រាជធានីភ្នំពេញ៖ ហេតុការណ៍ដ៏ចម្លែកមួយបណ្តាលឲ្យមានការភ្ញាក់ផ្អើលនៅចំណុចមុខឃ្លាំងមួយកន្លែងនៅតាមផ្លូវភ្នំពេញហាណូយ ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ រាជធានីភ្នំពេញ។
ខណៈដែលសមត្ថកិច្ចឯកសណ្ឋានបានចាប់គ្រៀកសម្ថកិច្ចឯកសណ្ថានដូចគ្នាបញ្ចូលឡាន តែនេះមិនមែនវីដេអូហុងកុងនោះទេគឺជាសកម្មភាពជាក់ស្តែងកើតឡើងទាំងកណ្តាលថ្ងៃត្រង់ប្រហែលម៉ោង១២កន្លះជាងនៅថ្ងៃទី១០ ខែមករា ឆ្នាំ២០១៩ ។ មន្ត្រីនគរបាលដែលមន្ត្រីនគរបា លតម្រួតបទបញ្ជាចាប់ឃាត់ខ្លួននោះមានលោកឧត្តមសេនីយ៍ត្រី ផូ សុផល រួមទាំងមន្ត្រីនគរបាលចំនួន៥នាក់ទៀតដែលសរុបទាំងអស់៦នាក់ ។
ក្រុមប្រជាពលរដ្ឋនៅភូមិចុងថ្នល់បានដាក់ការសង្ស័យថានេះជារឿងផ្ទៃក្នុងមន្រ្តីគណៈកម្មការប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃ និងក្រុមឈ្មួញ និយាយមិនត្រូវគ្នាទើប ធ្វើឲ្យមានរឿងផ្អើលទាំងកណ្តាលក្រុង។
ទាក់ទិននឹងការឃាត់ខ្លួនមន្ត្រីនគរបាលនេះលោកឧត្តមសេនីយ៍ទោ ទូច យុទ្ធា អនុប្រធានលេខាធិការដ្ឋាននៃគណៈកម្មការប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃបានឲ្យដឹងថា ករណីនេះជាការយល់ច្រឡំគ្នា ដោយនៅមុនពេលកើតហេតុលោកបានអះអាងថា កម្លាំងរបស់លោកទទួលបានព័ត៌មានថា មានរថយន្តដឹកបារីក្លែងក្លាយ១គ្រឿងចូលក្នុងឃ្លាំងខាងលើ ហើយសមត្ថកិច្ចក៏មានការស្ទាក់ត្រួតពិនិត្យ ។
ស្រាប់តែខាងម្ចាស់បារីនោះមិនសហការជាមួយកម្លាំងសមត្ថកិច្ចដោយមិនឲ្យមានការធ្វើការត្រួតនោះទេ ហើយថែមទាំងរាយការណ៍ទៅខាងលើទើបមន្ត្រីនគរបាលទាំង៦រូបដែលមានទាំងលោកផ្កាយ១នោះចុះទៅដោយមិនបានសហការជាមួយស្នងការនគរបាលរាជធានីភ្នំពេញនោះ ក៏មានកម្លាំងតម្រួតបទបញ្ជាសហការជាមួយកម្លាំងអាជ្ញាធរខណ្ឌសែនសុខឃាត់ខ្លួនលោកផ្កាយ១ និងកូនចៅគាត់តែម្តង ។
បើតាមមហាជនលើកឡើងថារឿងនេះមិនមែន រឿងច្រឡំទេព្រោះកន្លែងឃ្លាំងនេះគឺអាចជាឃ្លាំងរបស់ឧកញ៉ាដែលជាខ្សែមន្រ្តីធំខាងលើនោះ ទើបមានការសុំឆែកឆេរត្រួតពិនិត្យត្រូវមានការចូ លរួមទាំងក្រឡាបញ្ជីផងដែរ ហើយបើទោះបីជា ជាមានកិច្ចសហការបែបនេះក៏ដោយក៏នៅតែមិនអាចទៅរួចដែរ ចុះសួរថាតើថ្នាក់លើម្នាក់ណាទៅដែលគ្រាន់តែគេរាយការណ៍ប្រាប់តាមទូរស័ព្ទសោះបែរជាមានការបញ្ជាឲ្យឃាត់ខ្លួនកម្លាំងជំនាញធ្វើឡើងយ៉ាងតក់ក្រហល់នោះទៅវិញ?។
