157 
ខេត្តរតនគិរី៖ តាមសេចក្តីរាយការណ៍ថ្មីៗនេះ មេខ្លោងឈ្មួញឈើដ៏ល្បីល្បាញ និងជាអតីតមេភូមិ ឈ្មោះ នីកាចាញ កំពុងធ្វើសកម្មភាពល្មើសច្បាប់ ដោយបានជួលកម្មករសម្រុកចូលទៅលួចកាប់ឈើយ៉ាងកក្រើក នៅក្បែរភូមិភិ ឃុំសេសាន ស្រុកអូរយ៉ាដាវ ខេត្តរតនគិរី រហូតដល់បង្គោល១៤ និង១៥ ក្នុងឃុំញ៉ាង ស្រុកអណ្តូងមាស ដោយអូសឈើហ៊ុបមូលតាមរថយន្តកែច្នៃ ចូលក្នុងទឹកទន្លេសេសាន រួចបណ្តែតជាក្បូន ឆ្លងដែនចូលទៅក្នុងទឹកដីវៀតណាម ដូចហែកឋិន ប៉ុន្តែគ្មានមន្ត្រី និងសមត្ថកិច្ចណាហ៊ានក្អកជាមួយមេឈ្មួញរូបនេះឡើយ។
ជាក់ស្តែងកាលពីយប់ម្សិលមិញនេះ នៅច្រកហ្វាសាវ ឃុំញ៉ាង មានរថយន្តឡង់គ្រីស័រនិងម៉ូតូដឹកឈើប្រមាណជាង១០០គ្រឿងបានសម្រុកដឹកចេញពីតំបន់ឧទ្យានជាតិវីរៈជ័យឆ្លងដែនទៅប្រទេសវៀតណាម ក្រោមការគ្រប់គ្រងផ្តាច់មុខរបស់លោក នី កាចាញ ជាឈ្មួញដ៏ល្បីឈ្មោះខាងរត់ពន្ឋឈើខុសច្បាប់ទៅក្រៅប្រទេស ដែលមហាជននិយាយថា ករណីរត់ពន្ឋឈើឆ្លងដែនចេញទៅក្រៅប្រទេសបែបនេះ បើមិនមានការអនុញ្ញាតពីអាជ្ញាធរ សមត្ថកិច្ច និងមន្ត្រីជំនាញក្នុងខេត្តរតនគិរី ជាពិសេសប៉ូលិសព្រំដែន ទាហានព្រំដែនទេ ច្បាស់ជាក្រុមឈ្មួញមិនហ៊ានថ្លើមធំនោះឡើយ។
គួររំឭកថាសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញបញ្ជាឲ្យនាយឧត្តមសេនីយ៍ សៅ សុខា បាញ់គ្រាប់រ៉ុកកែតពីលើយន្តហោះកម្ទេចជនល្មើសកាប់បំផ្លាញព្រៃឈើជាបន្ទាន់ ខណៈ បទល្មើសឧក្រិដ្ឋកម្មក្នុងវិស័យព្រៃឈើនៅកម្ពុជាកំពុងរងការវិនាស ជាពិសេសប្រមុខរាជរដ្ឋាភិបាលបានដាក់ចេញនូវបម្រាមមិនឲ្យមានការនាំឈើចេញទៅវៀតណាមជាដាច់ខាត ចុះហេតុអ្វីបានជាព្រៃឈើសហគមន៍នៅស្រុកអណ្តូងមាសកំពុងត្រូវបានកាប់បំផ្លាញយ៉ាងរង្គាលក្រោមស្នាដៃរបស់មេឈ្មួញ នី កាចាញ តើចៅហ្វាយខេត្តរតនគិរី ហ៊ានបង្ក្រាបការដឹកជញ្ជូនឈើហ៊ុបរបស់ ឈ្មោះ នី កាចាញ ដែលកំពុងកាប់បំផ្លាញ និងដឹកជញ្ជូនឆ្លងដែនទៅប្រទេសវៀតណាមនេះដែរទេ?។
