ខេត្តក្រចេះ៖ ថ្វីត្បិតតែព្រៃឈើ និងធនធានធម្មជាតិ ត្រូវបានការដោយច្បាប់តាមរយៈការបង្កើតស្ថាប័ន អង្គភាព ជំនាញនិងយន្តការជាច្រើនទៀត ដើម្បីទប់ស្កាត់បទល្មើសឧក្រិដ្ឋកម្មក្នុងវិស័យព្រឈើនៅកម្ពុជា ជាពិសេសប្រមុខរាជរដ្ឋាភិបាលបានដាក់ចេញនូវបម្រាមមិនឲ្យមានការនាំឈើចេញទៅវៀតណាមជាដាច់ខាត។ សម្តេចតេជោ ហ៊ុន សែន ធ្លាប់បានចេញបញ្ជាឲ្យនាយឧត្តមសេនីយ៍ សៅ សុខា បាញ់គ្រាប់រ៉ុកកែតពីលើយន្តហោះកម្ទេចជនល្មើសកាប់បំផ្លាញព្រៃឈើទៀតផង។
ឥឡូវនេះបែរជាសកម្មភាពបទល្មើសព្រៃឈើរបស់លោកឧត្តមសេនីយ៍ ថន ប៊ុនធី ហៅធីបាញ់ កំពុងធ្វើសកម្មភាពដឹកជញ្ជួនឈើកាន់តែព្រហើនដាក់សម្តេចតេជោ ហ៊ុន សែន ដោយគ្មានញញើតកោតខ្លាចអ្វីទាំងអស់ ពោលគឺមេឈ្មួញឈើដ៏ល្បីល្បាញដែលជាមន្ត្រីយោធាមានឋានៈឧត្តមសេនីយ៍ផ្កាយ១រូបនេះគិតតែពីផលប្រយោជន៍ផ្ទាល់ខ្លួនក្នុងរបរជម្នួញឈើខុសច្បាប់ដែលកំពុងសម្រុកដឹកជញ្ជូនទាំងថ្ងៃទាំងយប់តាមរថយន្តសាំយ៉ុងយកទៅលក់នៅឯប្រទេសវៀតណាមបានយ៉ាងរលូនជារៀងរាល់ថ្ងៃ ខណ:អាជ្ញាធរមានសមត្ថកិច្ចពាក់ព័ន្ធហាក់បីដូចជានៅសង្ងំស្ងៀមឈឹង ដែលគេសង្ស័យថាអាចនឹងទទួលបានផលប្រយោជន៍ពីមេឈ្មួញឈើធីបាញ់យ៉ាងក្រាស់ក្រែលផងដែរ។
តាមសេចក្តីរាយការណ៍ឲ្យដឹងថា សព្វថ្ងៃនេះជំនួញឈើឆ្លងដែនខុសច្បាប់របស់មេឈ្មួញឈើដុះស្លែ លោក ថន ប៊ុនធី ហៅធីបាញ់ដែលមានមុខងារជាទាហានពាក់ផ្កាយ១ នៅក្នុងក្រសួងការពារជាតិ បានចាប់ផ្តើមរកសុីដឹកជញ្ជួនឈើប្រណីតឆ្លងដែនខុសច្បាប់យ៉ាងកក្រើកសារជាថ្មី ក្រោយពីស្ងប់ស្ងាត់មួយរយៈពេលខ្លីរួចមក នៅភូមិភាគឦសាន្ត សូម្បីលោក សាន្ត ប៊ុនថាន មេប៉េអឹមខេត្តក្រចេះ ក៏មិនហ៊ានប៉ះពាល់ដល់ការរកស៊ីល្មើសច្បាប់របស់មេឈ្មួញឈើ ធីបាញ់នេះបានឡើយ។
