ខេត្តកំពត៖ តាមសេចក្តីរាយការណ៍បានឲ្យដឹងថាលោក យី ថុល មេ គយច្រកទ្វារអន្តរជាតិព្រែកចាកស្ថិតក្នុងស្រុកកំពង់ត្រាច ខេត្តកំពត ដែលទើបឡើងកាន់តំណែងកាលពីពេលថ្មីៗនេះ បានឃុបឃិតបើកដៃឲ្យឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់កាន់តែច្រើនឡើងៗ ដើម្បីជាថ្នូរនឹងផលប្រយោជន៍ព្រមទាំងប្រើអំណាចគាបសង្កត់យកលុយពីក្រុមអាជីវករតូចតាចដែលរកស៊ីនាំចូលទំនិញកំប៉ិកកំប៉ុកពីវៀតណាមទៀតផង ហើយមិនតែប៉ុណ្ណោះលោក យី ថុល ថែមទាំងបញ្ជាឲ្យលោក រស់ សាត អនុប្រធានស្នាក់ការព្រមទាំងបក្ខពួក២នាក់ទៀតធ្វើជាលេសពិនិត្យមើលឡើងវិញនូវរាល់ការនាំចូលនាំចេញទំនិញគ្រប់ប្រភេទពីពួកឈ្មួញធំៗសម្រាប់ប្រមូលលុយដាក់ថ្ងៃដាក់ខែថែមទៀតផង។
ប្រភពពីសមត្ថកិច្ចច្រកទ្វារអន្តរជាតិព្រែកចាក បានឲ្យដឹងថាបច្ចុប្បន្នឈ្មួញធំៗនាំចូលទំនិញទំគេចពន្ធ ទំនិញបង់ពន្ធមិនគ្រប់ និងទំនិញខុសខុសច្បាប់តាមច្រកទ្វារអន្តរជាតិព្រែកចាកគឺបង់ពន្ធត្រឹមតែ៣០ភាគរយទៅ៤០ភាគរយប៉ុណ្ណោះ ក្រៅពីនេះគឺលោក យី ថុល ឃុបឃិតបែងចែក ផលប្រយោជន៍លើតុក្រោមតុជាមួយឈ្មួញនិងបក្ខពួកយ៉ាងសុខស្រួល ព្រោះលោក យី ថុល ធ្លាប់មានជំនាញខាងប្រព្រឹត្តអំពើពុករលួយកាលពីគាត់កាន់តំណែងជាប្រធានការិយាល័យគយនិងរដ្ឋាករច្រកទ្វេរភាគី៤០០នៅក្នុងស្រុកសំឡូត ខេត្តបាត់ដំបង មកម៉្លេះហើយឥឡូវនេះលោក យី ថុល កំពុងយកមកអនុវត្តន៍ក្នុងយុទ្ធសាស្ត្រគ្រុឌជាន់គ្រុឌនៅច្រកទ្វារអន្តរជាតិព្រែកចាក ស្រុកកំពង់ត្រាច ខេត្តកំពត ជាបន្តទៀត។
ប្រភពបានបន្តថា ក្រោយពេលឡើងកាន់តំណែងជាមេគយច្រកព្រែកចាកភ្លាមលោក យី ថុល បានបញ្ជាឲ្យលោក រស់ សាត ដែលជាអនុប្រធានស្នាក់ការព្រមទាំងបក្ខពួក២នាក់ទៀតដើរពិនិត្យមើលឡើងវិញចំពោះការនាំចូលនាំចេញ ទំនិញគ្រប់ប្រភេទនៅច្រកទ្វារអន្តរជាតិព្រែក ចាក បន្ទាប់ពីទទួលបញ្ជានេះ លោក រស់ សាត និងបក្ខពួកបានរឹតបន្តឹងគាបយកលុយពីក្រុម ឈ្មួញនាំចូលនាំចេញទំនិញតាមច្រកព្រែក ចាកយ៉ាងកំរោលតែម្តង ហើយលោក យី ថុល បានឃុបឃិតឲ្យឈ្មួញធំៗបង់លុយដាក់ខែឲ្យបាននៅបន្តនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់យ៉ាងរលូនដើម្បីជាថ្នូរនឹងផលប្រយោជន៍ផ្ទាល់ខ្លួន។
