ខេត្តព្រះសីហនុ៖ បើគិតមកដល់ព្រឹកថ្ងៃទី២៣ ខែមិថុនា ឆ្នាំ២០១៩ នេះ កម្លាំងការិយាល័យអ្នកនាំពាក្យរដ្ឋបាលសាលាខេត្តព្រះសីហនុ បានថ្លែងឲ្យដឹងថា តុល្យការថ្មីចុងក្រោយនៃការរុករកសង្គ្រោះជនរងគ្រោះបានរកឃើញមនុស្សកើនឡើងដល់ ៤១នាក់ហើយ ក្នុងនោះស្លាប់ ១៧នាក់និងរងរបួសចំនួន ២៤ នាក់។ ជាមួយគ្នានោះកម្លាំងសង្គ្រោះសរុប ប្រមាណ ១០០០នាក់ បានធ្វើការរុករកជនរងគ្រោះដែលស្ថិតក្នុងឧប្បទ្ទេវហេតុនៃការរលំបាក់អគារនេះចាប់តាំងពីព្រឹកព្រលឹមរហូតមក ហើយបាននឹងកំពុងបន្តបេសកកម្មរបស់ខ្លួនដើម្បីស្វះស្វែងរកជនរងគ្រោះបន្តទៀតទោះជាស្ថិតនៅក្រោមដំណក់ទឹកភ្លៀងក៏ដោយ។
ដោយសារឃើញបណ្តាញសង្គមFacebookគេទាមទារឲ្យដកតំណែង រឿងបាក់រលំអគារច្រើនពេក សម្ដេចតេជោ ហ៊ុន សែន ឆ្លើយតបទាំងយប់ថា៖ “សូមកុំទាន់និយាយដល់រឿងដកឬតែងតាំងតែត្រូវផ្តោតការយកចិត្តទុកដាក់លើការរុករកនិងសង្គ្រាះជាមុនសិន។” សុំការយោគយល់ពីបងប្អូនជនរួមជាតិពីកន្លែងប្រជុំអាស៊ាននៅបាងកកព្រះរាជាណាចក្រថៃ។”ទោះបីខ្ញុំជាប់ប្រជុំក៏ដោយក៏ខ្ញុំនៅតែតាមដាននូវដំណើរការរុករក និងសង្គ្រាះដែលយប់នេះត្រូវធ្វើទាំងយប់បន្តទៀត”។ សម្តេចតេជោ ហ៊ុន សែន នាយករដ្ឋមន្ត្រី ក៏បានចូលរួមសោកស្តាយយ៉ាងខ្លាំងចំពោះការបាត់បង់អាយុជីវិតពលរដ្ឋ ដោយសារការធ្វេសប្រហែសរបស់ក្រុមហ៊ុនសាងសង់ដែលបណ្តាលឲ្យមានគ្រោះថ្នាក់រលំអគារនេះកើតឡើង។
អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ឲ្យដឹងថា នៅព្រឹកថ្ងៃទី២២ ខែមិថុនា ឆ្នាំ២០១៩ ម្សិលមិញនេះថា អគារដែលរលំបាក់សង្កត់លើមនុស្សស្លាប់ និងរងរបួសច្រើននាក់ នៅសង្កាត់លេខ៤ ក្រុងព្រះសីហនុ ខេត្តព្រះសីហនុនេះ ពុំមានច្បាប់អនុញ្ញាតឲ្យសាងសង់នោះឡើយ។ ទោះបីជាយ៉ាងនេះក្តីអ្នកនាំពាក្យក្រសួងបានថ្លែងឲ្យដឹងថា ជាមួយគ្នានេះអាជ្ញាធរជំនាញ នឹងចុះធ្វើការត្រួតពិនិត្យសំណង់ដែលមិនមានគុណភាព សំណង់សាងសង់ខុសពីលិខិតអនុញ្ញាត និងសាងសង់ដោយគ្មានលិខិតអនុញ្ញាត ដើម្បីមានវិធានការតាមផ្លូវច្បាប់។
