170 
ខេត្តពោធិសាត់៖ តាមសេចក្តីរាយការណ៍ថ្មីៗបានឲ្យដឹងថា ប៉ុន្មានថ្ងៃនេះគេឃើញមានកម្លាំងសមត្ថកិច្ចកងរាជអាវុធហត្ថលើផ្ទៃប្រទេសចុះទៅបង្ក្រាបរថយន្តដឹកឈើចំនួន០២គ្រឿង ប្រមូលឈើបាន ១១កំណាត់និងឃាត់ខ្លួនមនុស្ស០៤នាក់ ដោយចោទប្រកាន់ថាដឹកឈើគ្មាន ការអនុញាតនៅក្នុងភូមិសាស្ត្រស្រុកភ្នំក្រវាញ ហើយយកទៅប្រគល់ឲ្យរដ្ឋបាលព្រៃឈើស្រុកភ្នំក្រវាញចាត់ការតាមនីតិវិធី ប៉ុន្តែក្រោយពីឲ្យឈើចេញទៅបាត់ទើបដោះលែងមនុស្ស០៤នាក់ដែលជាកម្មករស៊ីឈ្នួលដឹកឈើឲ្យមេការឈ្មោះ លីម ត្រូវជាកូនរបស់ឧកញ៉ា លាង ចាន់មុនី ដែ លទំនងពុំសូវមានឥទ្ធិពលខ្លាំងដូចមេឈ្មួញធំ តាំង អៀង ដែលល្បីថាបានទិញព្រៃឈើផ្តាច់មុ ខនៅក្នុងតំបន់ទាំងអស់នោះ ឬភ្នំមួយមិនឲ្យមានខ្លាពីរគឺនាំឲ្យពាលស៊ីពាលវាបែបនេះ?។
ចំណែកឯមេឈ្មួញទុច្ចរិត តាំង អៀង វិញដែលកំពុងយកច្បាប់ពីក្រហែងមេឃមកកម្លាមហាជននិងសមត្ថកិច្ចដោយប្រើអាជ្ញាប័ណ្ណអឹមឌីអេស(MDS) របស់ឧកញ៉ា ទ្រី ភាព ធ្វើជាដើមទុនរក ស៊ីឈើយ៉ាងពេញទំហឹងនៅក្នុងទឹកដីខេត្តពោធិសាត់ទាំងមូលត្រូវបានអ្នកស្រុកមើលឃើញថា សមត្ថកិច្ចចាប់បានតែអ្នកតូចតាចប៉ុណ្ណោះទេដើម្បីយកស្នាដៃពោលគឺពួកគេទុកឲ្យមេឈ្មួញឈើធំ តាំង អៀង សម្រាប់ចិញ្ចឹមឆ្នាំងបាយដែលជាប្រភពចំណូលសេដ្ឋកិច្ចយ៉ាងសំខាន់របស់សមត្ថកិច្ចនិងមន្ត្រីជំនាញទាំងអស់ក្នុងខេត្តពោធិសាត់។
ប្រភពច្បាស់ការណ៍នេះបានឲ្យដឹងថា មេឈ្មួញ ទុច្ចរិត តាំង អៀង កំពុងកាប់បំផ្លាញព្រៃឈើនៅក្នុងតំបន់ដែនជម្រកសត្វព្រៃភ្នំសំកុស តំបន់អភិរក្សជួរភ្នំក្រវាញភាគកណ្ដាល និងតំបន់ដែនជម្រកសត្វព្រៃភ្នំឱរ៉ាល់ដែលអាចធ្វើឲ្យប្រឈមនឹងសេចក្ដីវិនាសជាបន្តបន្ទាប់ជៀសមិនផុតឡើយ ហើយមន្ត្រីជំនាញនិងសមត្ថកិច្ចពាក់ព័ន្ធជាច្រើនស្ថាប័នមិនចាត់វិធានការបង្ក្រាបព្រោះជាប្រភពចំណូលដ៏សំខាន់របស់ពួកគេ។
ប្រជាពលរដ្ឋក្នុងស្រុកភ្នំក្រវាញ និងស្រុកវាលវែង បានលើកឡើងថា ព្រៃឈើដែលនៅសេសសល់ក្នុងស្រុកទាំង២នេះ ជៀសមិនផុតពីសេចក្ដីវិនាសឡើយ ដោយសាតែលោក ម៉ៅ ធនិន អភិបាលខេត្តពោធិ៍សាត់ ក៏ដូចជាប្រធានមន្ទីរពាក់ព័ន្ធក្នុងខេត្តពោធិ៍សាត់គ្មានឆន្ទៈក្នុងការបង្ក្រាបទប់ស្កាត់បទល្មើសព្រៃឈើឲ្យស្របតាមបទបញ្ជាលេខ០០២របស់រាជរដ្ឋាភិបាលនោះទេឬក៏បង្ក្រាបអាតូចទុកអាធំឲ្យរស់ចិញ្ចឹមឆ្នាំងបាយខ្លួន។