បើតាមប្រជាសហគមន៍ការពារព្រៃឈើ បានបញ្ជាក់យ៉ាងច្បាស់ថា សកម្មភាពកាប់ឈើដោយខុសច្បាប់នេះ គឺស្ថិតនៅក្បែរភូមិបាដល ឃុំញ៉ាង ស្រុកអណ្តូងមាស ខេត្តរតនគិរី ដោយប្រើរថយន្តបង្កុងដឹកឈើហ៊ុបមូល ទើបតែកាប់បានថ្មីៗនៅស្រស់ៗ ពីដែនព្រៃឈើសហគមន៍ ដោយមានឈ្មោះ ប៉ិច ជាអ្នកផ្ដល់លុយរាប់ម៉ឺនដុល្លារទៅឲ្យប្រធានសហគមន៍ ឈ្មោះ រចំ ស្មើល មន្ត្រីរដ្ឋបាលព្រៃឈើ,មន្ត្រីបរិស្ថាន ដើម្បីបើកដៃឲ្យមេឈ្មួញឈើទុច្ចរិតទាំងនេះ អាចដឹកនាំគ្រឿងចក្រ និងកម្មករចូលទៅកាប់បំផ្លាញព្រៃឈើសហគមន៍ទាំងបំពានច្បាប់។
ដោយសារមិនមានវិធានការផ្លូវច្បាប់ឲ្យបានតឹងតែងចំពោះសកម្មភាពកាប់បំផ្លាញ និងដឹកជញ្ជូនផល អនុផលព្រៃឈើនៅក្នុងខេត្តរតនគិរី បានធ្វើឲ្យក្រុមឈ្មួញឈើទុច្ចរិត នាំមុខដោយឈ្មោះ នី កាចាញ នៅតែបន្តសកម្មភាពកាប់បំផ្លាញព្រៃឈើក្នុងដែនសហគមន៍ ដែលមានទីតាំងស្ថិតនៅក្នុងស្រុកអណ្ដូងមាស រួចដឹកជញ្ជូនឈើហ៊ុបមូលទាំងនេះ ចូលកន្លែងករដ្ឋានកែច្នៃរូួចដឹកឆ្លងដែនទៅលក់ក្នុងទឹកដីវៀតណាម ដោយមិនញញើតច្បាប់ឡើយ ព្រោះមេឈ្មួញ នី កាចាញ បានចំណាយលុយអស់រាប់សែនដុល្លារបិទមាត់សមត្ថកិច្ចនិងមន្ត្រីជំនាញគ្រប់ស្ថាប័ន ទើបមានការឃុបឃឹតគ្នាជាលក្ខណៈប្រព័ន្ធ ដែលអាចឲ្យឈ្មួញឈើ នី កាចាញ បានដំណើរការយ៉ាងរលូនបំផុតនោះ ដោយគេដាក់ការសង្ស័យថា លោក ថាវ យ៉េន មេប៉េអឹមខេត្តរតនគិរី អាចជាប់ពាក់ព័ន្ធនឹងផលប្រយោជន៍ លាភសក្ការៈយ៉ាងក្រាស់ក្រែលផងដែរ។
ប្រភពច្បាស់ការណ៍នេះបានឲ្យដឹងថា មេឈ្មួញរកស៊ីឈើខុសច្បាប់ ឈ្មោះ នីកាចាញ បាននាំគ្រឿងចក្រនិងគៀងគរបក្ខពួក ដៃជើងរបស់ខ្លួន តាមជំនាញ មានអ្នកមើលព្រៃ អ្នកឆ្ការព្រៃ អ្នកអារផ្តួលរលំឈើ អ្នកអូសឈើ អ្នកដឹកឈើ អ្នកប្រមូលឈើ ចូលទៅក្នុងតំបន់ឧទ្យានជាតិវរៈជ័យ និងព្រៃសហគមន៍ពីរកន្លែងស្ថិតនៅស្រុកអណ្តូងមាស ខេត្តរតនគិរី ដើម្បីប្រមូលយកឈើដឹកជញ្ជូនឆ្លងដែនទៅលក់ឲ្យឈ្មួញវៀតណាមតាមមធ្យោបាយដូចជារថយន្តទេសចរណ៍ រថយន្តឡង់គ្រីស័រដឹកចូលច្រករបៀងហ្វាសាវទាំងជើងគោក ជើងទឹក ជារៀងរាល់ថ្ងៃរាល់យប់និងដឹកតាមរថយន្តយីឌុបចូលច្រកអូរយ៉ាដាវ។
