រាជធានីភ្នំពេញ៖ ព្រះរាជអាជ្ញានៃអយ្យការសាលាដំបូងរាជធានីភ្នំពេញ។ លោក កែវ សុធា បាន សម្រេចចោទប្រកាន់ឧកញ៉ា ស្រី សុធា អាយុ៦១ឆ្នាំ ជាប្រធានក្រុមប្រឹក្សាភិបាលក្រុមហ៊ុន 7NG និង ឧកញ៉ា ស្រី ចន្ធូ អាយុ៣៨ឆ្នាំ ជានាយកក្រុមហ៊ុន 7NG ពីបទឆបោក ពាក់ព័ន្ធនឹងការលក់ដីខ្យល់ទំហំ១ហិកតា ស្ថិតនៅភូមិព្រែកចាស់ ឃុំវិហារសួគ៌ ស្រុកខ្សាច់ កណ្តាល ខេត្តកណ្តាល តាមមាត្រា៣៩១ និង មាត្រា៣៩២ នៃក្រមព្រហ្មទណ្ឌ ប្រព្រឹត្តកាលពីអំឡុងឆ្នាំ២០០៨ដល់ឆ្នាំ២០១៩ ពោលគឺរយៈពេល១១ឆ្នាំមកហើយ ។
សូមជម្រាបថា កាលពីពេលកន្លងទៅក៏មានប្រជាពលរដ្ឋផ្ទុះការតវ៉ាដល់ទីស្នាក់ការក្រុមហ៊ុន 7NG ផងដែរ ប៉ុន្តែឧកញ៉ា ស្រី សុធា បានចេញមុខសម្របសម្រួលដោយសន្យាថា នឹងប្រគល់ ដី ជូនអតិថិជនចាប់ពីថ្ងៃទី២៩ ខែមេសា ឆ្នាំ២០១៩ រហូតដល់ថ្ងៃទី៣០ ខែធ្នូ ឆ្នាំ២០១៩ ជា កំហិត ។
នៅក្នុងលិខិតធានាអះអាងចុះថ្ងៃទី២៩ ខែមេសា ឆ្នាំ២០១៩ នេះ ឧកញ៉ា ស្រី សុធា បានសន្យាចំនួន៨ចំណុចដល់អតិថិជន ដោយនៅចំណុចទី១ សរសេរថា “ក្រុមហ៊ុននឹងធ្វើការប្រគល់ដី ឬសំណង់ជូនអតិថិជនឲ្យអស់រួចរាល់ចាប់ ពីថ្ងៃជូនដំណឹងនេះតទៅ រហូតដល់ថ្ងៃទី៣០ ខែធ្នូ ឆ្នាំ២០១៩ ជាកំហិត”។
ប៉ុន្តែក្រោយពីអតិថិជនបានទិញដីរបស់ក្រុមហ៊ុន7NG នៅដើមឆ្នាំ២០១៩នេះ ឈ្មោះ ឈុន ណាវី មានបំណងធ្វើរបងថ្ម ជុំវិញដីរបស់ខ្លួន ស្រាប់តែឈ្មោះ ស្រី សុធា និងឈ្មោះ ស្រី ចន្ធូ ពុំមានដីដូចទីតាំងខាងលើឲ្យឈ្មោះ ឈុន ណាវី ឡើយ។
បើតាមសេចក្តីបញ្ជាក់នៅក្នុងអង្គហេតុ គឺកាលពីថ្ងៃទី១៨ ខែមីនា ឆ្នាំ២០០៨ ឈ្មោះ ឈុន ណាវី ភេទស្រី អាយុ៣៨ឆ្នាំ បានទិញដីទំហំ១ហិកតា ស្ថិតនៅភូមិព្រែកចាស់ ឃុំវិហារសួគ៌ ស្រុកខ្សាច់កណ្តាល ខេត្តកណ្តាល ដែលជាដីរបស់ក្រុមហ៊ុន 7NG ពីឈ្មោះស្រី សុធា គឺ”មា នឯកសារត្រឹមតែលិខិតផ្ទេរសិទ្ធិកាន់កាប់ដីតែប៉ុណ្ណោះ”។
