ខេត្តសៀមរាប៖ ស្នូរសម្លេងទូកម៉ាស៊ីនលាន់ឮយ៉ាងទ្រហឹងអឺងកងនិងមានផ្សែងខ្មៅខ្មួលខ្មាញ់ កណ្តាលបឹងទន្លេសាបដែលគេបានសង្កេតឃើញថាគឺជាបទល្មើសនេសាទខុសច្បាប់ដោយប្រើប្រាស់ឧប្បករណ៍ដែលរាជរដ្ឋាភិបាលហាមឃាត់ទាំងនោះគឺជាទូកអូសយ៉ាំងកាវនិងរុញស៊ីបជាច្រើនក្រុមរបស់ឈ្មោះ ហុង ជាជនជាតិវៀតណា មនៅចំណុចមាត់ខ្លានិងនៅភូមិចុងប្រឡាយ ឃុំកំពង់ឃ្លាំង ស្រុកសូត្រនិគម ខេត្តសៀមរាប ដែលមានឈ្មោះ ហុង រូបនេះជាអ្នកកាងឲ្យក្រុមនេសាទខុសច្បាប់របស់ជនជាតិវៀតណាមកំពុងធ្វើឲ្យប្រជាពលរដ្ឋដែលប្រកបរបរនេសាទជាលក្ខណៈគ្រួសារ ដូចជារាយមង ដាក់ខ្សុំ ទទួលរងនូវការថ្នាំងថ្នាក់ក្តៅក្រហាយនឹងទង្វើបំផ្លិចបំផ្លាញរបស់ក្រុមនេសាទជនជាតិវៀតណាមអូសយ៉ាំងកាវ រុញស៊ីប និងវ៉ៃហ៊ំអ៊ួនធំៗប្រវែងរាប់ពាន់ម៉ែត្រដែលបានកៀរអូសផ្តាច់មងនិងខ្សុំរបស់ពួកគាត់ ហើយពុំមានឃើញអាជ្ញាធរ សមត្ថកិច្ច និងមន្ត្រីជំនាញណាចុះទៅហាមឃាត់ទប់ស្កាត់ ឬចុះទៅបង្ក្រាបនោះឡើយ។
បើតាមប្រជាពលរដ្ឋបានឲ្យដឹងថាបទល្មើសនេសាទស្អេកស្កះពេញផ្ទៃទន្លេសាបកំពុងបង្អួតភ្ញៀវទេសចរណ៍នៅចំណុចចុងឃ្នៀស ភ្នំក្រោម ក្រុ ងសៀមរាប គឺគ្មានកម្លាំងសមត្ថកិច្ចណាចុះទៅបង្ក្រាបនោះឡើយ ជាក់ស្តែងសកម្មភាពអូសអ៊ួនក្រឡាញឹកមានប្រវែងរាប់ពាន់ម៉ែត្ររបស់ជនជាតិវៀតណាមដែលអូសដោយទូកម៉ាស៊ីនធំៗ កំពុងអូសកៀរយកត្រីទាំងធំទាំងតូចគ្មានសល់់នោះទេ។គេបានកត់សំគាល់ឃើញទូកនេសាទជនជាតិវៀតណាមជាច្រើនគ្រឿងសម្រុកអូសអ៊ួនយ៉ាងអនាធិបតេយ្យដោយគ្មានខ្លាចសមត្ថកិច្វឬស្ថាប័នណាទាំងអស់ ពីព្រោះពួកនេសាទជនជាតិវៀតណាមទាំងនោះអះអាងថាបានបង់លុយឲ្យសមត្ថកិច្ចនិងមន្ត្រីជំនាញរួចរាល់អស់ហើយទើបពួកគេរកស៊ីអូសអ៊ួនបានដោយរលូនគ្មានទើសក្បាលអ្នកណាទាំងអស់។
គួររំឭកថាការបង្ក្រាបបទល្មើសនេសាទឲ្យដូចភ្លៀងរលឹមគឺជាអនុសាសន៍ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋ មន្ត្រីដែលបានដាស់តឿនដល់មន្ត្រីជំនាញនិងសមត្ថកិច្ច ឲ្យខិតខំយកចិត្តទុកដាក់អនុវត្តន៍ឲ្យខាងតែបាន ផ្ទុយទៅវិញកម្លាំងនគរបាលសេដ្ឋកិច្ចខេត្តសៀមរាបខណៈដែលគេបានសង្កេតឃើញមានបទល្មើសនេសាទនៅតំបន់មួយចំនួននៃបឹងទន្លេសាបកំពុងមានការកើនច្រើនឡើងៗក្នុងដែនសមត្ថកិច្ចរបស់ខ្លួន ប៉ុន្តែបែរជាកម្លាំងសម ត្ថកិច្ចនិងមន្ត្រីជំនាញមិនអើពើធ្វើការចុះបង្ក្រាបទាល់តែសោះ។
