183 
ខេត្តព្រះវិហារ៖ ពិតជាថ្លើមធំខ្លាំងណាស់ក្រុមហ៊ុនលំដាប់គ្រាក់ៗមួយចំនួនក្នុងប្រទេសកម្ពុជា ដូចជាក្រុមហ៊ុនសំអឿន សុវណ្ណ នេះតែម្តង ដែលកើតចេញពីការបញ្ចប់កិច្ចសន្យាបស់ក្រុហ៊ុនដួងស្រួចរបស់លោកឧកញ៉ា ឌី ឌុក កាលពីឆ្នាំកន្លងទៅព្រោះតែមិនបានធ្វើការអភិវឌ្ឍជាដុំកំភួនអ្វីទាល់តែសោះ តាមការយល់ព្រមរបស់រាជរដ្ឋាភិបាល ដោយបានសន្យាកាលពីឆ្នាំ២០១០ ថានឹងបញ្ចប់ការកាប់ព្រៃឈើឲ្យបានដល់កម្រិតសូន្យ ក្នុងរយៈពេលមួយទសវត្សរ៍ទៅមុខ ពោលគឺនៅត្រឹមឆ្នាំ ២០២០។ ប៉ុន្តែក្រុមហ៊ុនដួងស្រួចមិនបានគោរពតាមកិច្ចសន្យាថានឹងកាត់បន្ថយ ឬបញ្ឃប់ការកាប់ឈើ តាមរយៈការប្រើប្រាស់នូវធនធានធម្មជាតិ ប្រកបដោយការទទួលខុសត្រូវនោះទេ។
ម៉្យាងវិញទៀតរយៈពេល៩ឆ្នាំមកហើយ ក្រុមហ៊ុនលំដាប់គ្រាក់ៗរបស់ឧកញ៉ា ឌី ឌុក ចាប់តាំងពីដាក់ការសន្យាជាមួយរដ្ឋាភិបាលគេមើលឃើញថា ការកាប់បំផ្លាញព្រៃឈើ បានកើនឡើងជាគំហុក និងគួរឲ្យសង្វេគជាទីបំផុត អស់រាប់រយម៉ឺនហិកតានៃផ្ទៃដីព្រៃរបស់រដ្ឋ ត្រូវបានរងនូវវិនាសកម្មខ្លោចផ្សា កំពុងតែបំផ្លាញអនាគតរបស់ក្មេងៗជំនាន់ក្រោយ។បន្ទាប់ពីក្រសួងកសិកម្មរុក្ខាប្រមាញ់និងនេសាទ ចេញលិខិតនិរាករណ៍ក្រុមហ៊ុនដួងស្រួចចោលរួមកមស្រាប់តែលេចមុខក្រុមហ៊ុនសំអឿន សុវណ្ណ របស់លោក អុឹម សំអឿន ជាប្រធានក្រុមហ៊ុនទទួលបានសិទ្ធិរៀបចំដីឲ្យក្រុមហ៊ុនចិនប្រមាណជិត៥០០០ហិកតា ដោយបានដំណើរការកាប់បំផ្លាញព្រៃនិងដឹកជញ្ជូនឈើអស់រយៈពេលជាង៦ខែដើមឆ្នាំ២០១៩នេះមកហើយ។
តាមសេចក្ដីរាយការណ៍ពីខេត្តព្រះវិហារបានឲ្យដឹងថា សព្វថ្ងៃនេះ ក្រុមហ៊ុនសំអឿន សុវណ្ណ មិនត្រឹមតែកាប់ឈើក្នុងទីតាំងដីសម្បទានសេដ្ឋកិច្ចរបស់ក្រុមហ៊ុនចិនប៉ុណ្ណោះទេ គឺថែមទាំងកំពុងជាប់ពាក់ព័ន្ធនឹងបទល្មើស កាប់ឈើនៅតំបន់ព្រៃព្រះរកា និងព្រៃឡង់ក្នុងដែនឧទ្យានជាតិដែលស្ថិតនៅក្នុងស្រុកឆែប និងស្រុកជ័យសែន ខេត្តព្រះវិហារ គឺកំពុងធ្វើសកម្មភាពកាប់បំផ្លាញនិងដឹកជញ្ជូនយ៉ាងពេញបន្ទុកតែម្តង ហើយអាជ្ញាធរ សមត្ថកិច្ច និងមន្ត្រីជំនាញក្នុងខេត្តនេះគ្មានអើពើធ្វើការចុះទៅទប់ស្កាត់ ឬចាត់វិធានការបង្ក្រាបនោះឡើយ។
