155 
(ភ្នំពេញ)៖ ឯកឧត្តមបណ្ឌិត ឧកញ៉ា ម៉ុង ឫទ្ធី ជាព្រឹទ្ធសមាជិកសភា និងជាពាណិជ្ជករ និងវិនិយោគិនដ៏មានឈ្មោះល្បីម្នាក់នៅប្រទេសកម្ពុជា ដែលបានបោះទុនវិនិយោគលើវិស័យសំខាន់ៗ ជាច្រើននៅក្នុងប្រទេស រួមមានវិស័យកសិកម្ម ទេសចរណ៍ ចំការដូងប្រេងនិងកំពង់ផែស្ថិតនៅក្នុងខេត្តព្រះសីហនុ។
លោកឧកញ៉ា ម៉ុង ឫទ្ធី អគ្គនាយកក្រុមហ៊ុនម៉ុង ឫទ្ធីគ្រុប បានអំពាវនាវដល់បណ្តាជនអ្នកដែលមានដីទំនេរទុកចោល ត្រូវរកលុយដើម្បីយកមកអភិវឌ្ឍន៍ដើម្បីផ្តល់ឱកាសការងារបន្ថែមជូនពលរដ្ឋ។
លោកឧកញ៉ាបញ្ជាក់ថា “ក្នុងងន័យជួយបង្កើតការងារឲ្យដល់ប្រជាពលរដ្ឋបន្ថែមទៀត នៅក្នុងឱកាសដែលប្រទេសជាតិយើងក៏ដូចជាពិភពលោកទាំងមូល កំពុងតែទទួលរងនូវជម្ងឺឆ្លងកូរូណាឬហៅកូវីដ ១៩ ដ៏មហាប្រល័យនេះ”។
លោកឧកញ៉ា ម៉ុង ឫទ្ធី ដែលជាមហាសេដ្ឋីផ្នែកកសិកម្ម បានឲ្យដឹងកាលពីចុងសប្តាហ៍កន្លមកនេះ ថាខណៈដែលពិភពលោក ក៏ដូចជាកម្ពុជាកំពុងទទួលរងនូវផលប៉ះពាល់នូវការរាតត្បាតនៃជំងឺកូវីដ១៩ អ្នកដែលមានទ្រព្យសម្បត្តិជាប្រភេទដីធ្លីទុកចោល គួរតែអភិវឌ្ឍន៍ដីនោះ តែបើមិនបានធ្វើគួរកុំបង្កើតកំហុស និងរំខានដល់អ្នកអភិវឌ្ឍផ្សេងទៀត។
លោកឧកញ៉ាថ្លែងថា “ខ្ញុំសូមអំពាវនាវដល់អ្នកមាន ទ្រព្យសម្បត្តិ ដីធ្លីទុកទំនេរចោលសុំមេត្តាយកប្រាក់មកអភិវឌ្ឍន៍ដីនេះ ដើម្បីជួយបង្កើតការងារបន្ថែមទៀតឲ្យបានដល់ប្រជាពលរដ្ឋយើងបានធ្វើ តែបើមិនធ្វើអីទេសុំមេត្តាកុំទៅដើររករឿង នាំឲ្យរំខានដល់អ្នកដែលកំពុងតែអភិវឌ្ឍន៍ ជាធម្មតាអ្នកធ្វើតែងតែមានកំហុសតិច ឬច្រើនមិនខានឡើយ”។
ជាមួយគ្នានេះ លោកឧកញ៉ា ម៉ុង ឫទ្ធី បាននឹងកំពុងជម្រុញដល់ការអភិវឌ្ឍ តំបន់អភិវឌ្ឍន៍កសិទេសចរណ៍របស់លោក នៅលើផ្ទៃដីររាប់រយហិកតាស្ថិត នៅក្នុងខេត្តកំពង់ស្ពឺឲ្យបានចប់តាមផែនការ ដើម្បីចូលរួមជាមួយរដ្ឋាភិបាលកម្ពុជាក្នុងការអភិវឌ្ឍន៍វិស័យទេសចរណ៍ ខណៈវិស័យមួយនេះ បាននឹងកំពុងជួបនូវវិបត្តិយ៉ាងធ្ងន់ធ្ងរដោយសារជំងឺCovid -19។
លោកឧកញ៉ាថ្លែងប្រាប់ឲ្យដឹងទៀតថា “ខ្ញុំចុះមកពិនិត្យមើលសកម្មភាពការងារនៅក្នុងតំបន់អភិវឌ្ឍន៍កសិទេសចរណ៍ ម៉ុង ឫទ្ធីសែនជ័យ ដើម្បីជម្រុញលើគ្រប់វិស័យឲ្យឆាប់ហើយរួចរាល់ជាស្ថាពរ ដើម្បីចូលរួមចំណែកអភិវឌ្ឍន៍វិស័យទេសចរណ៍ជាមួយរាជរដ្ឋាភិបាល ដែលដឹកនាំដោយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ កម្ពុជា”៕