ប្រភពបន្តថាការដឹកជញ្ជួនឈើជារៀងរាល់យប់ ថ្ងៃរបស់ឈ្មោះ ធីបាញ់ មេឈ្មួញឈើដុះស្លែរម្នាក់នេះ គឺដឹកចេញពីចំណុចមាត់ទន្លេកោះខ្ញែរ ហើយដឹកយកទៅទំលាក់នៅជិតផ្លូវជាតិលេខ៧-A បន្ទាប់មកធ្វើការលើកដាក់លើរថយន្តសាំយ៉ុងជាច្រើនគ្រឿងទៀត ដើម្បីយកទៅលក់នៅឯប្រទេសវៀតណាមយ៉ាងរលូនដោយគ្មានស្ថាប័ន ជំនាញ ឬសមត្ថកិច្ចណាហ៊ានទៅស្ទាក់ចាប់និងបង្ក្រាបនោះទេ។
ប្រភពបន្តឲ្យដឹងទៀតថាមេឈ្មួញឈើ ធី បាញ់ បាននាំឈើចេញទៅលក់នៅវៀតណាមឆ្លងតាមច្រករបៀងដេ៤,ដេ៥និងតាមច្រកអន្តរជាតិត្រពាំងស្រែ ស្រុកស្នួល ខេត្តក្រចេះ យ៉ាងគគ្រឹកគគ្រេងដោយភាពរលូនបំផុត ធ្វើឲ្យប្រជាពលរដ្ឋមានការងឿងឆ្ងល់ថា សម្ដេចតេជោ ហ៊ុន សែ ន នាយករដ្ឋមន្ត្រី ធ្លាប់បានប្រកាសដាច់ខាត គឺមិនឲ្យនាំឈើឆ្លងដែនទៅលក់នៅប្រទេសវៀតណាមទេ ប៉ុន្តែចុះហេតុអ្វីគេនៅតែមើលឃើញជាក់ស្ដែង មន្ត្រីជំនាញនិងសមត្ថកិច្ចប្រចាំការច្រកព្រំដែន នៅតែរៀបចំបែបបទ នឹងឡប់ប៊ីគ្រប់រូបភាព ក្នុងការសម្រួលឲ្យមេឈ្មួញ ធី បា ញ់ បាននាំឈើយកទៅលក់នៅប្រទេសវៀតណាមដដែលជាដដែល។
ប្រជាពលរដ្ឋ ដែលរស់នៅក្នុងស្រុកស្នួល ខេត្តក្រចេះ កំពុងតែព្រួយបារម្ភអំពីការវិនាសហិនហោចព្រៃឈើក្នុងខេត្តមួយនេះទៅថ្ងៃអនាគត ជាក់ជាមិនខានព្រោះថាព្រៃឈើកំពុងត្រូវកាប់បំផ្លាញស្ទើរតែគ្មានសល់ទៅហើយ ដូច្នេះហើយទើបប្រជាពលរដ្ឋបាននាំគ្នាធ្វើការសំណូមពរទៅដល់នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិទទួលបន្ទុកខាងបង្រ្កាបបទល្មើសព្រៃឈើទូទាំងព្រះរាជាណាចក្រកម្ពុជា សូមឯកឧត្តមមេត្តាចាត់កម្លាំងជំនាញចុះមកត្រួតពិនិត្យមេឈ្មួញដុះស្លែ ធី បាញ់ ដែលកំពុងប្រព្រឹត្តបទល្មើសខាងកាប់បំផ្លាញព្រៃឈើជាបន្ទាន់ផង បើហោះល្បាតឃើញហើយបាញ់កម្ទេចចោលតែម្តង នេះជាបទបញ្ជារបស់ប្រមុខរាជរដ្ឋាភិបាលដែលប្រជាពលរដ្ឋចង់បាននោះ។
អង្គភាពគេហទំព័រMSKnewsពុំអាចធ្វើការទំនាក់ទំនងជាមួយភាគីពាក់ព័ន្ធខាងលើបានទេនៅពេលនេះយើងនឹងរង់ចាំទទួលព័ត៌មានថ្មីៗបន្ថែមទៀតរៀងរាល់ម៉ោងធ្វើការ៕