ប្រភពបន្តឲ្យដឹងថាបុគ្គលឈ្មោះ ហុង ជនជាតិវៀតណាមរូបនេះត្រូវបានគេស្គាល់ថាជាជើងខ្លាំងប្រចាំបឹងទន្លេសាបកាងឲ្យទូកនេសាទវៀតណាមខុសច្បាប់ដែលអូសស៊ីប យ៉ាំងកាវទាំងយប់ទាំងថ្ងៃពេលមានសមត្ថកិច្ចឬស្ថាប័នខាងណាចុះល្បាតឃើញសួរនាំគឺលោក ហុង ប្រើសំ ដីក្អេងក្អាងព្រហើនខ្លាំងណាស់ ហើយមិនតែប៉ុណ្ណោះថែមទាំងបានបញ្ជាឲ្យក្រុមទូកអូសអ៊ួន យ៉ាំងកាវ ទាំងនោះបើកបុកទូកសម្លាប់ចោលបើទោះបីជាដឹងថាមន្ត្រីជំនាញ ឬក្រុមអ្នកសារព័ត៌មានក៏ដោយ ព្រោះឈ្មោះ ហុង ម្នាក់នេះល្បីល្បាញខាងលោតផ្លោះអស្ចារ្យណាស់ដោយអាងអូសចូលទឹកដីណាបង់លុយឲ្យជំនាញខាងទឹកដីនោះ ហេតុដូចនេះហើយទើបឈ្មោះ ហុង មិនញញើតកោតខ្លាចអ្នកណាទាំងអស់។
សូមបញ្ជាក់ថាអ្វីដែលជាបញ្ហាដ៏មុតស្រួចបំផុតលើករណីលោក ហុង ជនជាតិវៀតណាម កាងឲ្យបទល្មើសនេសាទនៅតំបន់ទន្លេសាបហាក់បី ដូចជិះសេះលែងដៃដោយគ្មានសមត្ថកិច្ច មន្ត្រី ជំនាញ និងជាពិសេសកម្លាំងនគរបាលសេដ្ឋកិច្ច ក្រសួងមហាផ្ទៃ មិនបានធ្វើការទប់ស្កាត់ចុះ ចាប់ង្រ្កាបទាល់តែសោះ ឬមួយក៏ធ្វើជាមិនដឹងមិនឮ ព្រោះតែបានទទួលផលប្រយោជន៍យ៉ាងក្រាស់ក្រែលពីឈ្មោះ ហុង ធ្វើឲ្យបទល្មើសនេសាទខុសច្បាប់ក្នុងបឹងទន្លេសាបឲ្យរងនូវការវិនាសហិនហោចដល់ពូជមច្ឆាជាតិទាំងស្រុងតែម្តង។ម៉្យាងវិញទៀតគេបានឮពាក្យប្រជាជននិយាយថាជំនាញរដ្ឋបាលជលផលតាំងពីថ្នាក់សង្កាត់ ផ្នែករដ្ឋបាល ខណ្ឌរហូតដល់មន្រ្តីក្រសួងកសិកម្មរុក្ខាប្រមាញ់និងនេសាទ ឃើញចុះមករហូត ប៉ុន្តែមិនដែលឃើញបង្រ្កាបបានសោះ? អាស្រ័ យហេតុនេះប្រជាពលរដ្ឋបានស្នើសុំដល់ថ្នាក់ដឹកនាំ ក្រសួងមហាផ្ទៃ ក្រសួងបរិស្ថាន និងក្រសួងកសិកម្ម ជាពិសេសសូមឲ្យលោកនាយខណ្ឌរដ្ឋបាលជលផលខេត្តសៀមរាបមេត្តាចាត់ វិធានការឲ្យមន្រ្តីជលផលចុះពិនិត្យមើលផង លើសកម្មភាពអូសអ៊ួន យ៉ាំងកាវ រុញស៊ីបផ្តាច់មងនិងខ្សុំរបស់ប្រជាពលរដ្ខដែលរកទទួលទានបន្តិចបន្ទួចឲ្យគាត់មានការថ្នាំងថ្នាក់ក្តៅក្រហាយចំពោះបញ្ហាទាំងអស់នេះ ហើយមិនមែនមានតែមន្ត្រីជំនាញប្រចាំខេត្តតែមួយស្ថាប័ន ឬពីរស្ថាប័នជាអ្នកធ្វើការបង្ក្រាបនោះទេ ពោលគឺវាទាល់តែរួមគ្នាយកចិត្តទុកដាក់សហការទប់ស្កាត់ទើបបាន ចំណែកឯកម្លាំងនគរបាលសេដ្ឋកិច្ច ក៏មិនត្រូវសម្ងំស្ងៀមស្ងាត់ដោយមិនទទួលខុសត្រូវរាល់ផលប៉ះពាល់មកលើប្រជាពលរដ្ឋក្នុងដែនគ្រប់គ្រងរបស់ខ្លួននោះទេ ដូច្នេះប្រជាពលរដ្ឋមានក្តីសង្ឃឹមជឿជាក់ចំពោះប្រមុខរាជរដ្ឋាភិបាលសម្តេចតេជោ ហ៊ុន សែន នាយករដ្ខមន្ត្រីដែលអាចធ្វើការវះកាត់និងជួយអន្តរាគមន៍ដោះស្រាយជូនប្រជាពលរដ្ឋជាក់ជាពុំខានឡើយ៕