ទន្ទឹមនឹងករណីនេះដែរ នៅមានមួយសំណុំរឿងទៀតដែលលោក ប្លង់ សុផល ព្រះរាជអាជ្ញារងអមសាលាដំបូងរាជធានីភ្នំពេញ កំពុងចាត់ការបណ្តឹងព្រហ្មទណ្ឌមួយ ដែលប្តឹងឧកញ៉ា ស្រី សុធា និងឧកញ៉ា ស្រី ចន្ធូ ពាក់ព័ន្ធបទល្មើសឆបោក ដោយទាមទារសំណងជំងឺចិត្តចំនួន១០ម៉ឺនដុល្លារ ពាក់ព័ន្ធដីនៅភូមិវិហារសួគ៌ ឃុំវិហារសួគ៌ ស្រុកខ្សាច់កណ្ដាល ខេត្តកណ្ដាល ។
សូមបញ្ជាក់ថា មានបងប្អូនប្រជាពលរដ្ឋរាប់ពាន់នាក់ហើយ បានសន្សំលុយជាមួយក្រុមហ៊ុននេះ ដើម្បីចូលបានដីឡូ អស់រយៈពេលជាង១០ឆ្នាំរួចមកហើយ តែនៅមិនបានទទួលដី តែបែរជាមានឈ្មួញកណ្តាលរង់ចាំទិញទៅវិញ ប្រសិនបើមានអ្នកចង់លក់ គឺតម្លៃគេឲ្យ តំលៃស្មើនឹងលុយដែលបានសន្សំប៉ុណ្ណោះ។
យោងតាមដីកាសន្និដ្ឋានបញ្ជូនរឿងឲ្យស៊ើបសួរ ឬហៅពាក្យសាមញ្ញថា ជាដីកាចោទប្រកាន់ កាលពីថ្ងៃទី១៦ ខែសីហា ឆ្នាំ២០១៩ កន្លងទៅនេះ គឺព្រះរាជអាជ្ញា លោក កែវ សុធា បានគូសសញ្ញា “ធិច” ដាក់ឲ្យ(ជនត្រូវចោទទាំង២នាក់) ស្ថិតនៅក្រោមការឃុំខ្លួនបណ្តោះអាសន្ន ដើម្បីបង្ការ ឬបញ្ចប់បទល្មើស កុំឲ្យកើតឡើងជាថ្មី និងធានារក្សាជនត្រូវចោទទុកជូនតុលាការចាត់ការតាមនីតិវិធី។ ប៉ុន្តែបច្ចុប្បន្ននេះ ជនត្រូវចោទទាំង២នាក់ គឺឧកញ៉ា ស្រី សុធា និងកូនបង្កើតគឺឧកញ៉ា ស្រី ចន្ធូ កំពុងស្ថិតនៅក្រៅឃុំនៅឡើយ។
ពាក់ព័ន្ធចំពោះបណ្តឹងព្រហ្មទណ្ឌនេះ បានប្តឹងចូលអយ្យការអមសាលាដំបូងរាជធានីភ្នំពេញ កាលពីថ្ងៃទី១១ ខែមេសា ឆ្នាំ២០១៨ ដែលរហូតមកទល់ពេលនេះ តុលាការពុំទាន់សម្រេចយ៉ាងណានៅឡើយទេ។ អង្គភាពគេហទំព័រMSKnewsពុំអាចធ្វើការទំនាក់ទំនងគ្រប់ភាគីណាមួយបាននៅឡើយទេខណៈពេលនេះ អង្គភាពយើងនឹងរង់ចាំទទួលព័ត៌មាននៅរៀងរាល់ម៉ោងធ្វើការ៕