261 
រាជធានីភ្នំពេញ ៖ ខណៈសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញដឹកនាំគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា អញ្ជើញទៅដល់ទីក្រុងប៉េកាំង ប្រទេសចិន ដោយសុវត្ថិភាព ដើម្បីអញ្ជើញចូលរួមក្នុងវេទិកាខ្សែក្រវ៉ាត់ និងផ្លូវចាប់ពីថ្ងៃទី ២៥ ដល់ថ្ងៃទី ២៩ ខែមេសាឆ្នាំ ២០១៩នេះ ហើយស្របពេលដែលអគ្គិសនីកម្ពុជា នៅតាមបណ្តាខណ្ឌក្នុងរាជធានីភ្នំពេញ កំពុងតែជួបការដាច់ចរន្តជាញឹកញាប់ បូករួមទាំងរដូវក្តៅផងនោះ ស្ថានភាពដាច់ភ្លើងនៅរាជធានីភ្នំពេញ កាន់តែធ្ងន់ធ្ងរទៅៗ ដោយពេលខ្លះ ដាច់ទាំងថ្ងៃ ដាច់ទាំងយប់ ហើយមានបញ្ហាមួយទៀត គឺភ្លើងដាច់ញឹកញាប់ តែបែរជាគីឡូភ្លើងឡេីងទៅវិញ ?។
ទាក់ទិននឹងរឿងរ៉ាវអគ្គិសនីប្រហែលជាប្រិយមិត្តគ្រប់គ្នាបានដឹងហើយ ជាពិសេសប្រជាពលរដ្ឋបាននាំគ្នាលើកឡើងជាបន្ដបន្ទាប់ ហើយថែមទាំងបានឆ្ងល់ចោទជាសំណួរ ដ៏ចាក់ដោតបំផុតនោះ ប្រជាជនបានសួរថា តើផ្ទះរបស់អគ្គនាយកអគ្គិសនីកម្ពុជា មានដាច់ចរន្ដភ្លើងដូចប្រជាពលរដ្ឋដែរឬទេ?។
លោក ទិត សុធា អ្នកនាំពាក្យទីស្ដីការ បានលើកឡើងថាកាលពីសម័យប៉ុលពត គ្មានម៉ាស៊ីនត្រជាក់ គ្មានកង្ហា គ្មានភ្លើងអគ្គិសនីនិងអត់មានអាហាហូបគ្រប់គ្រាន់ក៏ចេះរស់បាន?។លោកបានបញ្ជាក់ថាសម័យប៉ុលពត នៅពេលគេបង្ខំឲ្យធ្វើការទាំងថ្ងៃក្តៅហែង យប់គ្មានពេលសម្រាករស់នៅមិនបានជួបជុំគ្រួសារ គ្មានម៉ាស៊ីនត្រជាក់ គ្មានកង្ហា គ្មានភ្លើងប្រើប្រាស់ គ្មានចំណីអាហារគ្រប់គ្រាន់ ម៉េចក៏ចេះតស៊ូរស់បាន ចុះពេលនេះគ្រាន់តែខកខានប្រើប្រាស់ភ្លើងមួយរយៈ ហេតុអ្វីក៏ស្រែកថ្ងូរយ៉ាងនេះ? អាចមកពីធ្លាប់បានរស់នៅសុខស្រួលពេក ទើបពិបាកទ្រាំនឹងការលំបាក។
លោក សុខ ឥសាន អ្នកនាំពាក្យគណៈបក្សប្រជាជនកម្ពុជា បានធ្វើការចោទប្រកាន់ថាមានតែក្រុមប្រឆាំងទេដែលរអ៊ូររទាំនិងរិះគន់រឿងដាច់ភ្លើងនៅស្រុកខ្មែរយើងហើយថាពួកអ្នកស្រែករិះគន់រឿងដាច់ភ្លើងបន្តិចបន្ទួចទាំងនោះជាពួកអគតិ!។
ប្រតិកម្មពីមហាជនទៅនឹងការលើកឡើងរបស់មន្ត្រីជាន់ខ្ពស់នៃគណៈបក្សប្រជាជនកម្ពុជា(CPP)ចំនួន២រូបនេះ ត្រូវបានគេរិះគន់ពេញបណ្តាញសង្គម(Facebook)ដោយមានអ្នកខ្លះលើកឡើងថាមកពីមានអ្នកអន្ទ្រើសៗច្រើនពេកដែលប្រើប្រាស់ភ្លើងរដ្ឋមិនបង់លុយ ទើបភ្លើងវាដាច់ញឹកញាប់បែបនេះ?។ចំណែកអ្នកខ្លះទៀតនិយាយថាកាលបោះឆ្នោត២០១៨គ្មានបក្សប្រឆាំងស្អីនោះទេ ចុះឥឡូវលោក សុខ ឥសាន ចោទប្រកាន់អ្នកបោះឲ្យគណៈបក្សប្រជាជនកម្ពុជាជាបក្សប្រឆាំងទៅវិញ…អត់យល់! រីឯអ្នកខ្លះទៀតលើកឡើងតាមបែបជាចំអកថាមិនបាច់ឆ្ងល់អីទៀតទេ ពួកគាត់ទាំងពីរនាក់ហ្នឹងបើសិនមិនបាននិយាយអញ្ចឹងទេនោះគឺច្បាស់ជាអត់កន្លែងអង្គុយ ម៉្លោះហើយចេះតែខំប្រឹងនិយាយដូរបាយស៊ីប៉ុណ្ណោះ។
អង្គភាពគេហទំព័រMSKnewsយើងនឹងរង់ចាំទទួលព័ត៌មានពីគ្រប់មជ្ឈដ្ឋាននានានៅរៀងរាល់ម៉ោងធ្វើការ៕
