឹម ម៉េង ក៏បានឲ្យឡានដឹកដីយកមកចាក់លុបប្រឡាយលូ៥ទាំងយប់ទាំងថ្ងៃទើបបានសម្រេច១០០%ហើយ ដែលទំនងជាមានភ្លើងខៀវពីលោក ឃួង ស្រេង ចៅហ្វាយក្រុងភ្នំពេញយល់មុខយល់មាត់ ឬក៏ខ្លាចអំណាចលោក ណឹម ម៉េង ដែលគេសង្ស័យថាលោក ឃួង ស្រេងអាចត្រូវថ្នាំសណ្តំច្រើជាងព្រោះបទបញ្ជារបស់លោកចៅហ្វាយក្រុងគ្មានប្រសិទ្ធភាពអ្វីបន្តិចទាល់តែសោះ។
អ្នកស្រុកនិយាយថា ប្រឡាយលូប្រាំ(លូ៥)គឺជាសណ្តរស្ទឹងដ៏សំខាន់មួយដែលមានប្រភពជាប់តាំងពីបឹងអន្លុងគង បឹងទួលពង្រ បឹងក្រពើ បឹងត្រពាំងឈូក និងហូរធ្លាក់ចូលស្ទឹងមានជ័យដែលឆ្លងកាត់ផ្លូវវេងស្រេងបង្កប់ដោយលូធំៗចំនួន៥ក្រោមលេសអភិវឌ្ឍន៍ចាក់ដីលុបដូចព្យុះសង្ឃរាកន្លែងខ្លះគេដាក់លូចំនួន៣កន្លែងខ្លះដាក់លូចំនួន២និងកន្លែងខ្លះទៀតដាក់លូតែ១គត់ទើបធ្វើឲ្យស្ទះទឹកជន់លិចជារៀងរាល់ឆ្នាំ ហើយឥឡូវនេះលោកណឹម ម៉េង កំពុងកេងយកចំ
ណេញលើដីប្រឡាយលូ៥ដោយរំលោភបំពានទាំងកំរោលដើម្បីយកធ្វើជាកម្មសិទ្ធរបស់ខ្លួនធ្វើឲ្យប្រឡាយលូ៥សព្វថ្ងៃនៅសល់ប៉ុនឆ្នូកក្តាមប៉ុណ្ណោះ។
ជុំវិញករណីចាក់ដីលុបប្រឡាយលូ៥ ដែលប្រជាពលរដ្ឋបានលើកឡើងខាងលើនេះ អង្គភាពគេហទំព័រMSKnewsយើងពុំអាចធ្វើការទំនាក់ទំនងជាមួយលោកឃួង ស្រេង និងលោកឧត្តមសេនីយ៍ផ្កាយ៣ ណឹម ម៉េង ដើម្បីសុំការបំភ្លឺណាមួយពីលោកទាំងពីរបានទេ ខណៈពេលនេះ អង្គភាពយើងនឹងរង់ចាំទទួលព័ត៌មានគ្រប់ពេលវេលារៀងរាល់ម៉ោងធ្វើការ៕