ប្រភពបែកធ្លាយពីមន្ត្រីនិយាយថា មេឈ្មួញ តាំ ង អៀង អាចបន្តសកម្មភាពកាប់ឈើនិងដឹកជញ្ជូនឈើចេញពីស្រុកវាលវែង និងស្រុកភ្នំក្រវាញ បានយ៉ាងរលូនបែបនេះ គឺមានការឃុបឃឹតបើកដៃពីសំណាក់ លោក ឡាយ វិសិដ្ឋ ប្រធានមន្ទីរកសិកម្មខេត្តពោធិ៍សាត់ និងលោក ប៉ាន់ មរកត ប្រធានមន្ទីរបរិស្ថានខេត្តពោធិ៍សាត់ផង ដែរ ដោយគ្មានច្បាប់អនុញ្ញាតអ្វីទាំងអស់ទើបមេឈ្មួញ តាំង អៀង យកអឹមឌីអេសមកកម្លាមហាជននិងសមត្ថកិច្ចប៉ុណ្ណោះ។
គួរកត់សំគាល់ថាលោក ម៉ៅ ធនិន អភិបាលខេត្តពោធិសាសាត់ ក៏ដូចជាលោក វេង សាខុន រដ្ឋម ន្ត្រីក្រសួងកសិកម្ម និងលោក សាយ សំអាល់ រដ្ឋមន្ត្រីក្រសួងបរិស្ថាន កំពុងអង្គុយបក់ផ្សែងរក្សាភាពស្ងៀមស្ងាត់ បណ្ដោយឲ្យមេឈ្មួញតាំង អៀងធ្វើអ្វីៗបានស្រេចតែអំពើចិត្តលើសកម្មភាពដឹកជញ្ជូនឈើយ៉ាងពេញបន្ទុកនៅក្នុងស្រុកវាលវែងនិងស្រុកភ្នំក្រវាញក្រោមក្រសែភ្នែកលោក កែវ អូម៉ាលីស្ស ប្រធានរដ្ឋបាលព្រៃឈើធ្វើមិនដឹងមិនឮអ្វីទាំងអស់។
ប្រជាពលរដ្ឋរស់នៅតំបន់នោះកំពុងមានការព្រួយបារម្ភពីការបាត់បង់ព្រៃឈើនៅក្នុងដែនជម្រកសត្វព្រៃភ្នំសំកុស តំបន់អភិរក្សជួរភ្នំក្រវាញភាគកណ្ដាល និងតំបន់ដែនជម្រកសត្វព្រៃភ្នំឱរ៉ាល់ ដោយសារមេឈ្មួញ តាំង អៀង បានយកឈ្មោះក្រុមហ៊ុនអឹមឌីអេស(MDS)របស់លោកឧកញ៉ា ទ្រី ភាព មកប្រើប្រាស់ក្នុងការកាប់បំផ្លាញនិងដឹកជញ្ជូនឈើយ៉ាងសប្បាយរីកថ្លើមនឹងការកើបលុយធ្វើឲ្យព្រៃឈើកាន់តែរងការវិនាសហិនហោចជាក់ជាមិនខានឡើយ។
ប្រភពបន្តឲ្យដឹងថា មេឈ្មួញទុច្ចរិត តាំង អៀង កំពុងជាន់ពន្លិចកិត្តិយសឧកញ៉ា ទ្រី ភាព ម្ចាស់ក្រុមហ៊ុនអឹមឌីអេស(MDS)ដែលបានបញ្ចប់ការរកស៊ីឈើយូរណាស់មកហើយ ពេលនេះទោះបីជាលោក តាំង អៀង ប្រើប្រាស់អាជ្ញាប័ណ្ណរបស់ក្រុមហ៊ុននេះក៏ដោយគឺអាចប្រឈមនឹងការទទួលខុសត្រូវចំពោះមុខច្បាប់ ខណៈដែលACUនិងគណៈកម្មការបង្ក្រាបបទល្មើសព្រៃឈើចុះត្រួតពិនិត្យស៊ើបអង្កេតឲ្យបានស៊ីជម្រៅទៅលើសកម្មភាពមេឈ្មួញ តាំង អៀង ដែលកំពុងកាប់និងដឹកជញ្ជូនឈើដោយគ្មានការអនុញាតដើម្បីចាត់ការតាមផ្លូវច្បាប់។
ទាក់ទិននឹងករណីមេឈ្មួញទុច្ចរិត តាំង អៀង កំពុងសម្រុកកាប់និងដឹកជញ្ជូនឈើនៅក្នុងភូមិសាស្ត្រខាងលើនេះដែលអាចជាប់ពាក់ព័ន្ធជាមួយមន្ត្រីជំនាញនិងសមត្ថកិច្ចដូចសម្លកំពឹសក្នុងខេត្តពោធិសាត់ អង្គភាពMSKnewsយើងមិនអាចធ្វើការទំនាក់ទំនងសុំការបំភ្លឺពីភាគីណាមួយបានទេកាលពីម្សិលមិញនេះ ទោះជាយ៉ាងណាក្តីអង្គភាពយើងនឹងរង់ចាំទទួលព័ត៌មានបន្ថែមទៀតរៀងរាល់ម៉ោងធ្វើការ៕
