រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី បានថ្លែងផ្តាំទៅដល់មន្ត្រីគ្រាប់ល្ពៅស្ងោរទាំងឡាយដែលចេះតែអាស្នៀតរណេបរណឺបអែបអប ប៉ុន្តែដឹកនាំធ្វើឲ្យរាស្ត្រស្អប់ខ្ពើម ក្តៅក្រហាយ ធ្វើរបាយការណ៍ប្រឡែប្រឡំបំភាន់ថ្នាក់លើ ហើយឃុបឃឹតគ្នាប្រឌឹតរឿងខូចទម្លាក់កំហុសឲ្យជនរងគ្រោះឈឺចាប់ ជាពិសេសអ្នកពូកែបាញ់បោះសេរី មន្ត្រីខាងបង្កជម្លោះហឹង្សាគឺត្រូវចាប់ដាក់គុកភ្លាមៗ លើសពីនេះមន្ត្រីធ្វើអំពើផ្តេសផ្តាសលួចដីប្រជាពលរដ្ឋលក់ឲ្យឈ្មួញ ប្រព្រឹត្តអំពើពុករលួយត្រូវតែដកតំណែងគ្រវាត់ចោលនឹងត្រូវផ្តន្ទាទោសតាមច្បាប់ជាធរមានទៀតផង។
ករណីប្រើហិង្សាបង្កដោយលោកសក្តិ៤កន្លះ ឯក សារ៉ន អធិការរងនគរបាលខណ្ឌច្បារអំពៅ បានកើតឡើងកាលពីយប់រំលងអាធ្រាត្រឈានចូលថ្ងៃទី២៨ ខែសីហា ឆ្នាំ២០១៩នេះ នៅចំណុចលើស្ពានព្រះមុនីវង្ស ក្នុងខណ្ឌច្បារអំពៅ ខណៈមានករណីរថយន្ត Range Rover មួយគ្រឿងពណ៌ស ពាក់ផ្លាកលេខ 2AF-8899 បើកបុកខឿនសួនច្បារខូចខាតហើយ ព្យាយាមបើកបញ្ច្រាសផ្លូវស្ពាន តែមិនអាចបើកទៅមុខបាន ដោយសារតែរថយន្តនោះដាច់សំបកកង់ចេញពីរថយន្តអស់ធ្វើឲ្យទៅមុខលែងបាន ក៏ឈប់នៅលើស្ពានច្បារអំពៅនោះតែម្តង។
នៅក្នុងហេតុការណ៍នោះ ក៏មានក្រុមអ្នកសារព័ត៌មាន TVFB បានថត Live ហើយក៏ស្រាប់តែលេចមុខលោកសក្តិ៤កន្លះ ឯក សារ៉ន អធិការរងនគរបាលខណ្ឌច្បារអំពៅ ទទួលផ្នែកចរាចរណ៍ មកគំរាមអ្នកសារព័ត៌មាន ដោយបានទះចំមុខមួយកំផ្លៀង និងជេរគេសុទ្ធតែ “អាចុយម្រ៉ាយ” រួចទាញយកទូរស័ព្ទអ្នកសារព័ត៌មានថែមទៀតផង ដោយនិយាយថា “មេតេមក” ។
អ្នកសារព័ត៌មាន TVFB រងនូវអំពើហិង្សាពីមន្ត្រីនគរបាលយុត្តិធម៌ គឺកណ្តាប់ដៃលោកសក្តិ៤កន្លះ ឯក សារ៉ន អធិការរងនគរបាលខណ្ឌច្បារអំពៅ ក្នុងគ្រាដែលគាត់(អ្នកសារព័ត៌មាន)កំពុងបានថត Live ព័ត៌មានទាន់ហេតុការណ៍ករណីរថយន្តទំនើបបើកបុកខឿន ហើយអាចសង្ស័យជាឡានអ្នកធំ ,អ្នកមាន ,អ្នកមានអំណាច,និងព្យាយាមឲ្យបញ្ឈប់ការLive ខ្លាចអាប់យស ម្ចាស់ឡាន តែអ្នកសារព័ត៌មានមិនឲ្យដាច់សាច់រឿង ក៏Liveបន្ត ទើបធ្វើឲ្យលោកអធិការរង ឆេះដុំ ឆួលច្រមុះ ក្តៅស្លឹកត្រចៀក ក្តៅក្រហាយ ទប់កំហឹងមិនបាន មិនចេះដោះស្រាយបញ្ហា បោះការអនុវត្តច្បាប់ចោលក្នុងទឹកទន្លេបាសាក់ ហើយចាប់យកច្បាប់ព្រៃមកអនុវត្ត បញ្ចេញកណ្តាប់ដៃទះកំផ្លៀងបុគ្គលិក TFTV ភ្លាមៗឲ្យទាន់ចិត្តពុះកញ្ជ្រោល។
មជ្ឈដ្ឋានទូទៅជាច្រើន រង់ចាំមើលថា តើលោក អេម សារ៉ាវុធ អធិការនគរបាលខណ្ឌច្បារអំពៅ នឹងមានចំណាត់ការយ៉ាងដូចម្តេចចំពោះលោក ឯក សារ៉ន ? ហើយករណីនេះជនរងគ្រោះត្រូវបានដាក់បណ្តឹង ឬបានសម្របសម្រួលគ្នាបញ្ចប់រឿងយ៉ាងនោះទេ គ្រាន់តែខាងបុគ្គលិកTFTV បាននិយាយយ៉ាងខ្លីថា៖ «ត្រូវទ្រាំនឹងការប្រមាថទាំងអស់ឲ្យបានក្រុមការងារTVFB»។
ទាក់ទឹននឹងករណីខាងលើនេះ អ្នកសារព័ត៌មានយើងមិនទាន់ទទួលបានការបកស្រាយបំភ្លឺពីភាគីពាក់ព័ន្ធណាមួយនៅឡើយ ដោយខណៈពេលនេះពុំមានលេខទំនាក់ទំនង៕