ប្រភពពីប្រជាពលរដ្ឋបានឲ្យដឹងថា មានក្រុមហ៊ុនចិនមួយ ដែលទទួលបានដីសម្បទានសេដ្ឋកិច្ចជិត៥ពាន់ហិកតានៅស្រុកឆែប និងស្រុកជ័យសែន សម្រាប់ដាំអំពៅ ដោយពុំទាន់ឃើញមានការដាំដុះអ្វីឲ្យបានប្រាកដច្បាស់លាស់នៅឡើយទេ ហើយបែរជាគេឃើញក្រុមហ៊ុន សំអឿន សុវណ្ណ កាប់ឈើនិងដឹកជញ្ជូនឈើចេញពីតំបន់នោះយ៉ាងពេញបន្ទុកជារៀងរាល់ថ្ងៃប្រព្រឹត្តទៅដោយភាពរលូនបំផុត ដែលទំនងជាក្រុមហ៊ុនសំអឿន សុវណ្ណ បានរៀបចំកញ្ចប់ថវិកាបែងចែកឲ្យគ្រប់ស្ថាប័នទាំងអស់ ដល់មន្ត្រីពាក់ព័ន្ធក្នុងស្រុកក្នុងខេត្តនេះយ៉ាងពេញចិត្តពេញថ្លើមហើយ ទើបបានជាសម្ងំស្ងៀមស្ងាត់គ្រប់គ្នាបែបនេះ។
សូមបញ្ជាក់ថា បញ្ហាដែលធ្វើឲ្យប្រជាពលរដ្ឋមានការងឿងឆ្ងល់នោះ គឺតំបន់ដែលក្រុមហ៊ុនចិនទទួលបានដីសម្បទានសេដ្ឋកិច្ចជិត៥ពាន់ហិកតានោះ គឺជាតំបន់ដែលមានព្រៃក្រាស់ៗ សម្បូរទៅដោយឈើប្រណីត ឈើប្រភេទលេខ១ និងឈើប្រភេទលេខ២ ដែលមានទំហំមុខកាត់ធំៗ ឬហៅថាឈើហ៊ុបនោះ ចុះហេតុអ្វីបានជាមន្ត្រីគ្រាប់ល្ពៅស្ងោរទាំងនោះធ្វើរបាយការណ៍កុហក់ថ្នាក់ដឹកនាំថា ជាតំបន់ព្រៃរេចរិលប្រើយុទ្ធសាស្ត្រស្បែកខ្លាទៅបង្ហាញ ដើម្បីឲ្យរដ្ឋាភិបាលផ្តល់ដីសម្បទានសេដ្ឋកិច្ចទៅឲ្យក្រុមហ៊ុនចិនយ៉ាងដូច្នេះទៅវិញ? រួចបើកដៃឲ្យក្រុមហ៊ុនសំអឿន សុវណ្ណ កាប់បំផ្លាញនិងដឹកជញ្ជូនឈើយកទៅលក់យ៉ាងរំភើយគួរឲ្យសោកស្តាយព្រៃឈើដ៏សម្បូរបែបនៅក្នុងដែនអភិរក្សរបស់ឧទ្យានជាតិស្រុកឆែបនិងស្រុកជ័យសែន។
ប្រមុខរាជរដ្ឋាភិបាល សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងដាក់បទបញ្ជាឲ្យក្រសួងពាក់ព័ន្ធត្រូវពិនិត្យមើលឲ្យបានហ្មត់ចត់រាល់សកម្មភាពនៃការកាប់បំផ្លាញព្រៃឈើដើម្បីរានយកដីធ្វើជាកម្មសិទ្ធរបស់ក្រុមហ៊ុននានាដែលទទួលបានសិទ្ធវិនិយោគលើដីសម្បទានដែលរាជរដ្ឋាភិបាលបានជួលក្នុងរយៈពេល៩៩ឆ្នាំហើយខកខានពុំបានអនុវត្តន៍តាមកិច្ចព្រមព្រៀងនោះទេ គឺត្រូវចាត់វិធានការជាបន្ទាន់ដោយដាក់ពិន័យ ឬលុបចោលកិច្ចសន្យាសម្បទានក្នុងករណីធ្ងន់ធ្ងរ ខណៈសម្តេតេជោ ហ៊ុន សែន បានបញ្ជាក់យ៉ាងដូច្នេះថា”ត្រូវតែបញ្ចប់ដាច់ខាតការកាប់រានហ៊ុមព័ទ្ធដុតរំលោភយកដីព្រៃឈើធ្វើជាកម្មសិទ្ធិដែលបានកើតឡើងក្រោយថ្ងៃទី៧ ខែឧសភា ឆ្នាំ២០១២”។
