រាជធានីភ្នំពេញ៖ នៅថ្ងៃពុធ១១រោច ខែចេត្រ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០១ ខែឧសភា ឆ្នាំ២០១៩ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានទទួលជួបសវនាការ និងទទួលអំណោយសប្បុរសធម៌ មកពីបណ្តាក្រុមហ៊ុនចំនួន១៩ក្នុងនោះ១៧ក្រុមហ៊ុនដឹកនាំតំណាងដោយអ្នកឧកញ៉ា ហ៊ុន តូ ដើម្បីយកទៅជួយដល់ជនរងគ្រោះ និងងាយរងគ្រោះដោយកត្តាផ្សេងៗ។អំណោយដែលសប្បុរសជន តំណាងក្រុមហ៊ុនទាំងនោះនាំមកផ្តល់ជូនកាកបាទក្រហមកម្ពុជារួមមាន៖ អ្នកឧកញ៉ា ហ៊ុន តូ ប្រធានក្រុមហ៊ុន អិល អិល អេស៊ាន អ៊ីនវេសមេន និងសហការីថវិកាចំនួន ២.៤១០.០០០$ (ពីរលានសែសិបមួយម៉ឺនដុល្លារ), លោកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន អកស៍ឡី វើសដ៍ប៊្រីដ ខេមបូឌា និងសហការី ថវិកាចំនួន១៥០០០០$(ដប់ប្រាំម៉ឺនដុល្លារ)និងលោក លី ដុងហ៊ួន អគ្គនាយករងក្រុមហ៊ុន ដុងអេ ធីអេស និងសហការី ថវិកកាចំនួន១០០០០០$(ដប់ម៉ឺនដុល្លារ)។
សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានថ្លែងអំណរគុណ និងស្វាគមន៍យ៉ាងកក់ក្តៅចំពោះគណៈប្រតិភូ ដែលបាននាំយកអំណោយមកផ្តល់ជូនកាកបាទក្រហមកម្ពុជានៅថ្ងៃនេះ។សម្ដេចកិត្តិព្រឹទ្ធបណ្ឌិត មានការជម្រាបជូនភ្ញៀវពីការរៀបចំទិវាពិភពលោក ៨ ឧសភា ទិវាកាកបាទក្រហម-អឌ្ឍចន្ទក្រហមខួបលើកទី១៥៦ ដែលជាទិវាជាពិសេស ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន សម្រាប់អំពាវនាវស្វែងរកអំណោយមនុស្សធម៌ពីសប្បុរសជននានានៅក្នុងទិវាថ្ងៃនោះដើម្បីបរិច្ចាគនូវអំណោយមនុស្សធម៌តាមសទ្ធាជ្រះថ្លា។សម្តេចកិត្តិព្រឹទ្ធបណ្ឌិតបញ្ជាក់ថា តាមរយៈសកម្មភាពនោះ នឹងជួយដល់កាកបាទក្រហមកម្ពុជាក្នុងការបន្តធ្វើសកម្មភាព ក៏ដូចជាបេសកកម្មមនុស្សធម៌របស់ខ្លួន ក្នុងការបន្តជួយដល់ប្រជាជនរងគ្រោះនៅទូទាំងប្រទេស ហើយជាពិសេសគឺការឆ្លើយតបទៅនឹងតម្រូវការរបស់បងប្អូនប្រជាពលរដ្ឋជាក់ស្ដែង។
ជាពិសេសដើម្បីឆ្លើយតបទៅនឹងតម្រូវការរបស់ប្រជាជន ពិសេសស្ដ្រីមេម៉ាយ ចាស់ជរា គ្មានទីពឹង ក៏ដូចជាប្រជាជន ដែលបានរងគ្រោះដោយគ្រោះមនហន្ដរាយនានា, មានហើយក៏បានសាងសង់ផ្ទះជូនប្រជាពលរដ្ឋរងគ្រោះ ដោយភ្លើងឆេះ ខ្យល់កន្ដ្រាក់ ជាដើម។ លើសពីនេះកាកបាទក្រហមកម្ពុជា ក៏បានសហការជាមួយរាជរដ្ឋាភិបាល និងបន្ដជួយផ្គត់ផ្គង់នូវទឹកស្អាត ជូនដល់ប្រជាពលរដ្ឋតាមរយៈការជីកអណ្ដូង និងជីកស្រះជាដើម។
ទន្ទឹមនឹងនោះ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ក៏បានថ្លែងអំណរគុណដ៏ជ្រាលជ្រៅ ដល់សប្បុរសជនទាំងអស់ ដែលតែងតែចូលរួមផ្ដល់ថវិកា និងសម្ភារៈផ្សេងៗ ដើម្បីបន្ដសកម្មភាពមនុស្សធម៌ជួយសង្គ្រោះ និងសម្រាលទុក្ខលំបាកតាមរយៈអំណោយដ៏ថ្លៃថ្លារបស់សប្បុរសជនដល់ប្រជាពលរដ្ឋយើង៕