ខេត្តព្រះវិហារ៖ បើតាមអនុសាសន៍ដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីបានដាស់តឿនឲ្យប្រធានរដ្ឋបាលព្រៃឈើថ្មី លោក កែវ អូម៉ាលីស្ស ត្រូវប្រឹងប្រែងយកចិត្តទុកដាក់ធ្វើកិច្ចការជំនាញ របស់ខ្លួនឲ្យបានខ្លាំងក្លាកាន់តែល្អប្រសើរថែមទៀតដោយខិតខំការពារព្រៃឈើឲ្យខាងតែបានគឺត្រូវធ្វើសកម្មភាពដូចភ្លៀងរលឹមដើម្បីទប់ស្កាត់ឲ្យបានពេញលេញដែលត្រូវមើលព្រៃឈើទាំងមូលកុំឲ្យបាត់បង់មិនមែនឲ្យអស់លោកមើលដើមឈើមួយដើមឬក៏ទៅដើររាប់ដើមឈើធំៗនៅក្នុងព្រៃសម្រាប់ឲ្យគេចូលកាប់នោះទេ ព្រោះថាអ្នកកាប់ឈើហាក់ដូចជាកាប់ក្បាលសម្តេចយ៉ាងដូច្នេះដែរ? អញ្ចឹងបើលោក កែវ អូម៉ាលីស្ស កំពុងតែជិះសេះលែងដៃយ៉ាងព្រហើនបែបនេះហើយ ទើបបណ្តែតបណ្តោយឲ្យនៅតែមានការកាប់បំផ្លាញព្រៃឈើជាដដែលៗទៀតនោះច្បាស់ជាត្រូវទទួលរងនូវទម្ងន់កណ្តាប់ដៃដែករបស់សម្តេចតេជោ ហ៊ុន សែន នាយករដ្ឋមន្ត្រីនឹងដកតំណែងគ្រវាត់ចោលជាក់ជាមិនខានឡើយ។
ប្រភពបានឲ្យដឹងថា ក្រុមហ៊ុនក្លូអូវីននេះគឺមានម្ចាស់ឈ្មោះ ឡាំ ដែលមានទីតាំងស្ថិតនៅក្នុងភូមិជ្រូក ឃុំគូលេនត្បូង ស្រុកគូលេន ខេត្តព្រះវិ ហារ បានធ្វើសកម្មភាពកាប់បំផ្លាញព្រៃឈើយ៉ាងកក្រើកពេញព្រៃអស់រយៈជាច្រើនឆ្នាំមកហើយ គឺគ្មានអាជ្ញាធរឬសមត្ថកិច្ចណាហ៊ានចុះទៅចាប់ធ្វើការបង្ក្រាបនោះឡើយ ទើបធ្វើឲ្យម្ចាស់ក្រុមហ៊ុនឈ្មោះ ឡាំ នេះសម្រុកដឹកជញ្ជូនឈើក្នុងមួយថ្ងៃៗមិនក្រោម១០រ៉េវបង្កង់និងយ៉ាងហោចណាស់ក៏ពី២០ទៅ៣០គោយន្តនោះទេគឺដឹកចូលទៅក្នុងក្រុមដោយគ្មានច្បាប់អនុញា្ញតអ្វីបន្តិចទាល់តែសោះហាក់បីដូចជាហែរកឋិនគឺគ្មានឃើញមានសមត្ថកិច្ចឬស្ថាប័នណាហ៊ានទៅរារាំងក្រុមឈ្មួញទាំងអស់នោះបានឡើយធ្វើឲ្យប្រជាពលរដ្ឋរស់នៅតំបន់នេះមានការព្រួយបារម្ភយ៉ាងខ្លាំងពីការបាត់បង់ព្រៃឈើយ៉ាងរង្គាលនៅតំបន់នេះ ព្រោះតែមន្ត្រីថ្នាក់ក្រសួង ថ្នាក់ ខេត្ត ថ្នាក់ស្រុក ធ្វើជាមិនដឹងមិនឮអើពើឈឺឆ្អាលចំពោះក្រុមហ៊ុនក្លូអូវីនដ៏មានឥទ្ធិពលក្នុងការកាប់បំផ្លាញព្រៃឈើដែលស្ទើរតែផុតពូជបាត់បង់អស់ទៅហើយនោះហើយមិនគួរណាថ្នាក់លើមើលរំលងឬក៏គិតតែពីផលប្រយោជន៍ផ្ទាល់ខ្លួននិងបក្ខពួកប៉ុណ្ណោះទេ?