ប្រភពបានឲ្យដឹងទៀតថា មេឈ្មួញឈើខុសច្បាប់ឈ្មោះ នីកាចាញ នេះបានធ្វើសកម្មភាពដឹកជញ្ជូនឈើប្រណីតជាទ្រង់ទ្រាយធំ ចេញពីស្រុកអូរជុំ ឆ្លងកាត់ទីរួមខេត្ត ក្រុងបានលុង ឆ្ពោះទៅកាន់ច្រកទ្វារព្រំដែនអន្តរជាតិអូរយ៉ាដាវ ដោយដឹកតាមរថយន្តយីឌុបភ្លៅ៦ ប៉ុន្តែជាបន្តបន្ទាប់ទៀតរហូតសព្វថ្ងៃ ឈ្មួញរូបនេះ បានប្តូររូបភាពដឹកជញ្ជូនឈើប្រណីត ដោយខុសច្បាប់តាមរថយន្តប្រភេទទេសចរណ៍វិញ ដើម្បីចូលទៅលក់ក្នុងទឹកដីប្រទេសវៀតណាម តាមច្រកទ្វារព្រំដែនអន្តរជាតិអូរយ៉ាដាវ ដោយមានការឃុបឃិតពីសមត្ថិកិច្ច និងអាជ្ញាធរខេត្តរតនគិរីនេះតែម្តង។
ដូច្នេះឃើញថាបច្ចុប្បន្ននេះ បទល្មើសព្រៃឈើជារឿងក្តៅគគុកដែលមិនអាចអត់ឱនឲ្យបានឡើយ ក្នុងនោះមានទាំងសមត្ថកិច្ចថ្នាក់ជាតិ-ក្រោមជាតិ អាជ្ញាធរ សមត្ថកិច្ច ជំនាញច្រើនស្ថាប័នណាស់ ចុះហេតុអ្វីក៏នៅតែកើតមានជាទ្រង់ទ្រាយធំបាននៅខេត្តរតនគិរីទៀត ដែលបញ្ហានេះ បើលោក ថង សាវុន អភិបាលនៃគណៈអភិបាលខេត្តរតនគិរី, លោក ថាវ យ៉េន ស្នងការខេត្តរតនគិរី និងលោកនាយឧត្តមសេនីយ៍ សៅ សុខា មេប៉េអឹមលើផ្ទៃប្រទេសបើិសិនជាអស់លោកមិនបានជាប់ពាក់ព័ន្ធនឹងផលប្រយោជន៍នោះទេ គួរតែមានវិធានការទប់ស្កាត់ និងបង្ក្រាបតាមបទបញ្ជារបស់ប្រមុខរាជរដ្ឋាភិបាល និងបទបញ្ជារបស់សម្តេចក្រឡាហោម ស ខេង ជាបន្ទាន់ផងទាន…!បើមិនអញ្ចឹងទេច្បាស់ជាព្រៃឈើតំបន់ឧទ្យានជាតិវរៈជ័យនឹងរលាយជាក់ជាមិនខាន។
ទាក់ទិននឹងការកាប់និងដឹកជញ្ជូនឈើរបស់មេឈ្មួញឈ្មោះ នី កាចាញ អង្គភាពគេហទំព័រMSKnewsយើងពុំអាចធ្វើការទំនាក់ទំនងជាមួយភាគីពាក់ព័ន្ធខាងលើនេះបានទេនៅពេលនេះ ទោះយ៉ាងណាក្តីអង្គភាពយើងនឹងរង់ចាំទទួលព័ត៌មានថ្មីៗបន្ថែមទៀតនៅរៀងរាល់ម៉ោងធ្វើការ៕
