225 
(ភ្នំពេញ)៖ នាយឧត្តមសេនីយ៍ ហ៊ីង ប៊ុនហៀង អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការដ្ឋានអង្គរក្ស បានបដិសេធនិងច្រានចោលចំពោះព័ត៌មានដែលបានផ្សព្វផ្សាយតាមបណ្តាញសង្គមហ្វេសប៊ុកថា ជនល្មើសដែលកងកម្លាំងកងរាជអាវុធហត្ថរាជធានីភ្នំពេញ បាញ់សម្លាប់ជាកងអង្គរក្សនោះគឺមិនពិតទេ។
តាមប្រភពបែកធ្លាយក្រោយពីបានដឹងថា អ្នកផ្តើមគំនិតឈ្មោះ អុឹម សុវណ្ណារិទ្ធ ធ្លាប់ធ្វើជាអ្នកបើកឡានឲ្យម្ចាស់ផ្ទះ ហើយក៏បានឈប់មួយរយៈ បន្ទាប់មកក៏សុំម្ចាស់ផ្ទះចូលធ្វើការវិញ តែម្ចាស់ផ្ទះមិនឆ្លើយតប រូបគេក៏បានរៀបចំផែនការ ចូលចាប់ជំរិតនិងប្លន់សម្លាប់ម្ចាស់ផ្ទះទាំងប្តីប្រពន្ធនិងកូនឈ្នួល ០២នាក់ជាក្រោយនោះ។ ប៉ុន្តែគំរោងការក្បត់មេខ្លួនឯងនេះមិនបានសម្រេចឡើយ ហើយតាមរយៈឲ្យតម្រុយនិងថៅកែបានដឹងពីផែនការមុន ក៏បានប្ដឹងទៅកម្លាំងសមត្ថកិច្ចកងរាជអាវុធហត្ថរាជធានីភ្នំពេញ មុនពេលពួកជនសង្ស័យមកធ្វើសកម្មភាព ៣ទៅ ៤ថ្ងៃមុន ដោយកម្លាំងពួនសម្ងំនៅក្នុងភូមិគ្រឹះម្ចាស់រងគ្រោះ រួចជាស្រេច រង់ចាំក្រុមជនសង្ស័យមកធ្វើ សកម្មភាពជាក់ស្ដែង។ ថៅកែដែលជាជនរងគ្រោះមានឈ្មោះ ម៉ៅ ហួរ អាយុ ៥៨ឆ្នាំ ជាអតីតប្រធានសាខាអគ្គីសនីខេត្តកំពង់ចាម និងជាពាណិជ្ជករមួយរូប ដែលមានទ្រព្យស្ដុកស្ដម្ភ ជំនួញដេញថ្លៃផ្គត់ផ្គង់អគ្គីសនីនៅតាមបណ្ដាខេត្តមួយចំនួន។
នៅក្នុងហេតុការណ៍បាញ់សម្លាប់នាពេលប្រតិបត្តិការបង្ក្រាបក្រុមឧក្រិដ្ឋជនជម្រិតទារប្រាក់ ១លានដុល្លារពីជនរងគ្រោះនៅក្នុងភូមិគ្រឹះ ក្នុងបុរីអង្គរភ្នំពេញ ក្នុងភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ ដែលគេអះអាងថាក្នុងចំណោមឧក្រិដ្ឋជនទាំង០៤នាក់ គឺមានម្នាក់ឈ្មោះ អុឹម សុវណ្ណារិទ្ធ ជាមន្ត្រីនៅបញ្ជាការដ្ឋានអង្គរក្សនោះ គឺមិនមែនជាការពិតនោះទេ និងមិនមានឈ្មោះនៅក្នុងបញ្ជីអង្គរក្សទេ។ ការបដិសេធនេះ បានធ្វើឡើងបន្ទាប់ពីបណ្តាញសង្គមហ្វេសប៊ុកបានបង្ហោះរូបភាពបុរសម្នាក់នេះ ស្លៀកឯកសណ្ឋានពាក់ប៉ារ៉ា និងកាតសម្គាល់ខ្លួន ដោយបានភ្ជាប់រូបភាពជនល្មើសម្នាក់ដែលកងរាជអាវុធហត្ថបាញ់សម្លាប់។ នាយឧត្តមសេនីយ៍ ហ៊ីង ប៊ុនហៀង បានមានប្រសាសន៍ប្រាប់ថា “រូបភាពនេះ អត់មានឈ្មោះនៅក្នុងបញ្ជីអង្គរក្សទេ ភាគច្រើនប័ណ្ណពាក់កររបស់បញ្ជាការដ្ឋានអង្គរក្ស គឺមានលេខកូដត្រឹមត្រូវ មានបញ្ជីស្នាមត្រឹមត្រូវ ហើយការធ្វើនេះ គឺក្លែងក្លាយ ពីព្រោះខាងខ្ញុំមានលក្ខណៈពិសេសសម្គាល់ខាងខ្ញុំ ហើយអត់មានពាក់ព័ន្ធជាមួយបញ្ជាការដ្ឋានអង្គរក្ស ហើយបើធ្វើចឹងមែនគេបាញ់ចោលល្អហើយ”។
ចំណែកបក្ខពួក០៣នាក់ទៀតដែលបានស្លាប់ដូចគ្នាមិនមានឈ្មោះល្បីល្បាញថាជាអ្នកណាមកពីណាពីណីធ្វើអ្វីសោះ ស្លាប់៤នាក់ល្បីតែ១នាក់ ដោយមិនអស់ចម្ងល់ នាំគ្នាស្លាប់ទៅហើយគួរឲ្យច្រណែនគ្នាទៀត តែទោះបីថាជាកូនចៅនឹងមេខ្លោងជម្រិតលុយលានដុល្លារ ពេលនេះបានក្លាយជាខ្មោចហើយ ខណ:សាកសពឧក្រិដ្ឋជនទាំង ០៤នាក់ មិនសូវឃើញមានសាច់ញាត្តិនឹងត្រូវបានលោក តាអាចារ្យភ្លុកប្រចាំនៅវត្តទឹកថ្លា យកសាកសពទាំងអស់និងដាក់ចូលឡ ដុតបូជាម្ដងមួយនាក់ៗហើយ នៅវេលាម៉ោង ១១:០០ ថ្ងៃត្រង់នេះ ដោយមិនអាចទុកសាកសពហ្នឹងបានយូរម៉ោងទេ ព្រោះអីសុភាពសាកសព ចាប់ផ្តើម ហើម និងមានរុយរោមបណ្ដើរៗ អញ្ចឹងមានតែសម្រេចចិត្តដាក់បូជាសាកសពហ្នឹងហើយ។ សូមជម្រាបថា សាកស ពទាំង០៤នាក់នឹងត្រូវដាក់បូជានៅក្នុងវត្តទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ ថ្ងៃទី២ ខែមីនា ឆ្នាំ២០២១ ៕