សូមបញ្ជាក់ថាមន្ត្រីនគរបាលចំនួន៦រូបដែលត្រូវបានឃាត់ខ្លួននោះ គឺសុទ្ធតែជាកម្លាំងរបស់គណៈកម្មាធិការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់ឲ្យមានហានិភ័យខ្ពស់ដល់សុខភាព និងសុវត្ថិភាពសង្គម (គ.ប.ផ.ក) ក្រសួងមហាផ្ទៃនិងត្រូវបានឃាត់ខ្លួននៅខណ្ឌសែនសុខដោយសារតែពួកគាត់ចុះទៅឆែកទំនិញក្នុងឃ្លាំងដ៏ធំមួយដែលការដេញតាមប្រផាប់ចាប់ប្រភីង ដែលធ្វើឲ្យមានការសង្ស័យថាលួចផលិត លួចបន្លំម៉ាកនិងលាយសារធាតុហេរ៉ូអុីន ច្រើនហើយដោយគ្រាន់តែគ្មានបទបញ្ជាពីថ្នាក់លើគ្មានការដឹកនាំពីព្រះរាជអាជ្ញានិងពុំបានសុំកិច្ចសហការជាមួយសមត្ថកិច្ចមូលដ្ឋានគឺត្រូវបានមហាជនដាក់ការសង្ស័យថាមន្ត្រីជំនាញចាប់ប៉ះចំឆ្នាំងបាយមេទើបមានវាសនាអាក្រក់បែបនេះ?។
ចំណែកមន្ត្រីនគរបាលជាន់ខ្ពស់នៃស្នងការដ្ឋាននគរបាលរាជធានីភ្នំពេញ បានឲ្យដឹងថាក្រុមម ន្ត្រីនគរបាលដែលត្រូវបានឃាត់ខ្លួនខាងលើនេះ ដំបូងឡើយ បានបើករថយន្ត២គ្រឿងទៅដល់ ឈប់នៅមុខឃ្លាំងស្តុកទំនិញដ៏ធំមួយស្ថិតនៅលើផ្លូវ១០១៩ សង្កាត់ទឹកថ្លា ខណ្ឌសែនសុខ ក្នុងគោលបំណងចូលទៅឆែកឆេរប៉ុន្តែសកម្មភាពទាំងនេះធ្វើឡើងដោយខុសច្បាប់ដោយសារតែទី១_គ្មានលិខិតបេសកកម្មនិងបទបញ្ជាពីថ្នាក់ដឹកនាំរបស់ខ្លួនទី២_មិនមានព្រះរាជអាជ្ញាចូលរួមដឹកនាំកម្លាំងនិងទី៣_កម្លាំងទាំងនេះមិនបានចូលរួមសហការជាមួយកម្លាំងមូលដ្ឋាននោះឡើយ។
លោកនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិបានថ្លែងប ញ្ជាក់ថាពិតជាមានការឃាត់ខ្លួនមន្ត្រីនគរបាលទាំងនោះមែនដែលពួកគេនៅខាងប្រឆាំងទំនិញក្លែងក្លាយប៉ុន្តែក្រោយការសួរនាំក៏ឲ្យត្រឡប់ទៅវិញតែម្តង។
បើតាមនាយឧត្តមសេនីយ៍ ការឃាត់ខ្លួនពួកគេ ដោយសារមុនដំបូងពេលដែលពួកគេចុះទៅនោះមិនបានសហការជាមួយខាងស្នងការដ្ឋាននគរបាលរាជធានីភ្នំពេញក៏បានឲ្យខាងតម្រួតបទបញ្ជាចុះទៅឃាត់ខ្លួនតែម្តងប៉ុន្តែក៏បានឲ្យត្រឡប់ទៅវិញភ្លាមៗផងដែរមិនមានរឿងអ្វីនោះឡើយ។
មជ្ឈដានមហាជនបានស្នើសុំឲ្យសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនិងលោកទេសរដ្ឋមន្ត្រី ឱម យុិន ទៀង ប្រធានអង្គភាពប្រឆាំងអំពើពុករលួយគួរបើកការស៊ើបអង្កេតឲ្យបានស៊ីជម្រៅទៅលើករណីប៉ូលីសចាប់ប៉ូលិសដែលទំនងជាមានភាពមិនប្រក្រតីពាក់ព័ន្ធនឹងផលប្រយោជន៍បុគ្គលមួយចំនួនយកអំណាចខ្លួនកាងបទល្មើសទើបបានជាធ្វើឲ្យមានការប៉ះទង្គិចគ្នាក្នុងការងារបម្រើផលប្រយោជន៍រួមរបស់ប្រជាពលរដ្ឋនិងរាជរដ្ឋាភិបាល៕