សូមបញ្ជាក់ថា ការដ្ឋានសំណង់នេះមានម្ចាស់ឈ្មោះ Chen Kun ភេទប្រុស អាយុ៣៩ឆ្នាំ បានជួលដីសម្រាប់សាងសង់អគារពីឈ្មោះ ញឹក ហ៊ុយ ភេទប្រុស ជនជាតិខ្មែរ អាយុ៦៥ឆ្នាំ ហើយបានម៉ៅការសាងសង់ដោយក្រុមហ៊ុន XI GANG TANG GONG GOU JI HAISAO មានថៅកែម៉ៅការសាងសង់ឈ្មោះ DENG XING GUI ភេទប្រុស អាយុ៤៨ឆ្នាំ និងអ្នកម៉ៅការបូកជញ្ជាំងអគារឈ្មោះ GAO YU ភេទប្រុស អាយុ២៩ឆ្នាំ។
ករណីជនជាតិចិនសង់អគារកណ្ដាលក្រុង កំពស់៧ជាន់សង់ជិតហើយ ស្រាប់តែបាក់សង្កត់មនុស្សស្លាប់និងរបួសជាច្រើននាក់នៅពេលនេះ ហើយរដ្ឋបាលខេត្តព្រះសីហនុថាអត់ច្បាប់និង ធ្លាប់ហាមឃាត់២ដងរួចមកហើយ តែម្ចាស់សំណង់មិនស្ដាប់។ ប៉ុន្តែត្រូវបានគេដាក់ការសង្ស័យថា អាជ្ញាធរនិងមន្ត្រីជំនាញខេត្តព្រះសីហនុកំពុងជាប់ពាក់ព័ន្ធនឹងការឃុបឃឹតគ្នាជាប្រព័ន្ធនៅក្នុងរឿងសំណង់អត់ច្បាប់ជាច្រើនកន្លែងក្នុងខេត្តព្រះសីហនុ ដោយសារតែមានការប្រព្រឹត្តអំពើពុករលួយច្រើន។
ពិតជាកក្រើកខ្លាំងណាស់នៃឧប្បទ្ទេវហេតុបាក់អគារកំពុងសាងសង់មួយកន្លែង ដែលគួរឲ្យសង្វេកពន់ពេកណាស់នៅវេលាម៉ោងជិត៥ៈ០០នាទីព្រឹកព្រលឹមស្រាងៗ ថ្ងៃទី២២ ខែមិថុនា ឆ្នាំ២០១៩នេះ មានករណីបាក់រលំអគារកម្ពស់៧ជាន់ នៅជិតកន្លែងលាងរថយន្តយីហោ “អារុណរះ” ក្នុងសង្កាត់លេខ៤ ក្រុងព្រះសីហនុ ខេត្តព្រះសីហនុ ដែលជាតំបន់ដ៏មានសក្កានុពលភាពនៃសេដ្ឋកិច្ចជាតិរបស់ប្រទេសកម្ពុជា។
ចំណែកប្រជាពលរដ្ឋទូទៅនៅតែមានចម្ងល់ថា បើដឹងហើយថាម្ចាស់សំណង់អគារមួយនេះវាអត់ច្បាប់ហើយ ចុះហេតុអ្វីបានជានៅតែបណ្តែតបណ្តោយឲ្យធ្វើបានរហូតដល់ទៅ៧ជាន់ គេសង់ជិតរួចរាល់ហើយនៅតែមិនបញ្ឈប់គេអត់បានយ៉ាងនេះ?សួរថាតើនៅមានសំណង់អគារប៉ុន្មានទៀតដែលគេហ៊ានធ្វើបែបហ្នឹងបានដែរនោះ?ហើយចៅហ្វាយខេត្តព្រះសីហនុធ្វើការងារដឹកនាំគេរបៀបម៉េច បើខ្លួនឯងគ្មានសមត្ថភាពគួរតែចុះចេញពីតំណែងទៅវាប្រសើរជាង ដើម្បីទុកឱកាសឲ្យអ្នកដែលគេមានសមត្ថភាពគ្រប់គ្រាន់ដឹកនាំបម្រើប្រជាពលរដ្ឋនិងរាជរដ្ឋាភិបាលផង។
