ខេត្តព្រៃវែង៖ រដូវកាលប្រកួតបក្សីកីឡាចាប់ផ្ដេីមកក្រេីកពេញស្រុកស្វាយអន្ទរទៀតហេីយ ក្រោយពីបានស្ងាត់ស្ងៀមមួយរយ:ពេលរួចមក មេបនល្បែងឈ្មោះ គ្រុយ បាននាំបក្ខពួកបើកសង្វៀនលេងល្បែងសុីសងប្រជល់មាន់និងអាប៉ោងសារជាថ្មីវិញហើយ ខណៈសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានប្រកាសដាក់បទបញ្ជាដ៏តឹងរុឹងបំផុតឲ្យបញ្ឈប់សកម្មភាពការលេងល្បែងស៊ីសងគ្រប់ប្រភេទនៅក្នុងមូលដ្ឋាននីមួយៗ ដែលសូមឲ្យអាជ្ញាធរមានសមត្ថកិច្ចត្រូវតែមានវិធានការទប់ស្កាត់និងបង្រ្កាបឲ្យបានជាដាច់ខាត។
ស្រាប់តែឥឡូវនេះរដូវកាលថ្មីចាប់ផ្ដេីមមានសង្វៀនជល់មាន់និងអាប៉ោងបេីកលេងយ៉ាងសប្បាយគគ្រឹកគគ្រេង គ្មានឃើញសមត្ថកិច្ចណាបានយកត្រចៀកស្តាប់អនុសាសន៍របស់សម្តេច ស ខេង នោះឡើយ ហេីយថែមទាំងបើកភ្លើងខៀវឲ្យ ឈ្មោះ គ្រុយ មេបនល្បែងសុីសងភ្នាល់ខុសច្បាប់ដ៏ធំនេះមានទីតាំងសម្រាប់ប្តូរលេងចល័តមានពីរកន្លែង,ទី១-បើកលេងនៅភូមិតងឡង និងទី២-បើកលេងនៅភូមិតាវិន ឃុំព្រៃខ្លា ស្រុកស្វាយអន្ទរ ខេត្តព្រៃវែង ហើយទីតាំងទាំងពីរកន្លែងខាងលេីនេះ អាជ្ញាធរនិងសមត្ថកិច្ច ហាក់ដូចជាមិនមានវិធានការចុះទៅហាមឃាត់ឲ្យបញ្ឈប់ដើម្បីទប់ស្កាត់ឬចាត់ការបង្រ្កាបទាល់តែសោះ? ទើបបានជាបណ្តែតបណ្តោយឲ្យ ឈ្មោះ គ្រុយ បើកលេងល្បែងស៊ីសងដោយសេរីដូចជិះសេះលែងដៃយ៉ាងដូច្នេះទៅវិញ។
តាមប្រភពបានឲ្យដឹងថា កាលពីពេលកន្លងមកឈ្មោះ គ្រុយ មេបនល្បែងរូបនេះ បានធ្លាប់បើកសង្វៀនជល់មាន់និងអាប៉ោងដ៏ធំមួយកន្លែងនៅក្នុងមូលដ្ឋាននេះ ប៉ុន្តែអាជ្ញាធរមានសមត្ថកិច្ចបានចុះធ្វើការបង្រ្កាបរួចម្តងហើយ រួចក៏បានផ្អាកអស់មួយរយៈកាលនេះ ហើយបងប្អូនប្រជាពលរដ្ឋខំតែអបអរសាទរ តែមិនបានប៉ុន្មានខ្យល់ផងស្រាប់តែឥឡវនេះ គេបានឃើញ ឈ្មោះ គ្រុយ បាននាំបក្ខពួកមកបេីកដំណើរការលេងសារជាថ្មីទៀតហើយ ដែលថ្មីៗនេះស្របពេលប្រមុខរាជរដ្ឋាភិបាលនិងសម្ដេច ក្រឡាហោម ស ខេង បានដាក់បទបញ្ជាឈប់ឲ្យកើតមានល្បែងសុីសងគ្រប់ប្រភេទនៅតាម រាជធានី ខេត្ត ស្រុក ខណ្ឌ ទាំងអស់ ហើយបើនៅមានកន្លែងណាទៀត អាជ្ញាធរមានសមត្ថកិច្ចគឺត្រូវធ្វើការបង្រ្កាបឲ្យខាងតែបាន។
ដូច្នេះហើយបងប្អូនប្រជាពលរដ្ឋបាននាំគ្នាធ្វើការសំណូមពរសុំដល់ ឯកឧត្តម ជា សុមេធី អភិបាល នៃគណៈអភិបាលខេត្ត និងឯកឧត្តមឧត្តមសេនីយ៍ត្រី ព្រំ សន្ឋរ ស្នងការនគរបាលខេត្តព្រៃវែង ហើយនិងលោកវរៈសេនីយ៍ឯក អ៊ុង ផាន អធិការនគរបាលស្រុកស្វាយអន្ទរ រូមទាំងលោកអភិបាលស្រុកផងដែរ សូមមេត្តាមានចំណាត់ការក្តៅចាត់កម្លាំងក្រោមឱវាទចុះមកពិនិត្យនៅទីតាំងបើកសង្វៀនជល់មាន់និងអាប៉ោងដ៏ធំទាំងពីរកន្លែងរបស់ឈ្មោះ គ្រុយ ដែលកំពុងតែដំណើរការបើកលេងយ៉ាងភ្លូកទឹកភ្លូកដីនៅភូមិ ឃុំខាងលើនេះ ដើម្បីនឹងមានវិធានការទប់ស្កាត់ចាត់កម្លាំងធ្វើការបង្រ្កាបជាបន្ទាន់ទើបអាចរក្សាបាននូវគោលនយោបាយភូមិឃុំមានសុវត្ថភាពទាំង៩ចំណុចរបស់រាជរដ្ឋាភិបាលបានរឹងមាំនិងឲ្យកាន់តែមានប្រសិទ្ធិភាពថែមទៀតផង។
ទាក់ទិននឹងករណីបើកសង្វៀនជល់មាន់របស់ឈ្មោះ គ្រុយ ស្ថិតនៅក្នុងភូមិសាស្ត្រខាងលើនេះ អង្គភាពគេហទំព័រ MSKnews យើងពុំអាចទំនាក់ទំនងជួបការបំភ្លឺពីភាគីណាមួយបានទេនៅខណៈពេលនេះ អង្គភាពយើងនឹងរង់ចាំទទួលព័ត៌មានពីគ្រប់មជ្ឈដ្ឋាននានានិងរួមកិច្ចសហប្រតិបត្តិការជានិច្ចរៀងរាល់ម៉ោងធ្វើការ៕