សូមបញ្ជាក់ថាលោក យី ថុល កំពុងប្រើអំណាចនឹងតួនាទីខ្លួនធ្វើជាដើមទុនដើម្បីប្រមូលលុយ តាមរបៀបពុករលួយដោយគ្មានញញើតអ្វីទាំង អស់ មិនតែប៉ុណ្ណោះលោក យី ថុល បានចាត់ តាំងមន្ត្រីក្រោមឱវាទរបស់ខ្លួនឲ្យគាបជម្រិតយ កលុយពីក្រុមឈ្មួញនាំចូល នាំចេញទំនិញតាម ច្រកព្រែកចាកយ៉ាងគឃ្លើនហើយថែមទាំងគាបសង្កត់ជាន់កប្រជាពលរដ្ឋ អាជីវករតូចតាចយកលុយគ្មានត្រាប្រណីសូម្បីតែពួកគាត់រកស៊ីលក់ដូរទំនិញបន្តិចបន្ទួចស្ទើររកលុយបង់ឲ្យសមត្ថកិច្ចនិងគយមិនគ្រាន់ផង ពួកគាត់ត្អូញត្អែរថាសព្វថ្ងៃនេះរកស៊ីចិញ្ចឹមតែគយប៉ុណ្ណោះ។
ប្រភពបានឲ្យដឹងថាសព្វថ្ងៃនេះលោក យី ថុល ប្រធានការិយាល័យគយនិងរដ្ឋាករច្រកទ្វារអន្តរជាតិ ព្រែកចាក កំពុងប្រើអំណាចគាបសង្កត់យកលុយពីអាជីវករតូចតាចនិងឈ្មួញធំៗតាមរបៀបពុករលួយយ៉ាងគគ្លើនគ្មានញញើតកោតខ្លាចចំពោះមហាជនរិះគន់ឬថ្នាក់ដឹកនាំដកតំណែងគ្រវាត់ចោលនោះឡើយ ព្រោះលោក យី ថុល កំពុងងុបងុលនឹងការប្រព្រឹត្តអំពើពុករលួយដោយបានឃុបឃិតឲ្យឈ្មួញធំៗ នាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់កាន់តែច្រើនឡើងៗ ដើម្បីជាថ្នូរនឹងផលប្រយោជន៍ប្រចាំខែយកមកបែងចែកបក្ខពួកខ្លួនធ្វើមានបានតែប៉ុណ្ណោះ។
ពាក់ព័ន្ធនឹងករណីខាងលើនេះ ប្រជាពលរដ្ឋនិងអាជីវករបានសំណូមពរដល់លោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជានិងលោកអូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ជាពិសេសលោក ឱម យិុនទៀង ប្រធានអង្គភាពប្រឆាំងអំពើពុករលួយគួរពិនិត្យឡើងវិញជាបន្ទាន់ចំពោះភាពមិនប្រក្រតីនៅអង្គភាពគយច្រកទ្វារអន្តរជាតិព្រែកចាកហើយចាត់វិធានការទប់ស្កាត់អំពើពុករលួយច្រើនបែបច្រើនយ៉ាងរបស់លោក យី ថុល ព្រម ទាំងបក្ខពួកខ្លះៗផងព្រោះលោក យី ថុល គ្រាន់ តែឡើងកាន់តំណែងមិនទាន់បានមួយខែស្រួលបួលផងបែរជាលោក យី ថុល និងបក្ខពួកឃុបឃិតគ្នាប្រព្រឹត្ត្រអំពើពុករលួយតាមច្រើនរូបភាពដោយគ្មានខ្លាចក្រែងអ្វីទាំងអស់ ។
អង្គភាពគេហទំព័រMSKnewsពុំអាចធ្វើការទំនាក់ទំនងជាមួយភាគីពាក់ព័ន្ធខាងលើបានទេនៅពេលនេះយើងនឹងរង់ចាំទទួលព័ត៌មានថ្មីៗបន្ថែមទៀតរៀងរាល់ម៉ោងធ្វើការ៕