ខេត្តបន្ទាយមានជ័យ៖ យ៉ាងហោចណាស់មនុស្សចំនួន១១៤នាក់សង្ស័យថាបាននឹងកំពុងលួចឆ្លងដែនខុសច្បាប់ ហើយក៏ត្រូវបានកម្លាំងនគរបាលវរៈសេនាតូចការពារព្រំដែនលេខ៨១៥ប្រចាំតំបន់ស្រុកម៉ាឡៃធ្វើការឃាត់ខ្លួននៅក្នុងពេលប្រតិបត្តិការចុះល្បាតកាលពីយប់កណ្តាលអធ្រាត្យវេលាម៉ោង១២និង១៥នាទីថ្ងៃអាទិត្យទី២៨ ខែមេសា ឆ្នាំ២០១៩ នៅចំណុចភូមិក្បាលស្ពាន ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ។
លោក ហេង ប៉ូរ៉ាម៉ូ នាយប៉ុស្តិ៍ស្ពានម៉ាឡៃនឹងបានសហការជាមួយអង្គភាពវរៈសេនាតូចនគរបាលការពារព្រំដែនលេខ៨១៥តំបន់ស្រុកម៉ាឡៃ បានចាត់តាំងនិងដឹកនាំកម្លាំងក្នុងកិច្ចសហការជាមួយអាជ្ញាធរមូលដ្ឋានដើម្បីការពារ រក្សាសុវត្ថិភាពភូមិ ឃុំ ឲ្យបានរឹងមាំតាមគោលការណ៍របស់ថ្នាក់ដឹកនាំនិងរាជរដ្ឋាភិបាល ជាពិសេសការទប់ស្កាត់ពលករឆ្លងដែនដោយខុសច្បាប់ផងដែរ។
ជាក់ស្តែងលោកបានដឹកនាំកម្លាំង៣នាក់ចុះដេីរល្បាតនៅក្នុងភូមិសាស្រ្តដែលលោកទទួលខុសត្រូវលុះមកដល់ចំណុចភូមិក្បាលស្ពាន ឃុំម៉ាឡៃ ស្រុកម៉ាឡៃក៏បានជួបប្រទះពលករលួចឆ្លងដែនខុសច្បាប់ចំនួន១១៤នាក់ ក្នុងនោះ(ស្រី៤៨នាក់)និងកុមារ៩នាក់ ដែលពួកគាត់បានមកពីខេត្តផ្សេងៗគ្នា ។ បើតាមការសាកសួរមានពលករមកពីខេត្តពោធិសាត់ចំនួន១២នាក់,ខេត្តកំពតចំនួន២នាក់,ខេត្តបាត់ដំបងចំនួន១៩នាក់,ខេត្តព្រៃវែងចំនួន២៤នាក់,ខេត្តបន្ទាយមានជ័យចំនួន២៦នាក់,ខេត្តកំពង់ធំចំនួន៣នាក់,ខេត្តសៀមរាបចំនួន១០នាក់,ខេត្តឧត្តរមានជ័យចំនួន៤នាក់,ខេត្តស្វាយរៀងចំនួន៣នាក់,ខេត្តកំពង់ចាមចំនួន៨នាក់និងខេត្តត្បូងឃ្មុំចំនួន៣នាក់។
សូមបញ្ជាក់ថា ការឃាត់ខ្លួនពលករខ្មែរធ្វើចំណាកស្រុកទាំងកណ្តាលអធ្រាត្យនៅនឹងកន្លែងដើម្បីសួរនាំម្តងម្នាក់ៗ មិនបានរួចរាល់នោះទេគឺដោយសារពេលវេលាយប់ជ្រៅផងកម្លាំងក៏បាននាំពួកគាត់មកស្នាក់នៅប៉ុស្តិ៍ស្ពានម៉ាឡៃមួយយប់សិន លុះព្រឹកឡេីងម៉ោង៧.០០នាទីថ្ងៃចន្ទទី២៩ ខែមេសា ឆ្នាំ២០១៩ ទើបបានធ្វេីការសាកសួរបន្តនិងបានធ្វើការណែនាំអប់រំ ដោយមានវត្តមានលោកវរសេនីយ៍ទោសួង សៅ ប្រធានវរៈសេនាតូច៨១៥នគរបាលការពារព្រំដែន,លោកនាយករដ្ឋបាលសាលាស្រុកម៉ាឡៃ,លោកវរសេនីយ៍ឯក ជីម សុខន មេបញ្ជាការរងវរៈ៨១៥,និ ងលោកវរសេនីយ៍ឯក ហេង ប៉ូរ៉ាម៉ូ នាយប៉ុស្តិ៍ស្ពានម៉ាឡៃបានធ្វេីការអប់រំណែនាំដល់ពលករចំនួន១១៤នាក់រួចធ្វេីកិច្ចសន្យាបញ្ជូនឲ្យត្រឡប់ទៅលំនៅដ្ឋានឯស្រុកកំណើតរៀងៗខ្លួនវិញ។
គួរកត់សំគាល់ថា ក្នុងពិធីចូលរួមដោះស្រាយជូនប្រជាពលរដ្ឋចំនួន១១៤នាក់នេះបានបញ្ចប់ដោយភាពរីករាយនិងស្និទ្ឋស្នាលបំផុតពីសំណាក់មន្រ្តីពិតៗក្នុងនាមជាអ្នកដឹកនាំខិតខំយកចិត្តទុកដាក់បំរេីរាស្រ្តដោយស្មោះត្រង់ ខណៈដែលសម្តេចតេជោ ហ៊ុន សែន នាយករដ្ឋមន្ត្រី ចង់បាននោះគឺមន្ត្រីដែលចេះចូលរួមគ្នាដោះស្រាយគ្រប់បញ្ហានៅនឹងកន្លែងបានទាន់ពេលវេលា ដូចជាថ្នាក់ដឹកនាំរបស់អង្គភាពខាងលើនេះ នឹងលោកប្រធានវរៈ៨១៥គឺលោកខិតខំការពារសុវត្ថិភាពជូនប្រជាពលរដ្ឋគ្រប់វិនាទីទោះបីជាមានការនឿយហត់យ៉ាងណាមិនថាថ្ងៃឬយប់លំបាកនោះឡេីយ៕