28 
រាជធានីភ្នំពេញ៖ នៅថ្ងៃទី០៣ ខែកញ្ញា ឆ្នាំ២០១៨ នេះ លោក អ៊ី ណូ បានបើកប្រកាសជាចំហរពីជំនួញដីធ្លីដែលមានតំលៃជិត២០លានដុល្លារ ដែលនេះជាជំនួញដ៏ធំលើកដំបួងក្នុងជីវិតរបស់លោក។ នៅពេលដែលឃើញលោកអ៊ី ណូ បោះទុនលើជំនួញដីធ្លីខ្ឋទង់លានដុល្លារបែបនេះ ម្នាក់ៗបើកភ្នែកធំមើលនិងលាន់មាត់សរសើរពីវាសនារបស់តារាចំរៀងរូនេះគ្រប់គ្នា។គ្រាន់តែបាត់មុខមួយរយៈតែពីរបីឆ្នាំសោះ គឺខុសប្លែកគ្នាកាលជាង ១០ ឆ្នាំមុន អ៊ីណូ គ្រាន់តែជាអ្នកចម្រៀងតាមហាងដែលដើរសុំគេច្រៀង ក្នុងមួយថ្ងៃបានប្រាក់ត្រឹមតែ ៥ ដុល្លារប៉ុណ្ណោះដើម្បីចិញ្ចឹមជីវិត ប៉ុន្តែពេលនេះអ្វីៗបានប្រែប្រួលអស់ហើយ លោកមិនត្រឹមតែក្លាយជាតារាចម្រៀងល្បីល្បាញនោះទេ ថែមទាំងក្លាយជាថៅកែលើជំនួញដីធ្លីវ័យក្មេងដែលមានប្រាក់លាននៅ ក្នុងដៃទៀតផង ។
អ៊ីណូ បានបញ្ជាក់ប្រាប់ថា តាមពិតជំនួញដីធ្លីនេះមិនមែនជារបស់លោកតែម្នាក់ឯងនោះទេ ចំណែកលោកមានត្រឹមតែ ២០ ភាគរយប៉ុណ្ណោះ ក្រៅពីនេះគឺមានដៃគូផ្សេងៗទៀតចូលរួម ដូចជាលោក សីហា ជាដើម ។ អ៊ីណូ បានបន្ថែមទៀតថា មូលហេតុដែលធ្វើឱ្យលោកឈានជើងចូលក្នុងវិស័យអចលទ្រព្យនេះ ដោយសារក្តីស្រឡាញ់ដែលមានតាំងពី ក្មេងមកម្ល៉េះ គ្រាន់តែពេលនោះនៅក្មេងនិងពុំទាន់មានទ្រព្យដើម្បីយកមកពង្រើកការងាររកស៊ីនឹងគេ ទើបតែ ២ ឆ្នាំចុងក្រោយនេះ លោកសម្រេចចិត្តប្រលូក នៅក្នុងវិស័យរកស៊ីនេះ ដោយមានជំនឿចិត្តថា នឹងដំណើរការល្អ ដោយសារមានដៃគូសហការល្អៗ ថែមទាំងមានជំនាញខាងការងារផ្នែកអចលនទ្រព្យ ។
អ៊ីណូ បានដាក់ឈ្មោះម្រោងពុះដីឡូតិ៍លក់របស់ខ្លួនថា « អ៊ីណូ សីហា » ដែលមានទីតាំងស្ថិតនៅតំបន់ភ្នំបាសិត ជិតផ្លូវ ៥១ ក្នុងការប្រកាសបើកជំនួញថ្មីនេះ អ៊ីណូ មានសង្ឃឹមថានឹងទទួលបានការគាំទ្រច្រើនពីសំណាក់បងប្អូន ពីព្រោះតាំងពីដាក់លក់គម្រោងថ្មីនេះមក ឃើញថាសន្ទុះកើនឡើងជាលំដាប់ ម្យ៉ាងវិញទៀត គម្រោងពុះដីឡូតិ៍នេះ គឺមានតម្លៃសមរម្យដែលបងប្អូនអាចទទួលយកបាន ។ ចុងក្រោយ អ៊ីណូ បានបន្ថែមទៀតថា លោកមានគម្រោងនឹងពង្រើកជំនួនថ្មីនេះឱ្យកាន់តែខ្លាំងក្លា ។
ទោះបីជាងាកមកចាប់មុខជំនួញថ្មីក្តីតែលោក អ៊ីណូ មិនបានបោះបង់អាជីពចម្រៀងចោលនោះទេ លោកនៅតែបន្តនៅក្នុងវិស័យនេះដូចដើម ពីព្រោះវិស័យចម្រៀងបានធ្វើឱ្យជីវិតលោករីកលូតលាស់មកទល់ពេលនេះ ។ នៅក្នុងបើកសម្ពោធគម្រោងរកស៊ីថ្មីរបស់ អ៊ីណូ ក៏មានវត្តមានសិល្បករសិល្បការីនីជាច្រើន ចូលរួមអបអរសាទរ ៕