ខណៈដែលក្រុមហ៊ុនក្លូអូវីនកំពុងកាប់បំផ្លាញព្រៃឈើនៅភូមិជ្រូក ឃុំគូលេនត្បូង ស្រុកគូលេន ខេត្តព្រះវិហារ យ៉ាងពេញទំហឹងតែម្តង ដែលគេដាក់ការសង្ស័យថាគឺពិតជាបានបើកភ្លើងខៀវពីលោក កែវ អូម៉ាលីស្ស ប្រធានរដ្ខបាលព្រៃឈើ ថ្មីរូបនេះស៊ីសំណូកពុករលួយខ្លាំងជាងមុនទៅទៀត?។
សេចក្តីរាយការណ៍កាលពីពេលថ្មីៗនេះបានឲ្យ ដឹងថា សកម្មភាពកាប់បំផ្លាញព្រៃឈើនៅភូមិជ្រូក ឃុំគូលេនត្បូង ស្រុកគូលេន ខេត្តព្រះវិហារ ដែលអាចនឹងឈានដល់ការវិនាសហិនហោចនៅពេលខាងមុខនេះ ដោយស្នារដៃក្រុមហ៊ុនក្លូអូវីនដែលកំពុងកេណ្ឌប្រជាពលរដ្ឋឲ្យចូលទៅកាប់ផ្តួលរំលំយ៉ាងគគ្រឹកគគ្រេងហើយមានគំនរឈើជាច្រើនទីតាំងដែលគេសង្ស័យថាក្រុមឈ្មួញរបស់ក្រុមហ៊ុនក្លអូវីនច្បាស់ជាទទួលបានការបើកភ្លើងខៀវពីលោក កែវ អូម៉ាលីស្ស ប្រធានរដ្ឋ បាលព្រៃឈើដែលទើបឡើងកាន់តំណែងថ្មីទំន ងជាត្រូវថ្នាំសណ្តំរបស់ក្រុមហ៊ុនក្លអូវីនចំពេលដែលក្រុមហ៊ុននេះបានបំផុសបំផុលប្រជាពលរដ្ឋឲ្យចូលទៅកាប់ឈើផ្តួលអារពុះនិងច្រៀកឡាំង៤ជ្រុងនៅភូមិជ្រូក ឃុំគូលេនត្បូង ស្រុកគូលេន ខេត្តព្រះវិហារ ពោលគឺអាចជាប់ពាក់ព័ន្ធជាមួយនឹងមន្ត្រីជំនាញក្នុងខេត្តនេះជាលក្ខណៈប្រព័ន្ធដែលទទួលបានកញ្ចប់ថវិកាយ៉ាងក្រាស់ក្រែលពីក្រមហ៊ុនក្លូអូវីនទើបមិនមានមន្ត្រីជំនាញនិងកម្លាំងសមត្ថកិច្ចណាហ៊ានចុះទៅហាមឃាត់ឬចាត់វិធានការចាប់ធ្វើការបង្ក្រាបនោះឡើយ។
សូមបញ្ជាក់ថាការផ្លាស់ប្តូរតំណែងមេរដ្ឋបាលព្រៃឈើគឺក្នុងគោលបំណងធ្វើឲ្យសម្រេចបាននូវនយោបាយកំណែទម្រង់របស់រាជរដ្ឋាភិបាលនិងទទួលបានជោគជ័យតាមផែនការយុទ្ធសាស្រ្ត ចតុកោណដំណាក់កាលទី៤របស់រាជរដ្ឋាភិបាល នឹងធ្វើការងារដោយមានតម្លាភាពបំផុតដោយត្រូវតែយកចិត្តទុកដាក់ខ្ពស់ក្នុងការអនុវត្តច្បាប់ដែលបានដាក់ចូលជាធរមានរួចហើយ ប៉ុន្តែលោក កែវ អូម៉ាលីស្ស