ទាក់ទិននឹងការរលំបាក់អគារសង្កត់មនុស្សនេះ អ្នកនាំពាក្យក្រសួងរៀបចំដែនដី ក៏បានបញ្ជាក់ថា សំណង់អគារខាងលើនេះអត់មានច្បាប់អនុញ្ញាតទេ ហើយធ្លាប់ត្រូវបានអាជ្ញាធរជំនាញធ្វើការហាមឃាត់មិនឲ្យសាងសង់ចំនួន២ដងរួចទៅហើយ ប៉ុន្តែម្ចាស់សំណង់មិនចូលរួមសហការ នេះគ្រាន់តែជាការអះអាងយកលេសរួចខ្លួនប៉ុណ្ណោះ ខណៈប្រជាពលរដ្ឋនាំគ្នានិយាយថាអាជ្ញាធរមានសមត្ថកិច្ចខេត្តព្រះសីហនុបានដុតដុំថ្មក្តៅបោះឲ្យសម្តេចតេជោ ហ៊ុន សែន កាន់ គឺសឹងតែគ្រប់រឿងដែលអាជ្ញាធរនិងមន្ត្រីជំនាញបានស៊ី បានសុខសម្ងំស្ងៀមស្ងាត់មិនចាត់ការអ្វីទាំងអស់។
ដូច្នេះប្រជាពលរដ្ឋខេត្តព្រះសីហនុ បានសំណូមពរដល់ប្រមុខរាជរដ្ឋាភិបាល សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា សូមមេត្តាដកហូតតួនាទី មុខតំណែងលោក យន្ត មីន ចៅហ្វាយខេត្តព្រះសីហនុ និងមន្ត្រីជំនាញពាក់ព័ន្ធដទៃទៀតចេញជាបន្ទាន់ ពីព្រោះពួកគាត់គ្មានជំនឿលើការដឹកនាំរបស់មន្ត្រីគ្រាប់ល្ពៅស្ងោរតទៅទៀតទេ ហើយក៏ពុំមែនទើបតែមានករណីរលំសំណង់អគារបាក់សង្កត់មនុស្សស្លាប់នេះដែរ គឺគ្រប់រឿងទាំងអស់លោក យន្ត មីន ដែលជាអភិបាលខេត្តព្រះសីហនុ មិនសូវដែលបានដោះស្រាយជូនប្រជាពលរដ្ឋឲ្យមានតម្លាភាពទទួលយកបាននិងមានភាពយុត្តិធម៌នោះឡើយ។
រហូតមកដល់ពេលនេះបើតាមសមត្ថកិច្ច និងក្រុមជួយសង្គ្រោះបានរកឃើញអ្នកស្លាប់១៧នាក់ និងកម្មកររបួស២៤នាក់ផ្សេងទៀតគិតត្រឹមម៉ោង៦ៈ០០នាទីព្រឹកនេះដែលត្រូវបានជួយសង្គ្រោះចេញពីគំនរបាក់បែកនៃអគារកម្ពស់៧ជាន់ ដែលកំពុងសាងសង់នោះ។តាមការបញ្ជាក់ថា ម្ចាស់សំណង់ឈ្មោះ ជីង គ័ង ជាជនជាតិចិន មានទីតាំងសាងសង់លើផ្ទៃដីទំហំ៥៨៣ម៉ែត្រក្រឡា អាគារនេះជាប្រភេទសំណង់ធ្វើពីឆ្អឹងដែកសង់បានកម្ពស់៧ជាន់ ដោយគ្មានគុណភាពនិងគ្មានលិខិតអនុញ្ញាតសាងសង់នោះទេ៕