បើយ៉ាងដូច្នេះមែនគួរតែលោក វេង សាខុន ដែលជារដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ ល្មមដល់ពេលយកច្បាប់មកអនុវត្តន៍ចំពោះក្រុមហ៊ុនសំអឿន សុវណ្ណ និងមន្ត្រីរបស់ខ្លួន រួមទាំងអ្នកពាក់ព័ន្ធទាំងអស់នោះ គឺត្រូវតែទទួលទោសតាមច្បាប់ស្ដីពីព្រៃឈើទៅលើជនទាំងឡាយណាដែលជាប់ពាក់ព័ន្ធនឹងការប្រព្រឹត្តបទល្មើសព្រៃឈើតាមថ្នាក់ទី១ ដែលត្រូវជាប់ពន្ធនាគារពីប្រាំ(៥)ឆ្នាំ ទៅដប់(១០)ឆ្នាំ និងត្រូវ រឹបអូសវត្ថុតាងទាំងអស់មកជាសម្បត្តិរដ្ឋ ដកហូតកិច្ចព្រមព្រៀង អាជ្ញាប័ណ្ណ លិខិតអនុញ្ញាត និងកំទេចចោលវត្ថុតាងក្លែងបន្លំ។
មជ្ឈដ្ឋានប្រជាពលរដ្ឋបានសំណូមពរដល់ថ្នាក់ដឹកនាំរាជរដ្ឋាភិបាលចាត់វិធានការជាបន្ទាន់ ចំ ពោះជនណា ដែលបានប្រព្រឹត្តបទល្មើស ដូចជាលួចកាប់បំផ្លាញព្រៃឈើ,ការកាប់រានព្រៃ,ឈូសឆាយដីព្រៃ, ហ៊ុំព័ទ្ធកាន់កាប់ដីព្រៃ,គ្រៀវ ដុត,បំពុល,កាប់ផ្តួលរំលំដើមឈើ ឬគាស់រំលើងប្រមូលគល់ឈើជាដើម។ល។ ហើយក្នុងករណីបើជនណាប្រព្រឹត្តបទល្មើសព្រៃឈើនៅតែមិនរៀងចាលត្រូវផ្តន្ទាទោសទ្វេរដងនៃបទល្មើសព្រៃឈើថ្នាក់ទី១ នៃច្បាប់នេះ។ ដូច្នេះក្រសួងកសិកម្មគួរពិនិត្យឲ្យបានស៊ីជម្រៅទៅលើក្រុមហ៊ុនសំអឿន សុវណ្ណ កំពុងកាប់បំផ្លាញនិងដឹកជញូនឈើយ៉ាងពេញបន្ទុកក្នុងដែនឧទ្យានជាតិស្រុកឆែបនិងស្រុកជ័យសែនទាំងថ្ងៃទាំងយប់យ៉ាងអនាធិតេយ្យដោយគ្មានខ្លាចអ្វីទាំងអស់។
អង្គភាពគេហទំព័រMSKnewsយើងពុំអាចធ្វើការទំនាក់ទំនងជាមួយក្រុមហ៊ុននិងមន្ត្រីជំនាញជុំវិញព័ត៌មានខាងលើបានទេខណៈពេលទូរស័ព្ទជាច្រើនដងគ្មានអ្នកលើកទទួលទេ នេះប្រហែលជាដឹងខ្លួនខ្លាចរន្ទះបាញ់ងាប់ហើយមើលទៅអង្គភាពយើងនឹងរង់ចាំទទួលការបំភ្លឺជានិច្ចរៀងរាល់ម៉ោងធ្វើការ៕