ប្រធានរដ្ឋបាលព្រៃឈើថ្មីរូបនេះកំពុងត្រូវបានគេរិះគន់ថា បានបើកដៃ ឲ្យមន្ត្រីក្រោមឱវាទឃុបឃឹតគ្នាបង្កើតឲ្យមានបទល្មើសព្រៃឈើកាន់តែខ្លាំងឡើងថែមទៀត ដើម្បីទទួលបានផលប្រយោជន៍ លាភសក្ការៈពីពួកឈ្មួញទុច្ចរិតនិងក្រុមហ៊ុនក្លូអូវីនដោយការកាប់បំផ្លាញនិងដឹកជញ្ជូនឈើយកទៅលក់ធ្វើមានបានរៀងៗខ្លួន។
ប្រភពបានបន្តឲ្យដឹងទៀតថា លោក ឡាំ ម្ចាស់ក្រុមហ៊ុនក្លូអូវីនដែលមានឥទ្ធិពលខាងកាប់បំផ្លាញព្រៃឈើនៅក្នុងភូមិសាស្ត្រខាងលើនេះបានដាក់ម៉ាស៊ីនអារច្រៀកឈើយ៉ាងរលូនជាមួយអាជ្ញាធរពាក់ព័ន្ធប្រឆាំងបទល្មើសព្រៃឈើទាំងអស់នោះហើយបែរជាមិនធ្វើការទប់ស្កាត់បង្ក្រាបទាល់តែសោះ បើទោះបីជាលោក អ៊ុន ចាន់ដា អភិបាលនៃគណៈអភិបាលខេត្តព្រះវិហារបានដឹងច្បាស់ហើយថាក្រុមហ៊ុនក្លូអូវីនបានធ្វើការរកស៊ីកាប់បំផ្លាញនិងដឹកជញ្ជូនឈើនេះយ៉ាងដុះស្លែមកហើយ ចុះហេតុអ្វីបានជាលោកនៅតែសម្ងំឈឹងស្ងៀមស្ងាត់មិនចាត់វិធានការបង្ក្រាប? ជាមួយគ្នានេះដែរក៏មានការអំពាវនាវស្នើសុំឲ្យលោក សៅ សុខា មេបញ្ជាការកងរាជអាវុធហត្ថលើផ្ទៃប្រទេសនិងជាប្រធានគណៈកម្មការដឹកនាំចុះបង្ក្រាបបទល្មើសព្រៃឈើនៅកម្ពុជាគួរមេត្តាបើកប្រតិបត្តិការបង្ក្រាបទៅលើក្រុមហ៊ុនក្លូអូវីននេះជាបន្ទាន់ផង ព្រោះក្រុមហ៊ុននេះកំពុងផ្គើននឹងបទបញ្ជារបស់សម្តេចក្រឡាហោម ស ខេង កាលពីពេលថ្មីៗនេះឲ្យអាជ្ញាធរមានសមត្ថកិច្ចគ្រប់ខេត្តទាំងអស់ត្រូវតែចាត់វិធានការទប់ស្កាត់បង្ក្រាបបទល្មើសព្រៃឈើឲ្យខាងតែបាន? មិន តែប៉ុណ្ណោះគឺថែមទាំងបានធ្វើការព្រមានដកតំណែងចៅហ្វាយខេត្តមួយចំនួនទៀតផង។
ទាក់ទិននឹងករណីក្រុមហ៊ុនក្លូអូវីនសម្រុកកាប់ដឹកជញ្ជូនឈើនៅក្នុងភូមិសាស្ត្រខាងលើនេះដែលអាចជាប់ពាក់ព័ន្ធជាមួយមន្ត្រីជំនាញនិងសមត្ថកិច្ចដូចសម្លរកំពឹសក្នុងខេត្តព្រះវិហារ អង្គភាព គេហទំព័រMSKnewsយើងពុំអាចធ្វើការទំនាក់ទំនងសុំការបំភ្លឺពីភាគីខាងណាមួយបានទេកាលពីម្សិលមិញនេះ អង្គភាពយើងនឹងរង់ចាំទទួលនូវព័ត៌មានបន្ថែមទៀតរៀងរាល់ម៉ោងធ្វើការ៕